خليني ساكتة ١٠٦ - ما في كهربا بالاستديو صورنا بمحطة البنزين... حدا يحكي لنا مع الانهيار ياخد اجازة !

خليني ساكتة

تم النشر في 25 يوليو 2021



اللي ما عرف ليه نحن انبسطنا هلقد بانه ربحنا انتخابات نقابة المهندسين

يراجع بس بيان المديرية العامة للاعلام، اللي ما هان عليها انه الاعلام عم بضوي على لائحة العار وطلبت احترام الموقعين عليها

اي هيدا البلد بلش انهياره من ايام الرئيس الشهيد رفيق الحريري الله يرحمه، وقت اللي استلم البلد مع حامل الامانة الرئيس نبيه بري الله يطول بعمره، وعرفوا يلعبوها صح يوم اللي فرغوا النقابات والاتحاد العمالي العام من اي صوت معارض وحولوها لختم بيبصم لهم على أي تحرك ويتولى تنويم القوى النقابية والعاملة مغناطيسيا

بس لا المديرية العامة للاعلام ولا بيان مجلس النواب ولا محاولات التنصل والانسحاب من التوقيع ولا حتى محاولات التفسيرات السخيفة بتقلل من وقع الارتكاب اللي ارتكبوه ٢٦ نائب بحق الشعب اللبناني

لما نقول هدي سلطة فاقدة الشرعية بيعلى الصوت، هيدي السلطة مش بس فاقدة الشرعية لا وخاينة للامانة وخاينة للانسانية..

هلق صارت الحقيقة مش مهمة، لان اللي راحوا مش ولاد عالم، كيف بتقدروا توقفوا عالمرايا كل يوم الصبح، كيف تقدروا تطلعوا بوجوه اولادكم؟ مين بدنا نسمي لنسمي وديما جمالي ما بتعرف هي ع شو وقعت، وسامي فتفت ما كان منتبه، بس انتبه بعدين انه بعده شاب والعالم بتنسى وما معقول يخسر الكرسي بالقليلة يضاين دورتين بهالمجلس ليضمن المعاش على العمر الباقي.. ومتل ما قالكم ساحر المجلس وسائر الدوائر ايلي الفرزلي الانسحاب الكلامي ما بيبطل التوقيع..

الاهضم من كل هيدا صارت المعركة هلق مع القاضي بيطار ليه بده يعرف ويحاسب اللي سكت عالتخزين يروح يحقق باللي جاب النيترات ع لبنان ويقول ع صوت عالي.. ما المصيبة يقول هالزلمة مين اللي جاب النتيرات كمان ما يعجبكم.. بعدين يا جماعة هو قاضي التحقيق افهم من سليمان بيك والسيد احمد الحريري والرئيس الكبير سعد الحريري وغيرهم اللي صاروا بدهم يعلموا شو يعمل وشو يقول، طب في مجال مثلا تجربوا تعملوا شغلكم انتو وتنجحوا بشي قبل ما تعلموا القاضي شو يعمل؟ شو كان صار لو عملتوا متل البطل القومي جان قهوجي ونزلتوا؟ اكتر شي كان صار تأجيل الجلسة او بسبب اضراب او انقطاع كهربا او اي شي تاني.. او فيكم تعملوا مؤتمر صحافي متل الوزير السابق انت عارف حالك مع مين عم تحكي؟ وتعترفوا انكم ما كنتوا بتعرفوا شو يعني نيترات وفي عالم ممكن تصدقه لان اصلا وزير الداخلية بلبنان هو وزير توزيع نمر سيارات ورخص سلاح وفوميه وكل ما كان كريم كل ما بتكبر شعبيته وحاشيته حتى الاعلامية منها للدفاع عنه

بموضوع الحكومة، هلق صار التيار العوني بده نواف سلام، يعني عند العونيين في صفتين بيمشي هيك in parallel الوقاحة وقلة الضمير، لان يوم اللي انطرح نواف سلام من اشهر ما كان عاجبهم، بس بطل في اصلا حدا واقف ع اجريه صار بدهم اياه قال شو هني متميزين عن حزب الله بالمواقف وعلى الغرب انه يصدق هيدا الشي وعلى المسيحيين انهم ما ينسوا اللي عم يدافع عن حقوقهم بوجه غطرسة سلاح حزب الله..

