خليني ساكتة ١١٢ - ... وأخيراً عرفنا مين المسؤول!!

خليني ساكتة

تم النشر في 5 سبتمبر 2021


وأخيرا عرفنا مين المسؤول

صار لنا اكتر من سنتين ورايحين بهالمنحى الانحداري وما عم نلاقي مسؤول واحد يتحمل المسؤولية بأي شي

يوم بكون قادرين يوقفوا البلد على اجر ونص بمناصرينهم وشعبيتهم واكتريتهم ويوم بكونوا ما خصهم ولا دخلهم وشي ما خلوهم وشي عم يستفردوا فيهم وشي محروم وشي مظلوم

بس صارت سهلة انا AKA تيما رضا المسؤولة عن كل هيدا، عن التهريب عن التخزين عن الفلتان الامني عن ارتفاع سعر صرف الدولار عن طوابير الذل حتى عن تأخر وصول الباخرة الايرانية اللي ناطرينها ع أحر من جمر

هلق بصفتي شو عم بتحمل المسؤولية؟ او بصفتي مين؟ مش مهم لان يبدو تأثيري على الارض قد تأثير هالزعما الموجودين، الفرق الوحيد بيني وبينهم انه ما عندي زعران يضربوا ويسرقوا ويبنهوا ويكروا ومرات يقتلوا

الفكرة ببساطة اذا انت كزعيم اكبر كتلة نيابية، او مدافع عن حقوق المسيحيين، او انت حامل الامانة عن الشيعة، او انت راعي الطايفة الاول، والكل بأمر اصبعك، يعني حكيكم وخطاباتكم ووجودكم بسدة المسؤولية اله نفس التأثير الفعلي لحكيي وتأثيري بخليني ساكتة

يعني في شغلة من اتنين او انتو وزعاماتكم اقل من اجر كرسي بهالبلد وبالتالي لازم تسلموه لحدا يطلع من امره شي. او بالقليلة يحاول

او انا مقصرة بمسؤولياتي ولازم اتنحى

بس هيك كل واحد فيكم بيخطر عباله ينق نقه بيطع عالهوا هيدا حكي سوشيل ميديا، تماما متل ما غنمكم بضل عم بهاحم اللي بيحكوا ضدكم على مواقع التواصل الاجتماعي.

والفرق بينكم وبين اي اتنين عاملين مشكل بالطريق انه في وراكم وسائل اعلام بتغطي لكم مشكلكم مباشر.. وبغياب قائد الاوف اوف اوف بعطلة صيفية، بيطغى صوت سالم الزهران مثلا بصرح، بوضح، بأكد، بيثني، وآخر شي بيطلب من حسان اكبر انجازاتي شو يعمل.. يعني بالقليلة حدا عم يطلب من حدا شي بحسم

في الرئيس عون كمان بصفته رئيس طلب عقد مؤتمر يدعم القطاع التربوي، ومن قبل كان طالب مؤتمر يدعم القطاع المصرفي، وكل كم يوم بيطلع بيطلب مؤتمر دعم، شو سهل تكون رئيس بلد متل لبنان هيك باختصار شديد اللهجة بتصير شحاد برتبة رئيس على شعب برتبة متسول

هلق هالاسبوع شهد اطلالة البدر، الرئيس نبيه بري، اللي اطلالته مدروسة وقليلة، بس طلع ليخبرنا اللي كل اسبوع عم يخبرنا اياها المرشد الاعلى المحلي وخصوصاً في موضوع التحقيق بإنفجار المرفأ، هو من سخرية القدر حقيقة الكلام عن التحقيق بذكرى تغيب الامام موسى الصدر، يعني منتقد القضاء الليبي والتحقيق الليبي باخفاء الحقيقة وتمييعها.. بس كمان منهدد القضاء اللبناني والتحقيق اللبناني لانه عم يجرب يوصل للحقيقة بوصفه عم يعتدي عالدستور وانه مسيس... المصيبة بالتحقيق بقضية المرفأ انه هو بالفعل مسيس بس مش للاسباب اللي عم بتبيعوها للعالم، لان ببساطة كل المتهمين فيه سياسيين او بيشغلوا مناصب سياسية او مغطايين من قبل الطبقة السياسية، طب من وين بروح بجب لكم عالم ما خصهم بالسياسة يتهمهم؟ طب ركبولنا لائحة بالاشخاص الي بتحبوا تتهموهم واعطونا لنجب لكم القاضي اللي بفصل لكم اياها ع قياسكم او منطلع عفو عام من حطها ورانا، لان ما بقى في وقت نضيعه، لان كل وقتنا اللي بدنا نضيعه مستثمرينه بالحكومة وباللقاءات بين الرئيس المكلف والرئيس عون، وعلى ما يبدو قد ما في وقت فاصل بين هاللقاءات كل ما يطلع نجيب ميقاتي على بعبدا بكون عون نسي الاسماء اللي اعطاه اياها منرجع منبلش من الاول.

