خليني ساكتة ١٠٢ - السيد حسن شرح لجبران باسيل شو قال جبران باسيل!!

خليني ساكتة

تم النشر في 27 يونيو 2021


يعني صار الواحد متل اللي ما اله عين

طلعنا كلنا مستهدفين المرشد الاعلى المحلي وحلفاؤه وكل ما بيحكي كلمة ما منفهم عليه ومنهاجم بلا تفكير

انا بقول منيح هيك التوقيت بيطلع رئيس الما خلونا بيحكي الاحد وبيطلع المعلم الكبير بفسر خطابه الجمعة.

بتحس هالسياسيين فاتحين ع حسابهم كإنهم بشي البرنامج الاسبوعي اللي بيلبق له اسم "الزعيم الافشل او الاكثر وقاحة" او يمكن افضل يكون اسمه انا او لا احد

اصلا بهالوضع نحن بحاجة لشي يعبي لنا وقنا نحن واقفين بصف البنزين او عم نبرم على ادوية او على شي سلعة معينة بيبقى في ٥ ايام من الاسبوع منقطعهم بتويتات وليد بيك وسمسمات الحكيم والدعوات اللي عم يرفعها قال لان هو مش من كلن

وخلال الاسبوع الحريري وباسيل بيتحدوا بعض مين معطل البلد والحاكم بأمر الليرة والرئيس بيتهاوشوا على وقف الدعم او ترشيده وبعدين كبير اللصوص بياخد قرارات خونفوشارية يدير فيها الاقتصاد كل قرار بياخدوا بغرق البلد اكتر واكتر وهالزعما بينقدوه بيرجعوا بيستقبلوه ما اكيد هو امين الصندوق وعارف كل واحد فيهم شو عامل

ومن الفقرات الجديدة بالبرنامج الاستعانة بصديق متل هيدي اللعبة نحن وصغار اللي كنا منركض وبس نتعب منسلم ال baton للي معنا بالفريق يكمل ركض عنا

وهيك في وقفات مع الاعلان على لسان سالم زهران ووئام وهاب هول اللي دائما قال يبشروا بالبلا قبل وقوعه ودائما على لسانهم آخر تنبيه وعادة بيلعبوا على التحضير النفسي للشعب البنزيم بده يصير ب ٢٠٠ الف بقوم بصير ب ٩٠ الف بلاقوها العالم المهم مش ٢٠٠

وبالوقت اللي الكل مشغول بالاستعانة بصديق بقدرة قادر بتزيد التحويلات على سويسرا وبتوصل لاكتر من ٦ مليار دولار بلا ما ترجع الاموال المنهوبة

وبيقطع فواصل ترفيهية متل لقاء خلدة هيك بحسسك طلال ارسلان هو وعم يحط رئيس الجمهورية ابو ضمير مرتاح بفحواه قبل حدوثه انه شي حدث تاريخي رح يحرف لبنان عن مساره باتجاه جهنم واكيد من باب الحرص على عدم التدخل بالقضاء وبمسار التحقيق بجريمة العصر بطالب بالحقيقة بانفجار المرفأ مش تفكروا لا سمح الله كرمال حق الضحايا لاااا كرمال ما يبقى ابن الطايفة موقوف ظلما

بالعودة لخطاب المرشد الاعلى المحلي ما بتعرف اذا عم يفهمنا قلنا شو قال باسيل او وعم يفهم الجمهور المسيحي انه لا لا هو ما سلمني امره هو زلمي قوي ثابت عالارض عم يحكي من باب عالي او عم يفهم باسيل شو لازم يكون قال بتحسه عم يفهمه انه فوّت حاله بالحيط،

يعني احسن ما تكبر الخسة براسه ويفكر حاله قال شي معين وهو بحق له يقول شي معين تاني يعني متل اللي عم يقول التاني بطريقة غير مباشرة انه هلقد فشختك اذا وقعت بين الشيعة ممكن تزحط اذا طلبت باننا نكون الحكم انتبه يعني سلمتنا امرك وهون ممكن توقع اما لو نحن بدنا تاخد اللي منستحقه بقوتنا وعددنا بكون كاسك يا وطن

