خليني ساكتة ١١٣ - بخصوص الحكومة والرئيس.. العجيب!

خليني ساكتة

تم النشر في 12 سبتمبر 2021



انا بشارط انكم عم تحضروني لتعرفوا شو بدي قول عن الحكومة العتيدة

بدي قول مبروك،

مبروك لحسان اكبر انجازاتي تحرره ومنتمنى يقبلوه بنادي رؤوساء الحكومة السابقين هلق بما انه شغر كرسي هونيك.. ومنقول لوزراؤه الأشاوس كمان غرقتونا وغمرتونا.

اما بما يختص بتشكيل الحكومة.. يعني

الكحل ولا العمى، يعني بالقليلة هيك منوصل عالآخرة مع رئيس حكومة طويل، عنده خبرة بإدارة الازمات بملفات الاسكان، بمشاعر الامهات التي عم يهاجروا اولادها وما عم بلاقوا بانادول

بعدين يعني مش حلوة بحقنا نكمل الامتار الاخيرة من رحلة الانهيار برئيس تصريف اعمال، بدنا رئيس حكومة يليق بخطوة متل رفع الدعم، يستاهل ينربط اسمه بإنه بحقبة تاريخية وصلت فيها شريحة من اللبنانيين لمرحلة تحديد النسل بمفعول رجعي، وبدخل يومي ٠.٨$

٢٥$ للفرد بس اللي عيلته من ٥ افراد بيطلع له ١$ زيادة وتخايلوا طالبا تشكل حكومة والعهد القوي لا وين بدنا نخبي وجنا

بس ما تقلقوا تشكلت الحكومة العتيدة وقربنا عالنهاية، وشفتوا قد ما دمعة الرئيس العتيد غالية دغري صار مع الدولار هبوط حاد

هيك واصلة الحكومة لتلملم اشلاء الشعب ببطاقة تمويلية

والذكا بالعصابة الحاكمة انه وصلوا الشعب لمرحلة يترجوهم يرفعوا الدعم بس يوفر البنزين والمازوت بس يجيبوا السلع

بما انه بخليني ساكتة لازم احكي اللي الي واللي عليي بدي قول انه هيدي الحكومة مش متل الحكومات السابقة، وبتستحق فرصة، وبينحسب لها نقطة اساسية، وهي وعيها لأهمية الواقع اللي عايشينه خاصة بموضوع الطاقة يعني بنزين مازوت وكهربا، ومن هيك منحت وزارة الكهربا للفريق اللس اله ١٦ سنة مستلمها، وهيدا شي اكيد منيح يعني ما بصير العونية ما ياخده فرصتهم ويجربوا شي مرة وزارة الطاقة بعد في عالساعتين اللي عم تجي فيهم الكهربا حالفين يمين ما يفلوا بلا ما يحققوا انجاز انقطاع الكهربا ٢٤/٢٤.. والنقطة التانية اللي بتنحسب للحكومة كمان انه وزارة المالية بقيت لحركة امل، باطل يعني معقول العونيين يبقوا عم يسرحوا ويمرحوا بالطاقة من دون حسيب او رقيب مالي عليهم

حقيقة هلق نحن بحاجة لحكومة من ٢٤ وزير؟

هلق زبطت معهم بوزارة الاعلام بكرا بيطلع جورج قرداحي بيصفق بيتين شعر مع آية قرآنية مذيلة بكلمتين من الانجيل بصير من بعدها اي ضرب مرتكبته الحكومة بيقطع بين السجع والنحو والصرف.. بس ما بعرف حاسة في ظلم لملك الاوف اوف اوف، انه محاور سياسي من الطراز الاول ل ٣٠ سنة، ما مخلي واحد من هالطبقة ما مطبله ومبيض له يا ضيعان التعب رحتوا جبته جورج قرداحي

بس مثلا وزير السياحة لشو بهالفترة يعني حقيقة رح يكون اله عين يجيب سواح ع لبنان؟ اذا بده يكون صادق مع حاله لا ما اله عين.. يعني بده يلعبها عاللبناني بالتذاكي ليجيب سواح يحجوا ع مطامر الزبالة ويمكن بكرا بيعمل اعلان مع كل طابورين ذل بيطلع لك تالت ببلاش

وعبالي يعني اعرف اهمية وزيرة الدولة للشؤون الادارية، هيدي انه عندها شؤون وادارية؟ يعني مشغولة كتير رح تكون، وبعدين بدي اسأل المعترضين والمعترضات على عدد السيدات بالحكومة، حقيقة لازم نشكر ربنا وقفوا هون تخايلوا كان جي بي اعتبر انه من صلب الدستور يجب لكم مي خريش او رندلى جبور عالوزارة

وعلى فكرة كتير تغريدتك بمحلها، نحن تعلمنا صراحة نحافظ عالدستور، بدك لا تآخذنا سنة تعطيل كرمال تاخد اللي بدك اياه، انا صراحة ما كنت عارفة الا لما ترغلت ع تويتر حضرتك انه الدستور مفصل ع قياسك، كنت مفكرته اكبر شوي من هالحجم

وزير المهجرين الجديد طلب من الاعلام ما يركزوا عالاخطاء وينشروا التفاؤل، انا حقيقة بس بدي اطرح سؤال واحد هلق انا لما اضطر اترك بيتي وروح ع غير منطقة لان ما بتجي عندي الكهربا بصير بينطبق عليي صفة المهجرة؟

على الهامش كان الاجدى بالحقائب يكون اسمها على الشكل التالي

وزير التخزين

وزير التهريب

وزير السوق السودا

وزير الغالون

وزير الاشتراك والطاقة الشمسية

وزير الحرايق والفيضانات

وزير النفايات والمجاري المسدودة

وزير الدعم ورفعه

وزير الادمغة المهاجرة

وزير المنصة

وزير المهاجرين الجدد

وزير الادوية المقطوعة

وزير الطوابير الذل

وزير رصد البواخر

وزير محاسبة المجتمع المدني

وزير الانتصارات اللامتناهية

وزير التطبيل والتلميع

وزير الممانعة والحصار الاميركي

يعني هيك كان بتليق اكتر بالواقع اللي عايشينه

على الهامش هلق الكل مشغول بإنه يطلع مصايب وفضائح الوزراء الجداد، وفي صحافيين قال نايمين ع ملفات فساد لوزراء جداد طب هون شو بقول الواحد؟ انه ناطرينهم ليصيروا وزرا لتفضحوهم؟ يعني ما منتدارك البلا قبل وقوعه؟ او انه انتو شايفين المسار القضائي والقانوني سالك بطريقه وما في شي بيوقف بوجه لا حصانات ولا محسوبيات فناطرتوه لتحصن وطالعين تحكوا

قبل ما اختم لا بد من التوجه بالمباركة للرئيس القوي الصامد

على فكرة يا ست رندلى انا يعني عيب نظر بالدين، بس اذا بدنا نحكي لوجيك المسيح هو اللي انصلب ليفدي شعبه مش طلب الشعب كله ليفدي الكرسي وصهره

ولكل المتأملين خير ميقاتي deja استبق الواقع بإنه حمل الفريق الآخر مسؤولية التعطيل، لما قال انا معي التلتين يلي بدو يشتغل ويلي بدو يعطل يتحمل المسؤولية..

ان شاء الله موت اذا عم كذب بس الاكتر تعبيرا عن هاي الحكومة هي نكتة انقالت بس من جهتي رح قل لكم all the above ومن بعدها خليني ساكتةx