هلق بنص هيدا الوقت بيقطع اخبار بتشبه انه رياض سلامة عم يكزدر ع فرنسا بشنطة فيها ٩٠ الف دولار، هلق ما بعرف قديه دقيق الخبر بس صراحة اللي كاتبه عينه ضيقة، هول pocket money لكبير اللصوص ما بينحكى فيهم

وهلق فايتين كلنا سوا بتحليل لتعميم ١٥١ وهل سيرفع سقف السحوبات او لن؟ هل سيرفع الدعم او لن؟ هلى سنطلق البطاقة التمويلية او لن؟ كل هيدا من الاخر عنده نتيجة وحدة المزيد من الانهيار فالانهيار فالانهيار لان ببساطة كلها قرارات اعتباطية عم تتاخد من قبل شلع من النواب والمسؤولين اكتر شي بيفهموا فيه شد العصب الطائفي والشعبوي فلتتداول وسائل الاعلام اسمي ليومين وعلى الدنيا السلام

على الهامش بما انه حتى اللواء ابراهيم شخصيا فشل بالمساعي بتشكيل الحكومة،لحد هلق ، وهيك كرمال قيمته يعني، لان مسيرته عابقة بالانجازات، يا ريت يتوسط لنا عند نقيب الافران انه يخفها علينا شوي لان رح يصير رغيف الخبز بوزن الريشة وحجم علبة البيكون

بس بحب طمنكم مدير عام الحبوب والشمندر السكري طمننا انه ما ازمة حبوب، وبالتالي ما في ازمة طحين، بس انا بالي بعده مشغول على الشمندر السكري، خصوصي بعد ما صار مدموج مع الحبوب، ما عم افهم هالاستهتار فيه مقابل السكة الحديد.

للأمانة اذا ما قررنا انه حقيقة نقيم اهمية الاخبار ووزنها على ارض الواقع من البيانات والخطابات بالاضافة الى الافعال وردود الافعال رح نلاقي انه اهم خبر بوزنه الفعلي قطع هالاسبوع هو لما هرع فريد رحمة على اصبع اجر سيرين عبد النور من بعد ما أصيبت في بخدش.. لان هيدا الخبر بفرجي حس من المسؤولين من فريد رحمة ما شفناه من ولا حدا من المسؤولين

قبل ما اختم عندي سؤال واحد، من بال الحشرية مش اكتر لما الصهر المعجزة يتصل بوزير الخاريجة الايراني او اي وزير او مسؤول بدول العالم، تحديدا بصفته شو بيتصل؟ بإنه صهر الرئيس؟ او صاحب اكبر كتلة نيابية؟ او بصفته المستجدة كاقلية؟ او نائب الما خلونا او الوزير السابق لوزارة التعميم؟ او وزير خارجية سابق عليه عقوبات دولية بتهم الفساد؟ بس منيح على فكرة هيدا النوع من الاتصالات بالقليلة بذكرنا بوزنك الدولي وامتدادك الاقليمي

ان شاء الله موت اذا مع كذب بس بدي ادعى مجلس الاعلى للدفاع للانعقاد، بما انه دارج هيدا الموضوع، والمسارعة الى النظر بما ينتظرنا كلبنانيين بالشتوة الاولى المقبلة بأي وقت، مش ليأمر البلديات بالتنظيف او تسليك المجاري قبل وقوع البلا لا ابدا ابدا بس بدي اياه يحضر المسؤولين نفسيا انه لبنان معروف بفوصله ال ٤ وكل سنة بتشتي وموسم الشتا مكرس بكتب الجغرافيا وكمان في مثل لبناني كتير مشهور بقول ايلول طرفه بالشتي مبلول، يعني متل الدستور ف بترجاكم بس نغرق وهالمرة غرق حقيقي حقيقي ما حدا منكم يطلع يخبرنا انه تفاجأ بالشتوة الاولى .. خليني ساكتة