خليني ساكتة ١١١ - منيح اللي ما كنّا أميركان!!

خليني ساكتة

تم النشر في 29 أغسطس 2021


هلق هو عادة في تعتير

وفي شحار

بس اللي نحن عايشين فيه هو شحار وتعتير مع sauce بطعم الانهيار

خلطة بتليق ببريستيجنا كمتحدرين من اصل فينيقي، كمخترعين للحرف، كارباب للون الارجواني، كقادة لمحور النصر والانتصار

للحقيقة منيح ما كنا اميركان، تخايلوا كنا اليوم مثلا عايشين بنيويورك او واشنطن او فلوريدا وبلدنا مهزومة شر هزيمة بأفغانستان وخصوصا ان ما نشهده بأفغانستان هو مشهد كامل لهزيمة أميركية كاملة ولسقوط وفشل أميركيين كاملين.. لو كنا اميركان هلق كيف كنا رح نفرجي وجهنا للعالم، وشعب من الشعوب عم يتعلق بدواليب طياراتنا ليروح يعيش عنا؟ المشهد اللي على وجعه بيعني باللغة العامية دخيل اجريكم خدونا نعيش عندكم..

بس لا نحن اللبنانيين مش بس اقوى من اميركا ومحورها حتى اننا مرتاحين على وضعنا لدرجة منقعد مناقش ومنخطب ساعات عن الوضع بافغانستان، ومنركب الشنغل عالبكرة لتصير الرواية السياسية من افغانستان لداعش بتليق بتبريرات خوض المعارك الكبرى والصغرى.

من الملفت انه هالايام المرشد الاعلى مكتر اطلالاته علينا يبدو انه البوصلة مسوكجة عم بتضل تشطح بيضطر يتطلع يصوبها كل كم يوم.

بطالعنا لنا بقصة مثلا الاميركان عاملين حصار بلاقي العالم ما كتير قبضتها، بيطلع بال ان جي اوز اللي بتقبض، بتمشي تراند شي ساعتين ع تويتر وبتهدى، بيطلع بالبواخر بلاقي العالم عم تذكره بالتهريب، هالمرة طالع ليفسر كيف قانون قيصر حصار على لبنان وبيمنع اللبناني انه يستثمر بسورية، على اساس انه هلق لو ما في قانون قيصر كانوا اللبنانيين بالطوابير عالاستثمارات.. ما يا سييد الكل بيعرف اراضي القصير باسم مين من اللبنانيين صارت ويعني مش كتير بهمكم العقوبات.. غير انك انت آخدنا كلنا دكمة على العقوبات، الا اذا معتمد على انه عون البيت الابيض رح يضل ساكت لك

ما بعرف اذا منيح انه المرشد الاعلى المحلي يخصص لنا وقت بالداخل بس يخلص من الامور العالمية، او مش منيح.

هلق السيد بحب الحقيقة وبده اياها بس المشكلة بالقضاء، اي قضاء ما بعرف يمكن تبع القدر، لان في مشكلة بالقضاء الدولي ولما اجا القضاء المحلي يحكي شي مش ع خاطره كمان طلع فيه مشكلة.. النكتة انه عم يستنجد بالقضاء ليتوقف بوج القضاء المسيس طب مثلا اذا الجهات القضائية طلع عندها ضمير وقالت شي مااا عجبك شو بصير؟

المهم انه قال باللي طالبوا فيه رؤوساء الحكومة السابقين والمفتي دريان شخصيا اللي دري بشي وطلع حكي فيه، واللي منكم هلق بينكر هيدا الانجاز لحسان دياب حقيقة بدي ازعل منه، انه صار في اجماع وطني عليه لحسان دياب، هلق للامانة في شي واحد صح بكل هالبيانات هو كلمة مستضعفينه، لان تخايل القاضي بيطار طلع مذكرة جلب بحق فينيانوس ما بدي كبر الحجر وقول مثلا اللواء عباس ابراهيم لا سمح الله، شو كان صار؟؟

للصراحة عبالي اسمع المكتب الاعلامي لرئاسة الجمهورية اذا برد على خطاب المرشد، بس اكيد ما برد لان الرفض جاية من باب الحرص عالدستور ومين حريص عالدستور وحقوق المسيحيين اكتر من الرئيس

وحرص المرشد المحلي تماما متل حرصه عالدولة وانه الدولة لازم تاخد دورها والاجهزة الامنية وهيك.. شو بتطلع النتيجة بيتحمس واحد متل حمد حسن بداهم بصادر بأنب وشو بصير؟؟؟

