خليني ساكتة ١٠٣ - "فخامة الانهيار" !

خليني ساكتة

تم النشر في 5 يوليو 2021


حلمت انه حلقة اليوم اسمها "فخامة الانهيار"

عادة النساء بيحلموا بشي قديس بسموا اسم ابنهم او ابنتهم ع اسمه

انا هيك شفت بنومي اني عم اكتب حلقة خليني ساكتة واسمها "فخامة الانهيار"

هيدي اول مرة بسمي الحلقة قبل ما اكتب، بس هيدي حقيقتنا هيك صارت احلامنا نحن اللبنانيين

نلاقي عبارات جديدة تعبر عن الدرك اللي وصلنا له

هالحلم بينفع عنوان للمرحلة كلها مش بس لحلقة، لان نحن انهيارنا من نوع آخر انهيار قوي مطعم بطعم العزة والكرامة على رشة حقوق من هون وميثاقية من هونيك

قبل ما نفوت على المطحنة اللي عايشين فيها، خلونا نخكي كلمتين بالنظام، ادعاءات القاضي بيطار لشلة المقصرين والمتورطين والمهملين بجريمة العصر، خطوة ترفع لها القبعة، على أمل انها تستكمل رفع الحصانات، ومن هونيك ورايح بياخد القضاء مجراه وليحاسب المذنب.. وكل واحد فيكم يراقب زعيمه، بما انه طلبات الادعاء بينسحب عليها نموذج ٦ و٦ مكرر، ويعيد ورايي اذا زعيمي ما قبل يرفع الحصانة عن مشته فيه بتفجير المرفأ يعني زعيمي شريك بالجريمة.. وبعدين ما عم افهم الانهيارات اللي صارت بسبب استدعاء بعض الاسماء وانهم فوق الشبهات، انه بتحس هني نفسهم مش هلقد عنالهم الموضوع، معليه خدوا نفس وماء زهر اللي بيطلع بريء ما حدا رح يفتري عليه، والمنطق بقول انه اللائحة رح تطول ما رح تخف الاسماء وبيبقى العبرة برفع الحصانات، هلق في عالم رح تتسرع وترجع تتروى متل محمد فهمي، وفي عالم رح تفكر مرتين بكبش المحرقة، ويمكن في حدا يعتر هيت لنسلم شي نائب لحد ما يشجع تسليم الرووس الكبيرة، هلق بكون الرئيس بري بينه وبين حاله عم يقول اوف واخيرا اجا مين يحجمه لباتمن اللي صارت كلمته مسموعة بكل الملفات ووساطاته بكل الدول

وفي اكيد اكيد النوع اللي رح يفكر كيف يطير القاضي نفسه، ومعليه خلينا نكون واضحين بموضوع تصريحات متل "انا تحت القانون ورح امثل قدام قاضي التحقيق كشاهد" ما بتنفع ما تتخبوا وراها لانه مبعوت وراكم كمدعى عليكم متورطين وطلبوا الاذن لملاحقتكم يعني مشبته فيكم بجرم او جناية يعني خففوا حركات.

بالعودة لحالتنا الكارثية كبشر ما عنا ادنى حقوق البشر، في سؤال بيطرح حاله: لمين تاركينا؟ يعني نحن الشعب لمين متروكين؟ لا بلدية لا نائب لا وزير لا حزب لا شحار ولا تعتير عم يعمل شغله، بس الكل حضر صلاة البابا وشكره عليها، على فكرة البابا كان عم يصليلنا لا الله يريحنا منكم قمتوا فهمتوا غلط وشاركتوه الصلاة، انتو بتعرفوا عادة الصلاة تقام ضد الشرير والشيطان صح؟ ما سمعتوه لما قال عنكم انكم بلا ضمير؟ الوحيد اللي افهم من الكل حتى من البابا مين؟ اكيد رئيس الماخلونا، دغري طلع صفقه تويت للبابا عن حقوق المسيحيين هلق استعمل كلمات اوسع بالظاهر متل دور المسيحيين بالشرق بس كلنا منعرف شو المقصود فيها.. هيدي التويت تماما متل بيانات الاستنكار والبند الجزائي بملف البواخر، هيدي خزعبلات اللي بيتسعملها باسيل متل السجل العدلي، هيدا اللي لو في دولة حقيقية بيطلع عليه بالقليلة ٥٧ عقار قصدي جنحة

