خليني ساكتة ١٠٥ - it’s simple يا مريم: ما في بانادول؟ دَوْبوا صواريخ… واشربوا!

خليني ساكتة

تم النشر في 18 يوليو 2021


الله يعين البلد صح

بس الله يعين البلد عليكم

مش منتبهين انكم صرتوا نكتة بايخة سخيفة

ونقطة عالسطر

الامر very simple يا مريم هيدي القرطة اللي حاكمة البلد بقاءها من عدمه ما بقى لا يقدم ولا يأخر

اصلا رئيس السيلفي والبلد خلفي ما اله قلب الواحد يقسى عليه لان مجرد يشوفه او يسمعه عم يحكي بيعرف انه مش شغلته هالشغلة. بتحسه عنده خيارين او يقعد عاطل عن العمل او يشتغل رئيس حكومة وزعيم فلما يزهق مقرر يبقى عم يجرب

very simple يا مريم هلق هانت الامور، من اللي قاعد بقصر بعبدا للي قاعد بقصر عين التينة مرورا بتلة الخياط وبيت الوسط وصولا على معراب، ما بقى ينفعوا

قرطة معرقلين مطبلين، ما بيطلع منهم الا صوت متل الطبول الفارغة

يمكن صار لازم يطلع حدا يكون عنده الجرأة الكافية يعلن اننا دولة ساقطة بكل التفاصيل

والا يطلع الرئيس القوي بس يحس حاله اله جلد يتسقبل عالم ويكون فاضي الصهر المعجزة انه يقطع المهرجانات والضهرات البترون، ويتشكلوا حكومة من ضراب الطبل وفيها من الاسماء اي مجموعة من اللي بلا دف بيرقصوا ويحلوها

لان ببساطة البلد معروف شو مشكلته الاساسية وهي انه بلد محكومة بسلطة فاشلة فاسدة متحالف مع قوة ضاربة عندها ميات الوف الصواريخ.. ونكتة انه بدنا نتجه شرقا ونجيب نفط من ايران وما عم يخلونا غيروهها احكموا فرجونا انه نحن على خطأ، اعملوا اللي بدكم اياه زبطوا البلد، انه ما عم بفهم انكم بكل هالقوة بس متمسكين بالعيش المشترك، نحن كمواطنين صار بدنا اياكم تحكموا لحالكم وتفرجونا بقى.. وقفوا مسرحية بيي اقوى من بيك ومش انا اللي معرقل وهني ما خلوني احكموا بالصواريخ الموجودة وكل ما يجي طفل ليموت لإن ما في بانادول دوبوله شوية بارود اسقوا اياهم

انا ربيت على القرار ٤٢٥ من الامم المتحدة وال ١٧٠١ وانه نحن العين اللي بتقاوم المخرز اليوم عم ربي بنتي على التعميم ١٥٨ و١٥١ واي تعميم بيسرق العالم اقل من قبل كبير اللصوص الحاكم بأمر الليرة والمحمي من قرطة كبار الفاسدين

على الهامش هانت قال الحج محمد رعد ان الازمة شارفت على الانتهاء، هلق اسئلة وجودية مشبوهة من عيار على شو مستند ومن وين جايب تفاؤلك بلاها هيدي الاسئلة ما بتفيد بشي الا انها بتخدم العدو الصهيوني وطعنة بضهر المقاومة، يعني اذا بتريد بتاخد حكي الحج محمد عالثقة تماما متل كلام المرشد الاعلى المحلي، ما تنسوا الوضع بالمنطقة كله عم يتغير بشار الاسد حلف اليمين الدستورية ورئيسي قرب يستلم السلطة.. هلق بدنا نشوف اذا بدها تعقّد بشار الاسد قال بده دولاراته اللي علقانين بالمصارف اللبنانية وابراهيم رئيسي بده يعطينا نفط باللبناني.. بدنا ننطر ونشوف انا بقول كل هالتهريب ع سوريا عقدة ذنب لاننا آخدين لهم مصرياتهم.. بعديم هني مش بس الهم عنا مصاري، يعني نحن اذا بدنا نرد لهم كل جمايلهم بدنا دهر بكامله، ما كل النهج اللي سلطتنا فيه من تعليمهم من الفساد للديموقراطية للقمع الممنهج

بس نحن دايما اللبنانيين عنا هيك touch خاصة فينا.. مثلا نحن منآمن بالكارما، وانه اي شي منعمله بيرتد علينا بعد فترة، وانه الواحد لازم يبادل الخير بالخير، بس المفهوم شوي عنا مختلف يعني رح اشرح لكم مفهوم الكارما عنا بيطلع واحد بيقتل اتنين بقوم بيجي شخص آخر بيحميه، بعد فترة القاتل بصير وزير والحامي رئيس جمهورية.. اليوم الوزير اللي تسبب بقتل ٢ عم يحمي شخص مشتبه فيه بالتسبب بقتل ٢١٥ شخص.. مين بيعرف يمكن بعد شوية وقت نشوف الوزير الحامي رئيس حكومة والمشتبه فيه رئيس مجلس نواب.. وما رح تفرق علينا نحن الشعب لاننا معودين، راجعوا الاسماء اللي متزعمتنا وحاكمتنا من بعد ما انتهت الحرب لليوم وشوفوا مناصبها كل واحد زعماته ومنصبه على كبر عدد القتلى اللي برقبه.. لا وبيطلع مثلا الحكيم وبيحتفي بيوم ظهور برائته، بينسى انه تم الافراج عنه بتسوية سياسية متل اللي من الاصل حطته بالسجن، وبينسى كمان انه البراءة من قضية الكنيسة مش يعني البراءة من دم اشخاص ابرياء سقطت بالحرب.. كلكم زعماء والمفروض بنيته احزاب تسمتر، اذا حطيتوا شعار انا او لا احد على جنب وبرزتوا الشباب باحزابكم يمكن يكون عندكم فرصة.. الا اذا بكل هالاحزاب ما عندكم حدا انضف من الاسماء اللي فارضينها علينا بشكل يومي بالمشهد السياسة

ان شاء الله موت اذا عم كذب بس في عالم قدرة تقول عن اهالي الضحايا انه عندهم اجاندات سياسية ضد الزعمات المألهة وللأسف وهو اذا بتحلفوهم يمين للمستدعيين عالتحقيق بيطلعوا مع رفع الحصانات عن حالهم للأسف من بين المطبلين صحافيين وصحافيات ما عم يقدروا ياخدوا نفس بلا ما يوقفوا ضد رفع الحصانات.. ولهول بالذات ومنهم صديقات واصدقاء بحب قلكم عيب... خليني ساكتة