اي اي بس هيدا الموضوع مش بس حمد حسن بيعمله، لان ممكن يطلع لك واحد، بوظيفة نائب متل جورج عقيص ويقل لك

اذا بتريدوا ما تفهموه غلط، هو عم يرسم زيح التكيك بالقوات، اللي بالاستراتيجية اخد على خاطرها من سيزار معلوف لما قال لشيا صح النوم، بس ما زعلوا ولا نكزة صغيرة من ابراهيم الصقر؟ نتوفة؟ نقوطة؟ ولا من عقيص؟ انه هيدا مش المفروض نائب عن الامة وبمثلكم؟؟

لا بد من اننا نلعبها ٦ و٦ مكرر لنضيع الطاسة.. ضروري نعيش على قاعدتين شو وقفت عليه؟ وليه هيداك ما بتحاسب؟ حتى دايما يطير اي تحقيق وتطير اي محاسبة ويطير اي امل ببناء بلد.

المهضوم انه ابراهيم الصقر ما قدره يلاقوه المعلومات مع انه بعده عم يغرد.. تخايله لو المغرد مثلا شاتم شي مقام بالبلد ومعرض السلم الاهلي للخطر بشي مسبة لشي زعيم

شو بدنا نتخيل خلينا بالواقع، اول شي اللي بعده عم يحضرني بحب قل له الحمدالله على السلامة، يعني he or she survived اسبوع كامل بهيدا البلد لان للأمانة اللي ما شايفنا كشعب على المحطات ما شاف شي بعد، انه مش قصدي شايفنا على التلفزيون لا شايفنا بالعين المجردة عايش معنا اللحظة، وخصوصي الخوف من انك تسقط شهيد شي مشكل على محطة البنزين، شفتوا ليه وصلنا عالشحار لان الموتة على باب المستشفى كانت اكلس..

بس نحن منستاهل هيدي نتيجة ركضنا وتعلقنا بالاميركان لو كنا مناصرين لخط الممانعة ما كنا وصلنا لهون، بس هيدا عقاب الارض علينا قبل السما، لو منسمع كلمة تيار الافقار والتعتير والمحسوبين عليه متل السيدة المشعشعة اورور فغالي مش منحط حالنا بمواقف بايخة او خطرة

هلق بيطلع حدا وبقل لي انت ما شايفة الا التيار بتسترجي تحكي عن نبيه بري؟ وعن سمير جعجع؟ وعن ضراب الطبل؟ لا انا بصراحة بقول انا ما بسترجي قول انه نبيه بري وسمير جعجع مجرمي حرب، وانه بري من مرحلة الترويكا بعد الحرب من ابرز المشاركين بالفساد، لا بقدر احكي كلمة عن ال ٥١٪؜ بالجنوب ولا عن ال ٧.٥٪؜ عمولات بالمالية، ولا بقدر قول انه لاعب سياسي واقتصادي بكل مشاهد البلد المعتر شو عامل؟ وبعدين بس ينزلوا يتظاهروا حدوا بيستقبل العالم بالورود ما بعمروا حمى مجرم، من اول ما دخل المعترك السياسي بيحكي كلمة الحق حتى لو بتنطبق عليه،

ولو بتجيبوه رئيس مجلس نواب بس لسنة كنتوا شفتوا كيف بيتحسن البلد

على الهامش بالمسلسل اللي عايشينه، بيخرق الحبكة الدرامية كل كم يوم لقاء بين ميقاتي وعون، وواحد بيرضى وواحد بيحرد، واحد بيتفاءل بحذر بيرجع بيتشاءم بتروي، وواحد بيتشاءم باندفاع بيرجع بيتفاءل بزخم، بيطلع الدولار الفين ليرة بيرجع بيهبط هبوط حاد ٦٠٠ ليرة قبل ما يستقر لشي ٣ ساعات

ان شاء الله موت اذا عم كذب بس انا ممكن افهم طمعكم وقرفكم واستزلامكم وحتى وقت تسمعوا عالم عم تقول رح نموت الجوع او رح نموت القهر .. بس درجة حقارتكم ووضاعتكم توصل لانكم تشوفوا حقيقة العالم عم بتموت لان ما عندها دوا وتبقوا مخزينيه لانكم مدعومين من سياسيين افسد منكم وما ينهز ضميركم؟

خليني ساكتة