لكل لبناني بدول الاغتراب
لكل مغترب او منتشر او شو ما اسمك
لكل اجنبي زار لبنان ورقص ع ارضه او شرب من عرقاته او اكل من اكلاته
نحن ما بقى النا غيركم لا ما بدنا فريش دولار وقفوا بعت دولارات لاهلكم، وقفوا تجوا وتدوروا وتساعدوا وترجعوا تعوموا لوضع لكم يوم وكم اسبوع
كل اللي بدنا اياه منكم تظاهرات داعمة بكل دول العالم، عرائض لمجلس الامن الدولي، لمنظمة حقوق الانسان، لاي مرفق دولي ممكن يتدخل لحمايتنا من هالسلطة الفاشلة المجرمة اللي مستقوية بالسلاح
نحن شعب مخطوف نحن رهائن سلطة نصّابة ومجرمة، على رأسها رئيس جشع طماع مغرور كل عمره عايش على قاعدة انا او لا احد هلق صار صهري او لا احد
هيدا الرئيس بيأتمر بأوامر مرشد اعلى محلي بيطلع بوزع امر العمليات كل كم يوم، امر عمليات تحريضي مكشوف، كل الغاية منه يفرجي انه هو مستهدف بمؤامرة كونية، ليرجعوا يجتمعوا على نفس الغاتو ويتقاسموه
من الرئيس والمرشد بيتفرع حراس هيكل معفّن، بيتغذى على الطائفية والمذهبية والمحسوبيات والزبائنية
هيكل محروس برجال دين وبرجال اعمال وبرجال اعلام كلهم خطوط حمر ما عدا الشعب ذاته، طالما هني قاعدين ومتربعين وواصلهم الخدمة لحد عندهم ما في لزوم اي حدا ينهز
بعد الكهربا انطفت الموتورات ما بقى عم يطلع معنا الا انه ندعي عليكم اذا مفتكرين انتم انه كل هيدا القهر رح يمرق بتكونوا غلطانين هيدي القهر رح يجي يوم وينفجر ورح يطلع انفجاره اقوى من التفجير اللي عملتوه فينا ب ٤ آب الانفجار الاجتماعي رح يقبعكن من اصلكم
اي صرنا قليلين الحيلة لدرجة ما طالع بإيدنا الا ندعي عليكم، لإن ما بيطلع بإيدنا نكون مجرمين متلكن، عم نسلم أمرنا للقدر يساعدنا وياخد بإيدنا.. منرجع منراجع حالنا هيدا الموضوع ضد قيمنا ضد مبادئنا، نحن مع المحاسبة والقانون بس منطلع منلاقيكم متل الاخطبوط مسيطرين على كل شي والاخطر من هيك انكم بتطلعوا بتدعوا انكم مناصرين للشعب وانه ما بتقبله عليه الذل
وبيطلع غنمكم، يمعّي معكم على مواقع التواصل الاجتماعي ويبجل فيكم ويهدد بإسمكم لانكم انتو ربه الاعلى.. لا المشكلة انه قطعانكم مش غنم قطعانكم وحوش كاسرة بتنهش بلحم العالم وعرض العالم، وحوش ما بتتوانى عن ضرب أهالي ضحايا دم اولادها بعد ما نشف... وحوش تافهة مستمدة قوتها من المحسوبيات والاستزلام من هيك تمسكها فيكم لانها متل الطفيليات اللي بتنمى وبتعتاش من الفساد
اذا بدي احكي باللي صار هالاسبوع بدي اسبوع، لا بقى الواحد قادر يضحك لكم، ولا يسكت عن اجرامكم، ولا يسخر من عفنكم، انتو عم بتبيدوا شعب بكامله، وما ملاقيين في ضرورة لتشكيل حكومة تأطر اجرامكم.. وقاحتكم اذا انقاست بتسجل اعلى درجات على مقياس ريختر.. لا انتو منكم من صنف البشر، انتو بلا ضمير وبلا دم، حتى ما بتعرفوا تمثلوا انكم مع هيدا الشعب، اللي منكم قصروا مشعشع، واللي منكم ضامن ادويته واللي منكم مسكر مناطق تحت امره
خطوة رفع الدعم اللي قام فيها كبير اللصوص منستاهلها نحن الشعب، لان ما بعرف اي متى وكيف تحولنا لهيدي الدرجة من الترويض والخنوع، اي متى صرنا مجموعة من المذلولين بدل الوقوف بوج اللي عم يذلنا،
بيقطع البنزين منوقف بالصف، الخبز منوقف بالصف، المازوت، الغاز،الدوا... ومنتقاتل ومنتتضارب عالدور وعالواسطة.. لو كلنا صفينا سياراتنا بالشوارع وسكرناها بدل ما تقعدوا ساعات بالصف لتعبي نقطة البنزين.. لو بدل الفرن نزلنا على بيت الزعيم...
لا برأيكم اللي عملوا ثورة ١٧ تشرين واللي سكروا طرقات كانوا زعران وكانوا عم يقطعوا الطريق عالطايفة التانية وعملاء سفارات وقابضين ملايين الدولارات ما عم افهم.
اذا في شي منطقة، شي مذهب شي مجموعة ما عم تنذل وحامي طايفتها قاعد بنعيم يطلعوا يخبرونا منعذرهم منقول انه عم ياكل ويطعميكم..
مش هو عايش فوق الريح وعم يكب لكم العلف بكراتين اعاشة اي متى وتحديدا بأي مرحلة من عمر الشعب العظيم تحول لشعب خانع خاضع.. المقاومة الوحيدة المشروعة والمقاومة الوحيدة الشرعية هي محاربة هول الطواغيط اللي حاكمينا..
المصيبة كل الديكتاتوريات بثور شعبها ضد طاغية واحد الا نحن عنا بكل طايفة طاغية واكتر ، وبيستمد قوته اولا واخيرا من خبرته بسفك الدم، كيف بدنا نوقف ونقاوم خبراء بالميليشيات، رؤوساء احزاب تناحرت وعمدت سلطتها بدم من طايفتها قبل ما تروي عطشها بدم من الطايفة التانية، كيف ممكن نوقف بوجكم نحن اللي اكتر شي عنا كلمتنا وحلمنا الساذج بإننا نعيش مع اولادنا ببلد شبه طبيعي في اقل مقومات البشر؟
تسماية واحد منكم بس مش ظلم اله ظلم النا، تسماية واحد منكم بس عيب علينا، تسماية واحد منكم بس عار علينا تلطيخ لضميرنا.. لان كلكن يعني كلكن وكل واحد من احزابكن تعاقب على وزارة او اشتغل بمرفق عام مسؤول عن اللي وصلنا له
ان شاء الله موت اذا عم كذب بس بين كلمة وكلمة حكيتها اليوم في دعوة وفي تمني بإنكم انتو واولادكم واولاد اولادكم ما تشوفوا الا الذل اللي عم بتذوقونا اياها كل يوم والقهر اللي عم تعيشونا اياه كل يوم والخير اللي عم تعملولنا اياه كل يوم.. لان نحن ما النا ذنب ولا اولادنا الهم ذنب ولا اولاد اولادنا رح يكون الهم ذنب .. خليني ساكتة
