خليني ساكتة ١١٠ - "حصار".. ما في، وجبران باسيل.. مش "أقلية"... ليه؟!

خليني ساكتة

تم النشر في 22 أغسطس 2021

ما هو حصار البلد؟ حصار البلد هو الوقوف في

منافذه ومنع الدخول إليه او الإحاطة بالشيء ومنع النفاذ إليه

بعرف انه تفسير الحصار ببين اصعب من الكلمة نفسها بس شو ما كان التفسير الشي الاكيد انه الحصار ما ينطبق على وضعنا بلبنان

ليه؟

لإن نحن مرافئنا مفتوحة مطارنا مفتوح طرقاتنا مفتوحة معابرنا الشرعية مفتوحة وغير الشرعية مشرعة على مصراعيها

بس اكيد عم تسألي ليه ما عنا بنزين ومازوت

ليه؟

لان ما عنا مصاري نشتري

ليه؟

لإن الدولة مفلسة

ليه؟

لإن الحكومات والنواب والزعما سرقوا البلد

فلما الدولة تلاقي شي تنصيبة تفتح فيها الاعتمادات متل رفع الدعم الجزئي او المنصة، المحروقات بتتوزع على الشكل التالي شي ٥٪ بتنابع بشكل طبيعي، والباقي بيتوزع على التهريب والتخزين والبيع بالسوق السودا.

هلق المنطق بقول انه العين الساهرة متل الجيش والامن العام وغيرها من مجموعات المداهمات التي قدرت تصادر ملايين الليرات من البنزين والمازوت وين كانت قبل وقوع البلا؟ بس يللا ان تأتي متأخرا افضل من الا تأتي ابدا

خلينا بالمهم، الوضع اسوأ من انه ينوصف، وكإننا وصلنا الى ما بعد بعد جهنم، وبعدنا ماشيين.. وبهالمشوار في كتير اشيا اخدت حجمها الطبيعي، منها القدرة الشرائية للبناني وسعر الدولار ورفع الدعم

لإن نحن كبلد كنا عايشين وهم تاريخي.

من بعد الحرب الاهلية لما تقاسموا البلد على قاعدة بتغطي لي فسادي بغطي لك اجرامك.. هيك نحن ضهرنا من الحرب بلعبة وكذبة من مجموعة المتحاربين بالاضافة للرئيس الشهيد رفيق الحريري الله يرحمه لما حط ايده بإيد رجال المافيات الله يطول بعمرهم.

يعني كيف منزين سفرتنا بجاط خضرة، اجا رفيق الحريري مش مشارك مباشرة بالحرب وما عنده مقاتلين وجهنا الاضواء عليه، وتحول البلد سنة بعد سنة لمجموعة من التحايلات الاقتصادية والنقدية والهوبرة اللي بتحاكي بريستيج اللبناني، وبتعطيه هيدي الدفعة من العنجهية الفاضية اللي يتغذي الخسة اللي مزروعة براسه على اساسه الفينيقي وانه الله خلقة وكسر القالب.

بالعودة للحجم الطبيعي مش بس ساعات التغذية والبنزين والمازوت تقلصوا كمان جبران باسيل رجع ياخد حجمه الطبيعي، للاسف ما عندي فريق اعداد يطلع كم مرة بهال٥ سنين ذاللنا وهو يهتنا انه هو صاحب اكبر تكتل نيابي واقوى تكتل نيابي وانه قوة العهد تنبع من قوة التكتل القوي، لدرجة وصلت معه يجرفنا، وفجأة وبس ما بقى عنده ولا كذبة يتحفنا فيها صار بده يطلع يبكي وينوح معنا، وصار اقلية

اقلية؟ اي انا معك انت اقلية بالانجازات اقلية بالحلول اقلية بالعازة بس مش اقلية بالهدر والفساد والفشل.. قال الكون عامل عليك مؤامرة؟ وخصوصي الاميركيين؟ ايه ما هني غيرانين من انجازاتك بوزارة الطاقة وبالسدود وبوزارة الخارجية، انت ناسي انه ما في شي زبط معك الا زيادة عدد عقاراتك

لاااا وعم تهدد تستقيل.. يللا يا شاطر شو ناطر روح استقيل من المجلس ما هو عم يعرقلك وما عم يخليك انا محلك بستقيل ما تهدد استقيل اقلب الطاولة على راسه لبري، او ماا الك قلب تضحي بآخر سنة من اسم النائب لانك عارف ما بقى تحلم فيها؟

ما سمعته؟ شو قصده باللي بده يستقيل يستقيل؟ من هيك استعملت كلمة اقلية لانه متلك متل قلتك؟؟

وبالحجم الطبيعي منكمل حتى الاهداف الاستراتيجية اخدت حجمها الطبيعي من تحرير القدس، ل escorting باخرة فيول ايرانية، والشعار اللي طبلتونا فيه مساحة لبنان ١٠٤٥٢ + باخرة مش صحيح

ليه؟

لإن اذا بدكم تحكوا سيادة بتكون المساحة ١٠٤٥٢ + باخرة - سما

ليه؟

لإن متل ما شفتوا كل عمرنا صندوق بريد لسوريا، من كم يوم صارت سوريا صندوق بريد النا ونحن وسوريا صندوق بريد لإيران

بس لما تفهموني غلط انا مع انه المرشد الاعلى المحلي يجيب المازوتات، اذا بتنحل المهم ما نتحول من طوابير الذل لطوابير الكرامة بس لإنه جنسية النفط تغيرت، ويا ريت يعطي الموضوع حجمه الطبيعي كمان، ويعترف انه السكوت عن الفساد وحمايته هو المشكلة وانه النفط مفقود مش بسبب الحصار

ليه؟

مفقود اولا بسبب التهريب وتانيا بسبب التخزين اللي اللوائح بتبين انه عم بصير على قاعدة ٦ و٦ مكرر وما في ولا حزب ما بالل ايده بالبنزينات، واكد اكيد لان كل حزب ع قد حجمه حزل العزة والكرامة فاحة ريحته

على الهامش، الهجوم على ال ngos وتمويل المجتمع المدني، وانه هول الاغنياء الجدد انا بدي اسأل وليد بيك وبعض الاشخاص اللي حاملين هيدا الموضوع وماشيين لحد ما غزيتوا له الفكرة للمرشد المحلي، وقدمتوا له اياها فقرة فقرة خاصة بخطابه، انك تكون nouveau riche بعرق جبينك احسن ما تكون nouveau riche من البيع بالسوق السودا، او ارستقراطي قديم من مغانم الحروب. وبعدين في شي بموضوع العمالة مش دقيق وما بينطبق على اللي عم يشتغلوا مع الngos

ليه؟

لان اللي عامل جمعية توزع دوا، او تبني مدرسة، او متنفس لاولاد صغار، او برنامج يشكف فيه فساد هيدا مش عميل، العميل هو اللي بنفذ اجنادات بتضر بمصلحة بلده لصالح بلد آخر وسياسة بلد آخر

ان شاء الله موت اذا عم كذب بس اللي عم بعانيه الشعب الايراني بشقيه السلطة والمعارضة، هو بسبب ايران يعني بلده وارضه. اللي عم بعانيه الشعب السوري بشقيه السلطة والمعارضة، هو بسبب سوريا يعني بلده وارضه. بس اللي عم بعانيه الشعب اللبناني بشق الشعب بس لان السلطة آخر هم على قلبها، هو بسبب المحاور الخارجية يعني كرمال كتير بلاد وجنسيات بس مش بسبب لا بلده ولا ارضه..

ليه

خليني ساكتة