خليني ساكتة ١٠٤ - نحن ما مننهار يا سيّد... #ارفعوا_الحصانات!

خليني ساكتة

تم النشر في 11 يوليو 2021


نحن ما مننهار يا سييد

خلص خلصت من هيدي النقطة، ما عندي شي تاني قوله فيها لان فيها من المعاني ما يكفي

ايلي الفرزلي طل من القاضي ادلة ليرفع الحصانات عن المشتبه فيهم بتفجير المرفأ يعني بمعنى آخر ارتأوا بمجلس النواب يحققوا مع القاضي بدل ما هو يحقق معهم، ما هو المرشد الاعلى المحلي طلع نهار الاتنين واعطى رأيه بالموضوع، انه كيف بيعرفوا المتهمين عبر الاعلام؟؟ اكيد كيف؟ معقول يعني بالدول الحضارية واللي فيها مؤسسات، بيبعت القاضي الخبر ع ورقة من تحت الطاولة بتدور عالمسؤولين كلهم، وبس تخلص البرمة بيطلع عالاعلام اللي اتفقوا عليه، هيك معقول راسه يعني القاضي بيطار فاتح ع حسابه وعم يشتغل بشفافية وعالمكشوف؟ وحطهم قدام الامر الواقع؟ هلق هو ما فرق الشي بالنتيجة لان كل الحكي اللي عم ينحكى عم يعتبروه شتي.. والرئيس بري اذا ما نفع الاستعانة في كصديق بتشكيل حكومة بينفع بالقليلة بتطيير تحقيق والاحتفاظ بحصانات ومنعديها هيدا من الحلقة الماضية تصريحات متل "انا تحت القانون ورح امثل قدام قاضي التحقيق كشاهد" ما بتنفع ما تتخبوا وراها لانه مبعوت وراكم كمدعى عليكم متورطين وطلبوا الاذن لملاحقتكم يعني مشبته فيكم بجرم او جناية او تقصير بالقليلة

هو شارون عدوكم التاريخي تم استجوابه والادعاء عليه من قبل دولته عدوتكم التاريخية بتهمة قتل مدنيين لبنانيين وفلسطينيين بلبنان بس انتو اكبر من انكم تتحكموا وتستجوبوا

بس هيدا طبيعي المش طبيعي انه نحن نفكر انه هيدي الطبقة السياسية رح تسمح انها تحاكم حدا بالفساد او بالاجرام او بالسرقة او بأي ارتكاب من ارتكاباتها.. بس تكون انت المتهم وانت المجرم وانت الحرامي وانت الفاسد وبالوقت ذاته انت المدعي وانت القاضي وانت المحامي شو بده يطلع من القضية.. واهل الضحايا اللي رح يفقع قلبهم بالشوارع هول تمويل سفارات كمان؟ ما هني شي بالنسبة الكم ما هني collataral damage عملتوها قبل وعشتوا وتعايشتوا مع جرائكم يوم اللي سامحتوا نفسكم عن الحرب الاهلية، شو بيمنع انكم تعيدو الكرة؟ ما في فرق بين قلب وهلق الا انكم لابسين بدلات غالية وساعات راقية وكرافاتات signnee

على فكرة بعد ما صار الدولار بعشرين الف هيك شي شبه عادي بلشوا يحضرونا لموضوع الدولار ب ٦ صفار يعني مليون او اكتر، بس الليرة بخير والحاكم بأمر الليرة ناطركم عالمفرق وطلع التعميم رقم ١٥٨ تحديدا متل المخاوف منه استكمال خرافي للنصبة التاريخية من كبير اللصوص والاربعين حرامي

طب معليه في مجال حدا يحط لنا تعريف للانهيار لان كل يوم بتقولوا وبتحذروا اننا رايحين عالانهيار طب اذا بعدنا رايحين عليه نحن اللي هيدا فيه شو تحديدا؟ لا وبيطلع حسان اكبر وقاحتي لان وقاحته بكبر انجازاته وبيطلب من دول العالم تساعده من دون قيد او شرط، من بدع ما يحط عليها الحق بالحصار قال هو مرتكز على كلمة المرشد الاعلى المحلي بيرفع اصبعه وبوزع مهام على اميركا والخليج وبيتحداهم اذا رح يساعدونا.. يعني من دون مبالغة اذا حدا وصفكم بالوقاحة رح تطلع الوقاحة تعترض انه انتو بدكم تهددوا وتسرقوا وتحموا الفاسدين بس العالم بده يساعدكم ليه قال الفقر بلبنان رح يأثر عالدول الاجنبية لانه بولد ارهاب.. ما هو اللي عم تعملوه فينا شو مش ارهاب؟

آه وقال الكهربا انقطعت بالقصر الجمهوري وحاولوا يضغطوا ع مصلحة الليطاني لتأمين الكهربا، لشو تضغط وتعزب حالك جيب صهرك عيشه معك نوره بكفاية ما شايفة مضوا عالبلد كله؟ ما عدا قصر عين التينة هيدا قال ماشي عالموتورات مش ع كهربة الدولة طب من وين عم تجيبوا مازوت عم توقفوا بالصف متل العالم؟ آه نسيت انه صار هلق كل حزب عنده مجموعة محطات بالبلد محسوبة عليه وبعبي لجماعته منها والعالم التانية عمرها ما ترجع..

بس اكتر شي بتحس بدك تخبط راسك بالحيط بس تشوفوا لما يطلع شخص متل ندى البستاني قال تسأل عن شي بتوزيع الطاقة، او جبران باسيل عم يحاضر بالعفة، او القوات مع الثورة بس بيتحالفوا مع حزب الله خوفا من البعبع ذو الجذور الشيوعية بنقابة المهندسين.. طب اي متى رح تستحوا وترحمونا صارت هيدي اكبر طموحاتنا انه بخلال الاسهال الكلامي اللي صايبن فيه حدا حدا واحد يطلع يعتذر منا كشعب قضيتوا عليه بشكل شبه نهائي.

على الهامش اللي عملوا مهرجانات بعلبك مشكورين، بس ياجماعة اي مهرجان ما بتنقطع في الكهربا او بخلفيته في طابور بنزين ما بعبر حقيقة عنا نحن الشعب اللبناني الفينيقي الابي، انه ما معقول بلد مطاره ما في كهربا قصره الجمهوري ما في كهربا مؤسساته ما فيها كهربا بيوته ما فيها كهربا مهرجانه يكون مشعشع

يعني مشهد المهرجان حضاري لدرجة ما بيشبهنا يمكن صار لازم انه اولا انه طير الفينيق اسطورة fairy tale وانه لا يا حبيبي انت كبشري مش مفروض منك تبقى عم تنبعث يوم من تحت الزبالة ويوم من تحت التلوث ويوم من تحت الانفجار انت كبشري لازم تكون عايش كبشري طبيعي بزمن طبيعي مش انك بال ٢٠٢١ عادي اذا بتسخن مي عالحطب وبتعشل النار من حجار الصوان

ان شاء موت اذا عم كذب بس ضهرت من البيت ابنتي بدها تشتري شي اسمه bubble tea وصلنا الساعة ٦ الا دقيقتين قال مدام اذا ما اجت الكهربا عال ٦ بدك ترجعي الساعة ٧ لانه بده يريح الموتور واكيد اكيد الكهربا ما اجت والموتور ريّح والمشكلة انه انا ما قدرت ارجع لانه ببساطة البنزين بسيارتي ما بكفي .. ومع هيدا وكله نحن ما مننهار يا سيد خليني ساكتة