خليني ساكتة ١٠٠ - رسالة مفتوحة... إلَك !!

خليني ساكتة

تم النشر في 13 يونيو 2021


١٠٠ حلقة من خليني ساكتة

١٠٠ اسبوع

قبل الثورة خلال الثورة وبعد الثورة

١٠٠ اسبوع قطعنا فيهن من انه الوضع ما بطمن للوضع الصعب للوضع الاصعب وبعدين الوضع السيء للوضع الاسوأ وهلق صرنا بالطريق للانهيار والمؤشرات بتقول اننا عم ننهار واليوميات بتقول اننا بقعر الانهيار

شو تعلمنا بهالفترة اول شي واهم شي انه الزعما بهالبلد درجات في الكذاب في الاكذب وفي الاكثر كذبا، وفي الوقح وفي الاوقح وفي الاكتر وقاحة وفي اللص وفي الاكثر لصوصية وفي كبير اللصوص وفي رئيس الظل والرئيس والرئيس الاعلى

وبما انه بعد كل هالوقت من الظلم نبقى عم نعيد نفس الحكي فقلت بختصر هالحلقة وبوجه لك الك الحديث هيك هيك انت الامر الناهي

وبما انه آخر مرة طلعت حسستنا انك حاسس بوجع الشعب وما هي الا اشارة اشارتين وبدك تنزل تخوض الثورة بنفسك، خلص منتوجك الك لانك عارف تعبر عن المعارضة اكتر ما عارفة تعبر عن حالها

هيت لنبلش بدعمك انا عندي الك حل لموضوع استيراد النفط من ايران بوجه هالسلطة الجبانة اللي ما قابلة تواجه الحصار العالمي

وبما انه تزامن عرضك السخي تبع الليرة اللبنانية مع وصول ٧ بواخر مدفوع حقها من مال الشعب ودولاراتهم لتصفاية النية ليك شو فينا نعمل بدل ما تفوت النفط الايراني بالقوة على لبنان وتدفع بالليرة اللبنانية، فوت النفط الايراني على سوريا وخلي سوريا تدفع بالليرة السورية بال ROI شو منكون استفدنا؟ هيك بيبقى النفط اللي استورده لبنان بلبنان وبصير بكفي وبفيض لانه وقف تهريب النفط عند الشقيقة، والاهم من هيدا بيبقى الدولار بلبنان لان ببطل عم يتهرب على سوريا لسورية تقدر تشتري نفط يعني تكون عملت ضرب مع محور الممانعة بليق بمقامك كقائد محور

هلق بموضوع التشكيل للأمانة مش حلوة بحقك يعني هون في معضلة اذا كنت عم ترفع اصبعك وتعين اصدقاء ومندوبين وناطقين وما عم يطلع بإيدهم شي فهيدي مصيبة للصراحة واذا كان كل هيدا عم بصير وما حدا عم يسمع الكلمة فالمصيبة اكبر

اما بالاقتصاد بتقدر تكشف عن تجربة المصرف المركزي بالبديل وكيف قادر يحافظ على راسماله واحتياطه لحد هلق من دون ما ينهز وكيف قادر يفرض على العالم تدفع ديونها بالدولار من دون ما تفتح تمها وتعترض

وانا بحيي اصرارك وحرصك على الوقوف بوج مؤامرة البنك الدولي تخايل لو اتدخل؟ كان الدولار بده يتخطى ال ١٠ الاف والدعم بده ينرفع والعالم بدها تصرخ لانها ما عم تلاقي الدوا