كلمة حق تقال موضوع تحميل كل اللي شاركوا بالحكومات السابقة موضوع الدخول بلجنة لموضوع الدعم كلام محق وحقيقي وصحيح

من جهة تانية عندي سؤال واحد بموضوع المصافي النفط واذا هلقد بسيط وسهل ليه حليفك وصديقك اللي مخصص له خطاب كامل لترد عليه ما عملها علما انه صارلها وزارة الطاقة بجيبته الصغيرة من ١٠ سنين بالقليلة هدر فيهم اكتر من ٤٠ مليار دولار

او هيدا سؤال ما بترد عليه تماما متل لما قال عن بري انه غير نزيه هيدي بتقفز عنها لان الفساد مش اختصاصك وانت هيك بتصاحب العالم على عليهم صحيح بيكفي بلشتوا تحاولوا تجيبوا بنزين

بعدين يا عيب الشوم على هيك بلد عم يخلي اخر هالعمر حزب العزة والكرامة يشتغل بالبنزين ويلهي الرمان عن وجهته قصدي يحرف البوصلة عن القدس

ونحن اصلا عارفين انك فيك تعمل اللي بدك اياه وتجيب البنزين وانك لوجستيا جاهز وبتعرف كيف تفوته عالبلد، بس دخيلك انتبه ما يخزنوه بعنبر من عنابر المرفأ وتنسوهم هونيك

ع شوي حسيت انك بعدك ما فوتت البنزين عالبلد حتى ما تطلع تيما بخليني ساكتة تنتقد

وبتطلع السفارة الايرانية بتغريدة تحدي للسفيرة الاميركية بلعب هالحكي بيوحي للعالم انه البواخر وصلت وهني كل اللي عم يعملوا تحدي الهي جديد بيحرز لهم نصر وهمي الهي جديد على مصالح الشعوب

هلق متل العادة كل واحد مش مع المرشد وحلفاؤه قابض مليارات الدولارات، لو كان عم يحكي عن الجماعات التانية اللي بالسلطة كنا قعدنا تفرجنا وزففنا لان كلنا منعرف إنهم بيقبضوا بس انه يشمل ثورة ١٧ تشرين معهم فلا و١٠٠ لا باللبناني منقول فشرتوا اي فشرتوا نكون متلكم

نحن نزلنا عالارض لاننا كنا عم نحاول نوعي العالم وين واصلين ووين وصلتونا ووصلنا

كل الشباب والصبايا اللي مع الثورة عم يطلعوا على التلفزيونات يحكوا علم بالاقتصاد والعدل والسياسة وكل هول حرصهم على الناس اللي هني منهم على اهلهم اللي كتير منهم بعدهم اسرى عندكم كلكن يعني كلكن لانهم بخافوا من الحرب اللي بتهولوا فيها كل ما تضيق حولكم

اشفتوا هيدا البيان: . دعا مسؤولو التواصلِ الإجتماعي في حزب الله وحركة أمل جمهورَ المقاومةِ إلى الإلتزامِ بأعلى درجاتِ الانضباطِ والتحلي بروحِ الأخوّةِ ونبذِ التفرقة.

بعدمِ الدخولِ في أيِ سجالاتٍ على مواقعِ التواصلِ مما لا يَنتجُ عنه الا خلافات عقيمة تؤدي الى الانقسامِ والتشرذمِ بينَ الاخوةِ في البيتِ الواحد.

والحرصِ والوعيِ وحمايةِ ظهرِ المقاومة، في وقتٍ يسعى فيه الأعداءُ أو المصطادون في الماءِ العكر لنشرِ الفتنِ وكسرِ الوحدة.

اي هيدا ما بقى رح ينفع العالم ما بقى محبوسة بمدارسكم وما بتسمع الا اعلامكم العالم عم بتشوف بعينها وعم تدوق الذل كل يوم ١٠٠ مرة وبالتالي الحبل الطائفي اللي رابطينهم فيه ما بقى رح ينفع

ان شاء الله موت اذا عم كذب بس مع كل هيدا قال وزير الادمغة المهاجرة بده يعمل الامتحانات الرسمية الا اذا خرب البلد.. خليني ساكتة