اكيد دايما بظل العنوان الاساسي "فخامة الانهيار" من زمان كنا نقول انه زعماء الطوائف عم يتحكموا بأمر اللبناني، هلق صار اللبناني تحت امر اصحاب المحطات واصحاب الموتورات واصحاب الانترنت، ال ٥ امبير صارت ب ٦٠٠ الف واللي ما عجبه يشيل الاشتراك العالم واقفة بالصف اي نعم هيك بمساج ع واتساب وحدة طير صاحب الموتور العداد والتسعيرة وتكة الديجينتر واللي عجبه تماما متل ما طارت اموال المودعين، وطار سعر الصرف وطار الاحتياطي بنصبة وحدة من كبير اللصوص

هيك تاركينا نفلت على بعض بالشوارع، بالنصب بالاحتيال، ومتل ما صار للدولار ٤ / ٥ اسعار صار لتنكة البنزين ٤/٥ اسعار حس مين بدك ترطل وكيف بدك تحتال على طوابير العزة والكرامة

كله هيدا مش مهم واذا حدا اتحرك بالشارع بكون مشبوه

ومثلا بطرابلس الجوع كذبة وبدعة والدليل المسلحين اللي نزلوا عالشوارع واللي هني ما كانوا تحركوا لو ما بدهم يثبتوا نظرية وزيرة الدفاع وزير الخارجية بالوكالة بإنه الفقر ممكن يكون ارض خصبة للارهاب المضحك المبكي التهم غب الطلب الي بيتحرك وبشذ عن حالة التنميل العامة اللي ضاربة المجتمع اللبناني

وبيطلع لك المواطن العادي يحاجج طائفيا بالمشهد العام فجأة بينسى انه تنكة البنزين وربطة الخبز وانقطاع الدوا وغياب الكهربا شامل لبنان بكامله من راس الناقورة جنوبا لنهر العاصي شمالا نفس الشي وانه كلنا عايشين بالمصايب سوا

بس بزمن "فخامة الانهيار" بعتقد طالع اللي اسمهم شانتال مش كتير منيح ومن بعد ما كانت تنطر شانتال عون باسيل بالصف كرمال تسحب ٢٠٠ دولار، شهدنا السفيرة الكندية شانتال تشاستيناي عم توقف بالصف لتعبي بنزين حرام هيدي مع انه صار لها اكتر من اربعين يوم بلبنان بس ما علموها اللبنانيين وخاصة المسؤولين كيفية التصرف.. قولكم كمان بس تقطع بموكبها ما بيقطعولها الشارع ومرافقينا ما بقوصوا عالعالم ولا بيضربوهم

الجيش تحول من حامي اسد غاب متى ثاورتنا الفتن لحارس عالمحطة متى هجمنا عالبنزين، وبذكرى سنة على قرار توقيف اللحمة من وجبات الجيش ما قدر الا انه يعتمد على حاله ويطلق رحلات سياحية بالهليكوبتر ليقدر يخلي المؤسسة واقفة ع اجريها.. 

على الهامش المصارف اللي اعادت انتخاب عمو سليم رئيسها بعدها مش جاهزة تدفع ال ٤٠٠ $ اللي حاول كبير اللصوص انه يطربشها اياها، طب هلق اللي اعاد انتخاب سليم صفير رئيس للمصارف انه على شو انتخبه تحديدا؟ على انجازاته؟ او على شو تحديدا؟

على سيرة الانتخابات، شو صار تحديدا معكم؟ كيف يعني بقدرة قادر قدرته انكم تتحالفوا وتتلاقوا بنص الطريق وتشكلوا لائحة وحدة مستقبل وتيار وامل واشتراكي بس مش عم تزبط معكم هالحكومة؟ على كل حال نعيما شو بلشتوا تفكروا كيف بدكم تطيروا الانتخابات النيابية من بعد ما شفتوا النتيجة او بعدكم متأملين؟

ان شاء الله موت اذا عم كذب بس قال في متبرعين تبرعوا ب ٥٠٠ الف يورو للمحكمة الدولية على ذمة حسان اكبر انجازاتي، اللي ما عارف كيف بده يخلي السنيورة وميقاتي والحريري يرضوا عليه ويصيروا يعتبروه منهم.. وكمان بعدهم باسيل والحريري عم يتناتشوا على الحكومة على اساس المشكلة بالاسماء ما حدا منتبه انه ما بقى تقملنا قيامة ... خليني ساكتة