وانه طرح اسم نواف سلام ليبين انه جدي لان تخايله يدعم فيصل كرامي.. هو جي بي ما بيقبلها تجي شخصية هلقد فذة تغطي عليه.. ونجيب مقياتي غير انه المآخد عليه اطول منه كمان جبران ما بحبه لان هو ضد الفاسدين وما ممكن يجيب حدا يغطي عليه بالفساد

هلق للامانة مين ما يجي بهالحكومة ما رح يفرق يعني حتى لو اجا عبد الرؤوف المنفلوطي شو رح يطلع بإيده؟ ونحن اساسا علقانين بإيدين الريس الكبير ال ميني مرشد جبران اللي لا بده يسمي ولا بده يشكل ولا بده يزيح من درب المشكلين.. وما تستقلوه لجبران هو شي كتير قوي وما بخاف لا ممن سلاح ولا من متسلحين.. على اساس العالم هبل وبعض ما حفظت اللعبة تبع بناء الدولة ومكافحة الفساد وحقوق المسيحيين اللي بتنقح عليهم كل ما قربت الانتخابات

نحن على كل حال بين التيار والحزب مع اللعب الحلو.. عم نتفرج ليه شو عنا لا بنزين عنا ولا مازوت ولا كهربا ولا مي.. بمين بذكركم هالحكي؟ قال هيك في شعب عم يتظاهر كرمال نفس المطالب مين يا ترى؟ الشعب الايراني ليه مستغربين قل لي من تعاشر اقل لك من انت.. طلعوا بحالتنا نحن محور الممانعة المنتصر من ايران للعراق لسوريا وصولا على لبنان والله حياتنا كلها مشعشعة كرامة وعنفوان.

على الهامش كان ناقص بلد متل لبنان تويتر، انه آخر شي ١٠ سنين مننطر البصارين على التلفزيونات كل اول سنة ليخبرونا شو بده يصير.. هلق عايشين مرحلة تفسير التويتات متل تفسير الاحلام، بس قولكم شو قصد السفير السعودي بتغريدته؟؟

على الهامش الدولار نزل بس هيدا ما بيعني ان سعر الاشياء نزل ما التاجر اشتراه عالغالي.. ولما بكون الدولار عالي ببيع بأعلى ليه؟ ما بلكي ارتفع الدولار اكتر كيف بدي جيب بضاعة جديدة.. يعني مؤشر واحد للاسعار بلبنان طالعها طالعا والرب الراعيها.. و كل ما توجهت جنوباً بالبلد كل ما الوضع بسيء واقع الكهربا والبنزين والمازوت وخلافه.. بظن هيدي مكافأة أشرف الناس اللي كل عمرهم يتهجروا ويتحملوا معكم قررتوا تردوا لهم الجميل بدعم الفاسدين والفساد وتدمير الدولة وشو ما بيقى لها وانتبهوا البلد مفتوحة على أنواع مختلفة من الهيمنات الخارجية والداخلية ما تعطوا فرصة للعدو المتربص بانجازاتنا خصوصي اننا قريبا رح نصير مادة دسمة لاعلانات اليونيسف مع الرنة تبع اربعون الف طفل كل يوم يموتون

قبل ما اختم اذا بدكم كشف حساب من البنك بحسب تعميم كبير اللصوص بتمضوا تعهد انكم بتعرفوا انه تم الاستيلاء على اموالكم وانه ما فيكم تتصرفوا فيها بتحويلها للخارج بالاضافة لانه بدفعوكم عن اول ورقة ٧$ فريش للحساب الفريش و٣$ عن كل ورقة تانية اما الحساب المنهوب اصلا فبياخدوا كمان نفس ال ٧$ و ٣$ من اموالكم المنهوبة اصلا

ان شاء الله موت اذا عم كذب بس قال كل البرامج السياسية النقدية والجدية والساخرة عم تاخد عطلة بالصيف طب في حدا يحكي لنا مع الانهيار انه ياخد هو اجازة كمان طالما ما في حدا يحكي عنه؟ خليني ساكتة