وبعدين كيف بتسمح انت كمعارض صلب انه العهد القوي اللي انت حاميه يوصِّل العالم لهون، ما تقل لي شو طالع بإيدي؟ ولو ما انت بتحكي الكلمة بتصير شعار، ما حدا بلبنان يستخدم كلمة الذلّ، لحد ما صرت انت تنبه منه اذلال الناس، وعدين ضاع التفسير صار عنا نحن اللبنانيين double standard لمعنى الذل، ما بقى نعرف بالتحديد شو هو؟ يعني ضاقت علينا اللغة العربية انه مثلا اذا قلنا الوقفة عالبنزين ذل طب بكرا بس نرجع نوقف عالافران شو بدنا نسميها؟ يعني كيف بدي قل لك لازم تساعدنا نحط مراحل بهيدا الوضع لان بالنتيجة ما فينا نطلق شعارات كبيرة لان حتى بس توصل الاستحقاقات الكبيرة متل الوصول عالقدس نكون محافظين شوية كرامة من هون شوية عز من هونيك

بعدين بما انك ضاق خلقك من الفساد والفاسدين والنصاب والنصابين انه خلي النائب حسن فضل الله يفتح هالملفات اللي لحقها رطوبة، وفي شي بهول التفاصيل مش منيحة بحقك مثلا يكون محسوب عليك حلفاء مشتبه فيهم بموضوع بواخر العتمة، ومونتهم واصلة ليبتزوك بموضوع السلاح وانت ما عم تقدر ترد.. تخايل في حدا عم يتعدى حدوده لان بيعرفك انك وفي لحلفائك وما ممكن تتراجع عن حمايتهم حتى لو طلبوا ٥١٪ من وقتك ومجهودك

بهيدي للامانة المشهد واضح حتى للي ما بده يشوف وهو انه العلاقة بيناتكم قائمة على الندية بتغطي لي غطرستي بغطي لك فسادك

لان اي تفسير تاني بكون على قاعدة قل لي من تعاشر اقل لك من انت يعني انكم دافنينه سوا وانا ما بقبلك اياها بس احتضانك لتيار الافقار والتعتير من جهة وحركة الحارمين من جهة تانية ليك لوين وصلنا يعني قل له كيف حال اولادك رد هياهم بين ايدين

على الهامش فيك مثلا تستعمل التكيلف الشرعي بحالات متل اللي عايشين فيها بموضوع تهريب الدوا والبنزين والحليب والسلع المدعومة، على فكرة هيدا اذا ما بيقضي على ظاهرة التهريب كليا يعني حد منها شي ٧٥٪ يعني مرة جديدة مش منيحة بحقك تكون هيك الحدود سايبة بلكي تسللوا داعش ع غفلة

وكمان بما انه المنطقة عم تغلي ومن منطلق معرفتك بالشاردة والواردة بموانئ ساحل البحر المتوسط وصولا عاليمن ما في شي قصقوصة معلومة تعطينا اياها عن انفجار المرفأ هيدا بتتذكره؟ اللي صار بالعنبر رقم ١٢ اللي ما اسعفتك الذاكرة ولا المعلومات الدقيقة تتذكره اي هيدا قربت الذكرى السنوية تبعه ورئيس الحكومة اللي شكلت لنا اياه ما قادر يوصل للحقيقة ب ٥ ايام بس للامانة اعلن ٤ ال يوم حداد وطني

قبل ما اختم بما انك بتفهم اكتر من كلنا وعادة بتخبرنا وين الصح ووين الغلط بتقدر تقلنا اذا السكوت عن تعطيل البلد لاهداف اقليمية صح او غلط وعن سحب اللقمة والدوا من تم شعبك لحسابات سياسية صح او غلط و السكوت عن الخطأ والفساد صح او غلط؟

ان شاء الله موت اذا عم كذب بس الرئيس الحريري والمفتي طلعت عينهم على البلد تخايل في حدا غيرك مفتح عينه عالبلد، بفهم انا انه آخد ع خاطرك من سعد انه ما سمع الكلمة من الاول واستقال بس ما انت وبتعرف ونحن منعرف انه حتى لو بقي ما رح تفرق وانه البلد وصل على مفترق طريق الحل الوحيد هو تواضعك انت شخصيا واذا ما تواضعت وشلت هالبارودة ع جنب وجيت نحكي كلمتين كأحزاب سياسية عالارض فعلى البلد السلام.. وانت حر تسمع حر لا اما انا خليني ساكتة