خليني ساكتة ١٠٨ - في قضايا اعمق واسمى من المطالب السطحية... ببناء بلد !

خليني ساكتة

تم النشر في 8 أغسطس 2021



بعتقد سمعوني بأكتر من حلقة عم قول شو بدي احكي والمشهد هو ذاته وما في تغيير

وسامعين العالم كل الوقت عم تنق ما في كهربا ما في مازوت ما في بنزين ما في دوا

قالوا بيرتقوا فينا لقضايا اسمى بيرفعونا للمستوى اعلى من الانشغالات اليومية السطحية اللي كل يوم منلتهي فيها

هيك بيرفعونا عن قضايا عابرة متل انفجار لمرفأ لقضايا اعمق متل محاربة العدو

لان بيّن حقيقة يوم ٤ آب انه مجموعة ما بدي قول كبيرة وتسألوني كم واحد كنتو، مجموعة مش قليلة بتعتبر عدوها الاول هو السلطة المسيطرة على البلد واللي آخدي هالشعب رهينة، محددة عدوها الداخلية وعم بتطالب بإزاحتهم كلن يعني كلن قبل ما تلتف للعدو الخارجي

للامانة هيدا مشهد الوحدة اللي منطمح له ب ٤ آب، اللي عم بطالب بمحاسبة المجرمين وفقا للقانون، لان حقنا عندكم حق شرعي ولازم ناخده بالقانون مش بالتار لان نحن مش مجرمين متلكم ما منعرف نقتل ولا منعرف ننتقم، انتقامنا الوحيد اللي منعرف نترجمه هو بصناديق الاقتراع وهو بالتمسك اكتر واكتر بالقانون

اكيد هيدا المشهد ما بناسب اللي متلكم، وشو في سلاح اكتر فعالية عندكم من سلاح الطائفية وتقليب العالم على بعضها، السلاح الوحيد اللي بيرجعكم على اللعبة، السلاح الطائفي والحماية الذاتية، بزيح التكتيك القوات منفتحة على الجميع وهي داعمة لتحركات العالم للمطالبة بحقها اما بزيح الاستراتيجية القوات عندها واجب الدفاع عن الاحياء المسيحية وخصوصي اذا دخلها بعبع شيوعي لابس كوفية، اي ما هيدا بقلب مواجع الحرب الاهلية وما ممكن نتركهم يتكاتروا لازم تعليم الحدود on the spot، النكتة للصراحة ما بتستثني الشباب الشيوعيين اللي بحشرة ٤ آب قرروا يفرجوا انه هني الخط المقاوم الشرس وذكروا بتاريخ جعجع، هلق الملفت بالشباب الشيوعيين انهم ما بيسترجوا مثلا يهتفوا ضد اللي مارس القتل والاغتيالات بحقهم، هني وراجعين من عملهم المقاوم، وقرر يمحي تاريخهم يطمسوا ولا مرة اعترف فيهم لدرجة قبل تدمير معتقل الخيام من قبل العدو الصهيوني دهن زنزانة سهى بشارة واللي متلها من الشيوعيين للعالم ما تلاقي لهم اثر بس يفوتوا يزوروا المعتقل.

بالعودة للقضايا الاسمى، المقاومة ردت على العدو الصهيوني الغاشم، اللي رد على صواريخ ٤ آب، ونحن كلبنانيين صرنا نراقب الاخبار اذا معقول تتأزم الامور وتمتد لتصير حرب وترجع عيونا تقاوم المخرز، هلق للأمانة العدو الصهيوني الغاشم في حال قرر توسيع الحرب رح يكون بمأزق حقيقي هالمرة، لان بنك الاهداف تبعه غير واضح هالمرة، مثلا من شي ٤ اشهر كانا عم نقول اذا بدو يقصفنا بيقصف الاشتراك لان ما في كهربا، اي هلق صار اذا بدو يقصفنا لا عنا كهربا ولا اشتراك ولا بنى تحتية ولا حتى مستشفيات ولا حتى ادوية ولك حتى ما عنا حكومة يحملها المسؤولية قد ما وضعه سيء لمين مثلا بده يحمل مسؤولية لرئيس تصريف الاعمال او الرئيس المكلف او رئيس الظل اللي ساكن ببعبدا؟ حتى وزير خارجية يرفع شكوى لمجلس الامن ما عنا عنا واحد بالوكالة

انا شخصيا بعتقد انه الاسرائيلي ما باقي له شي يقصفه الا انه يقصف عمرنا نحن الشعب واحذروا شو كمان ما رح يطلعوا شي لإن عمرنا مقصوف خلقة على يد الطبقة الحاكمة. وبعدين مش عم بفهم هالانتقادات التافهة متل ما قال علي فياض على عملية اليوم النوعية من اطلاق الصواريخ من بين اشجار الزيتون

هلق نحن كشعب جريمة بكبر ٤ آب ما وحدتنا وبعد في عالم بتتهم اللي عم بطالبوا بحق الضحايا انهم تجار دم وقابضين مصاري، فما رح يوحدنا شي، وحقيقتنا هو منطق الحماية الذاتية من عرب خلدة للجميزة لأهل شويا وصولا للأشاوس اللي استقووا على بياعين التين بصيدا واللي استقووا على سواقين الفانات بعاليه

على الهامش الحكومة راوح مكانك هلق في عقدة المالية والداخلية وعلى فكرة انا بدل الرئيس عون ما برضى بأقل من الداخلية لان كيف يعني يترك المستقبل يسرح يمرح على عقود برخص السلاح والفيوميه، وهو لا، انا بقول ما تتنازل فخامتك حتى لو خرب البلد، هلق صح البلد خربان أصلا بس كمان ما تقبل تتنازل انت شفت كيف المجتمع الدولي قاتل حاله يساعدنا، لدرجة ما بقي رئيس دولة ما اثنى على فشلك وفشل السلطة الحاكمة بإدارة البلد. بس عادي اوعى الداخلية كتير اساسية في انتخابات عالابواب وما ادراك ما الداخلية بالانتخابات بالقليلة لازم تأمن ضهر صهرك اللي المنطق بقول اذا في شعب حر بشوف نقرة راسه وما بقى يشوف النيابة.

قبل ما اختم ما معقول ما اقطع على كبير اللصوص، اللي بكل ثقة بالنفس حضر قدام قاضي التحقيق، بلا محامين بلا شي.. شفته يا اصحاب الحصانات.. هيك الواثق من نفسه بيعمل يبلبط الباب بإجره بفوت بيعطي افادته وبيضهر مرفوع الراس شو هني اصلا ال ٣٠٠ مليون دولار وشو هي اصلا قضايا اختلاس الاموال، هيدا على ما يبدو تشابه تهم كيف في تشابه اسماء اي في تشابه تهم، هني استشبهوا بسويسرا انه الشي اللي عامله فيه اختلاس اموال من مصرف لبنان، لانهم هونيك معترين ما بيعرفوا انه صاحب النفوذ والمراكز هيك لازم يضحي لينهض بعيلته انه ما بجوز هو يكون حاكم مصرف لبنان ولا سمح الله رجا مش ملياردير.

ان شاء الله موت اذا عم كذب بس الشيخ نعيم قاسم. حذر العدو الاسرائيلي الغاشم من ارسال الرسائل عبر لبنان.. علما انه رئيسي اعتبر انه حزب الله أصبح نموذجًا ناجحًا وشاملًا لمقاومة الإستكبار، خلال لقاؤه بنعيم قاسم انا بقول انه بهالمعادلة بتطلع اسرائيل عم تبعت رسائل للنروج عبر لبنان ... خليني ساكتة