خليني ساكتة ١٠١ - مفاجآت خاصة للسوّاح والمغتربين!

خليني ساكتة

تم النشر في 21 يونيو 2021


بلش موسم الاصطياف

نحن كقطعة سما فتحنا ايدينا لنلاقي المغتربين

هلق ما فينا الا نشكر كورونا انه بيجبر الواصل عالمطار يكون حاطط كمامة بس انه ليخفف من ريحة تراب الوطن العافطة على الوصول

ما تخافوا هيدي ريحة الانجازات ممزوجة بالقوة اللي عايشين بكنفهم

من هلق خلونا نتفق ما في كهربا وما في موتور وما في بنزين والزبالة متلية الطريق

ادوية وحفاضات وحليب ما في والبرغشة اذا عقصت ابنكم او ابنتكم يمكن يصير بدهم مستشفى اللي اصلا ما عم تستقبل مرضى

يعني اذا جايين تنقوا معنا نحن مش ناقصنا

انتو عم تشوفوا عالاخبار وهيك الوضع بس لا هو مش مأساوي قد ما مبين للصراحة هو أسواء بكتير

بيكفي عامليلكن الدولار ب ١٥ الف واكتر يعني البلد صار يا بلاش

انتو كوافدين بفريش دولار ما كتير رح تحسوا بالعكس تماما رح تلاقوا البلد جنة مقدور على العيش فيها لان لما تفوتوا على مطعم ويسعر قنينة المي ب ٢٠ الف متل من زمان دغري راسكم رح يقول يا بلاش بأقل من دولار ونص من بعد ما كانت ١٣ دولار، على امل بس انكم ما تمرضوا لان بهيدي ما رح فينا نوعدكم انه الدولارات رح تعمل شي

اي ودخيلكم دخيلكم ما حدا يجي ينظر علينا بالفوضى بدك تجي لعنا بدك تشلح ال chapeau بالبلد الملون اللي جاية منه تشمر عن زنودك وتفوت العجقة وين ما كان مش بس بالطرقات، اللي بيطلع بإيده يحجز شاليه اللي ما حجز من شهر راحت عليه..

جربوا تنزلوا شي app جديدة تحدد لكم وين محطات البنزين هيك ما بتقطعوا من الشوارع اللي فيها محطات ما بتعلقوا بالعجقة كمان بنزل معدل الخطر على حياتكم من شي حادث سير او اطلاق نار او يمكن عجوم بالسلاح الابيض كرمال الدور

غير المناطق السياحية والنايت كلوبز والبحور المليانة ومش مجانية عندكم تسلاية ٢٤/٧ في ستاند اب كوميدي من بطولة جبران باسيل والتيار العوني هول بديروا البلد يحكموا البلد بعطلوا الد وآخر شي طلعوا بيان استنكار ليأكدوا انه هني مش السلطة تماما متل البند الجزائي تبع البواخر 

وفي فلتات شوط هول الممثلين المغمورين اللي بفاجأوا الجمهور كل ما فتحوا تمهم 

وفي عندكم مسرحية بيي اقوى من بيك هيدي شد حبال بين الرئيسين بري وعون، هون الحبكة قائمة على اللعب على الوتر الطائفية مع التهديد المبطن بتحريك الشارع لاعبين الارتكاز فيه جنبلاط والحريري وبدور التصعيد الكلامي، والشعب بصير دخيلكم رح تخرب الدنيا بيتدخل بشارة الاسمر بالدعوة لتظاهرة شاملة ضد السلطة وبخلال الاضراب بتشكر السلطة على مشاركتها الفعالة بالاضراب ضد نفسها

بنفِّس الشارع بيرجع كل واحد ورا بياناته وتصريحاته بانتظار الجولة الجديدة

بعتقد اصلا بشارة اسمر مدرب ب ام تي في لان نفس ال track بيتبعوا بالام تي في بيطلعوا بنشرة الاخبار ببهلوا الدنيا بمسحوا الارض بالسلطة كل يوم بس يوم الخميس بالليل بجيبوا كل واحد انتقدوه على حفلة تروتش وبوليش وتلميع مع مارسيل

على الهامش منحب نبارك لكم الرئيس الجديد هيدا على فكرة اسمه كتير قوي يعني المعنى بقلب الشاعر بس بكرا يطلع يبارك له المرشد الاعلى المحلي وحتى بي الكل شو بقول مبروك "رئيسي" عالقد يعني اسهل حتى الواحد كمان ما تختلط عليه الامور

ان شاء الله موت اذا عم كذب بس ما في احلى من لبنان، وما لقيت احلى من نكتة قريتها اختم فيها اذا بدهم يعطوا الحيوانات جنسيات لكانت الجنسية من نصيب البطريق اسمو طائر وما بطير عيش بالجليد وما عنده فرو ولا ريش اذا فات عالمي ياكلوا القرش واذا راح عاليابسة بياكله الدب وبعد كل هيدا تلاقيه واقف عم بزقف ومبسوط .. خليني ساكتة