خليني ساكتة ١٠٧ - ٤ آب ذكرى وجع ما بينتسى... لعنة رح تلاحقكم بمربعاتكم الامنية!

خليني ساكتة

تم النشر في 31 يوليو 2021


٤ آب مش ذكرى بتنقضى بيوم عطلة رسمية بيتكرم فيها رئيس الجمهورية علينا

٤ آب ما لازم يكون يوم حداد وطني طالما بعد ما بينت الحقيقة

وطالما بعدهم المشتبه فيهم بالتقصير عم يدوروا من شاشة لشاشة يوزعوا علينا اعذار ومواعظ كيف ندير التحقيق بدل ما يكونوا من اول يوم قدموا استقالاتهم وهني وضعوا انفسهم تحت التحقيق

٤ آب صرخة وجع ما بينتسى

ذكرى شاهدة على اجرام السلطة الحاكمة اللي امعنت بقتلنا ع ٣٠ سنة ومن بعدها سامحت حالها غسلت ايدها من دم اهلنا وشلحت تياب الميليشيات رشة بارفان واجت تحكمنا من جديد

٤ آب هو ذكرى مجزرة ارتكبتها منظومة النيترات بحق مدنيين آمنين، منظومة اهمال لا متناهي بدل ما تكشف المقصرين والمسؤولين تكاتفت مع بعدها وعملت سد منيع ضد استجواب ومحاكمة المتهمين

المتهمين بجريمة ٤ آب معروفين بالاسم وهني مش بس

جان قهوجي

نهاد المشنوق

كمان لائحة المتهمين بتشمل الرئيس ميشال عون شخصيا

وامين عام حزب الله السيد حسن نصر الله شخصيا

والرئيس سعد الحريري شخصيا

والرئيس نجيب ميقاتي شخصيا

والرئيس نبيه بري شخصيا

وكل نائب مضي على لائحة العار

اللي ما عنده بهيدي الجريمة مسؤولية جرمية عنده مسؤولية معنوية ولا واحد منكم طلع قدم اعتذار للشعب اللبناني طلعتوا تلعبوا دور المفجوعين والمتفاجئين قبل ما ترجعوا تتكاتفوا ضد اهالي الضحايا

مجموعة من الاهالي العزل اللي لحد اليوم ما في بمراكزكم الرسمية لائحة كاملة واضحة باسماء الضحايا اللي انقتلت بعد سنة من الجريمة في خلاف على عدد الضحايا هو ٢١٤ او ٢١٥ او ٢١٨

اهالي دفنت اشلاء اولادها ما بتعرف اذا حقيقة هول هني بس بسبب فشلكم بإدارة الانفجار واي شي تاني بالبلد كانت العالم معلقة على امل تلاقي شي من اهلها

بعد سنة على جريمة العصر حولتوا العالم لشحادين بتبعدوا كراتين اعاشة لمنكوبي الانفجار بعد ما سرقتولهم اموالهم وقفتوا لهم اشغالهم وقتلتوهم ببيوتهم

وبدل ما تعتذروا وتقدموا المرتكبين والمقصرين للعدالة احتميتوا بحصانات ساقطة بحكم الرأي العام مش بس حصاناتكن ساقطة بحكم الرأي العام انتو كمان ساقطين ما تخلوا مجموعة المطبلين اللي حولكم تغشكم وتفهمكم انه بكم مقال ومقابلات ومؤتمرات صحافية رح يتغير الوضع والعالم رح تتقبلكم

غطرسة هيدي المنظومة عم تزيد لانهم صاروا يعرفوا انهم عم ينازعوا ورح تزداد شراستها كل ما تقرب الانتخابات والدليل تعاملها بالملف الحكومي وكيف عم ترجع تجتر حالها، يوم بتسمي الفاشل ويوم بتسمي الفاسد واصلا ما ممكن يكون غير نتيجة طالما الفاشل والحرامي والفاسد هني اللي راعينها متل ما هني مسؤولين عن تمييع التحقيق بجريمة العصر وعم يبدعوا بأشكال من الحمايات والحصانات والتبريرات اللي بتزيد من بشاعة مواقفهم

بعد سنة على تفجير الناس ببيوتها منظومة النيترات عم تتحول لسلطة قمعية ما قادرة تحمل صرخة من اهالي الضحايا

بعد سنة على تفجير المرفأ إجرامكم عم ياخد الوان جديدة بس اي لون بتاخذوه ما رح يقدر يمحي لون دم الضحايا اللي على ايديكم

بعد سنة على جريمتكم عم تزيدوا على ارتكاباتكم تزوير للحقائق وحماية للمتهمين ودم اهالي الضحايا بعد دم اولادهم

اجرامكم عم بزيد لان الطبع بيغلب التطبع انتو مجرمين وميليشيات ومقاتلين ما بتقدروا تكونوا دعاة سلام او بناة دولة حقيقية، رح تبقوا مخبايين بمربعاتكم الامنية وحولكم مجموعة مناصرين المنومين طائفيا وحريصين على زعاماتكم الريعية لان ما اعطيتوهم الفرصة يعرفوا شو يعني يعيشوا كمواطنين بدولة حقيقية مش مجموعات خايفة من بعضها وعم تحمي حالها من التانيين

٤ آب لعنة رح تلاحقكم وتكشف حقيقتكم النعوش اللي انحملت بعده دمها ما برد وهي المسمار اللي اندق بعروشكم ٤آب لعنة رح تلاحقكم كيف ما بينتوا وجهكم بالعلن رح تلاحقكم انتو وعم تمشوا وانتو وعم تاكلوا وتسهروا وتسافروا ورح تلاحقكم بأعراس اولادكم ورح تلاحقكم لآخر يوم بأعماركم

بعد سنة على تفجير ٤ آب منوعدكم ما رح ننسى وما رح نسامح ليتحاكم آخر واحد فيكم ويومها بس رح نمسح دموعنا ونرفع صوتنا ونقول للي راحوا انه اخدنا حقهم وانه ما بقى رح نسمح لسلطتهم انها ترتوي بدمنا ودم اولادنا… خليني ساكتة