خليني ساكتة ١١٤ - المازوت الايراني.. والنجيب الحزين!

خليني ساكتة

تم النشر في 19 سبتمبر 2021


كسرت الطايفة الشيعية الكريمة الاحتكار باستيراد المازوت

ومش اي كسر، كسر ٣دي، كسر الاحتكار، كسر الحصار، وكسر اي هيبة متبقية لما يسمى الدولة

المرشد الاعلى المحلي شخصيا نزل عالسوق، يتفضلوا يفرجونا تجار المازوت هلق كيف بدهم يهدوا، اي هيك نحن ما كملعب بس بدنا ننزل عالارض مننزل بكل تقلنا

يعني لما بينزل ال ceo تبع شركة ع صفقة معينة مش متل اذا راح ال salesperson في كتير فرق

المهم اننا احتفلنا شعب الطابور والانتصارات الالهية، كسرنا هيبة الكرة الارضية بصهاريج مازوت، وصدق الجمهور الابي انه كان محاصر من قبل الاميركان

هلق اول ما كسرنا الحصار، واعلنت النيويورك تايمز انه حزب الله ربح جولة.. شعشعت الدنيا، اجت الكهربا، صارت طوابير الذل من الماضي، اصحاب المحطات صاروا يترجوا العالم تجي تعبي بنزين، يعني هو الملفت بس فاتوا صهاريج المازوت الهي من هون اختفى البنزين اختفى المازوت اختفى كل شي نضفت الساحة حتى ما يختلط المازوت الايراني الطاهر بمازوت السوق العالمية المارقة

كيف بتقنع هيدا اللي طلع يقوص ابتهاجا فوق الصهاريج انه ما في حصار، يعني علميا كيف ممكن تحكي معه؟

تماما متل كيف بدك تقنع هيدا التاني انه تنزيل سعر صرف الدولار نصبة انتقالية بمرحلة التسلم والتسليم، وانه شهر العسل رح يخلص بعد ما تاخد الحكومة الثقة؟

هيدي الثقة ما غيرها اللي الطبقة الحاكمة الفاسدة المجرمة بتجددها لحالها مع كل حكومة جديدة،

بس هيدي الحكومة امورها ميسرة اول بيان حكومي من سنين بينكتب من اول جلسة، هيك طالع فوح وبوح من تبر الحبر

وفروا جلسة الثقة، والمسرحية تبع حجبها ومنها بتحفظ، واكتفوا بوعد الرئيس وعد آخر سنة من عهده عهد الاصلاحات الحقيقية ، اصلا الخمس سنين الماضيين السرقة والنهب والفساد والتعطيل وشراء الاملاك وتهريب الاموال كان كله كله beta testing لحد ما يلاقوا شي يصلحوه بآخر سنة من العهد

ووعد الحر دين، ما وعدكم الرئيس بجهنم؟ ما وصلكم؟ كذب عليكم شي؟ دولة المؤسسات ما حافظ عليها؟ هياها المؤسسات كلها من جيش ومخابرات وقوى امن كلها كانت قاطرة عالدبكة ورا الصهاريج وعم تهلل من بعيد لبعيد

بس نحن شعب ما ببين معنا الخير، خاصة جماعة ١٧ تشرين، هول اللي فلسوا البلد، الهم عين يحكوا من بعد ما عم يجرب حزب الله لملمة اللي ارتكبوه بسبب علاقاتهم بالسفارات..

نحن منعرف انه السيد بيستعمل الدولة متل راجح هيك بس يعوزها، بس انه رئيس حكومة الامل والعمل كمان يعمل نفس الشي بس هلق رئيس الحكومة الجديد قرر يعمل نفس الشي، واكد انه وزراء حزب الله مش مفروضين عليه، بس استبعد فرض عقوبات على لبنان لان الحكومة ما وافقت اصلا على دخول المازوت الايراني، يعني يا زعيم بدك تقرر انت حاكم أو محكوم؟

بس اصلا انا بخليني ساكتة بدي التزم بتوجيهات وزير الاعلام الجديد، وما ضوي على الانهيار او السيئات، بدي جرب قد ما فيي راعي دفتر شروط الوزير الجديد، كرمال البلد بدي كون الضفدعة الخسرة.. (هيديك كانت طرشة).. خلص شو ما كان بدي كون متل العصفورة تاسو.. (هيداك كان عصفور).. خلص المهم هني فهموا عليي بس يا ريت معاليك تعطينا لائحة بمحللين السياسيين اللي بتفضلهم واي ساعة بتحب تشوفهم عالتلفزيون، وكمان مين من الصحافيين بخق لهم يسألوا وومين يسألوا ووين يسألوا يعني لائحة بالصحافيين اللي مسموح يفوتوا عالقصر الجمهوري وغيره من مؤسسات الدولة.

خلينا بالمهم، البيان الوزاري اكد على حقنا بالمقاومة، ومنيح انه عمل هيدا الشي خصوصي انه المقاومة اسهل صارت، اهدافها قابلة للتحقيق، وبمتناول اليد صهريج مازوت من هول صهريج بنزين من هونيك، وما ناقصة الا السيد يطلع يعلن التسعيرة.

على الهامش حسان دياب راح يزور اولاده بأميركا، مش انه هرب من التحقيق لا سمح الله، على فكرة ما بعرف ليه اولاد الزعماء بلبنان بسافره دايما ع اميركا واوروبا مش على ايران مع انه ايران بتأمن لنا العز والكرامة، مؤخرا المازوت وبتساعدنا بكسر الحصار علينا، بيبقى انه اذا بده حقيقة ينجز شي لازم، حسان دياب يقدم لجوء سياسي هونيك ويكتب كتاب يخبّر فيه تحديدا مين اللي نصحه ما ينزل على المرفأ وكل شي شافه بفترة ولايته كمزهرية بمجلس الوزراء طول فترة حكمه.

قبل ما اختم اكيد الكل سمع بالضفدع والعصفور والحفاضات يعني مبين الحكومة عارفة حالها مين جابت ولوين رح توصل خاصة انه طلع وزير الاقتصاد ناقل قصة الضفدع عن رئيس الحكومة، هلق ظهر تحديدا شو البرنامج اللي كان بذهن الرئيس ميقاتي ايام المشاوير ع بعبدا

ومتل ما قالت وزيرة صورني انا ومش منتبهة السابقة، نحن مش بس ربحنا المليون بوزير الاعلام كمان ربحنا ٢٣ مليون تانيين بكل وزير من الوزراء الجدد، ونزولا عن رغبة زوجة سعادة الوزير نحن اللبنانيين رح نتجاوب معهم ونعطيهم فرصة خصوصي انهم هالمرة عم يشتغلوا تحت مراقبة وتمنيات رئيس الماخلونا اللي طلب بشكل مباشر من الحكومة العمل على حل موضوع الكهربا بالاول

كتير عبالي احضر جلسة الثقة ومناقشة البيان الوزاري احلى من حلقات سوق عكاظ رح تكون بين بري وجورج قرداحي والحكواتية ال ٢٣..

ان شاء الله موت اذا عم كذب الرئيس ميقاتي طلب من وزرائه ما يصرحوا للاعلام ويكونوا مقلّين بالكلام، بدل ما يلتزموا راحوا يخبروا قصص بالطول بالعرض القاسم المشترك فيها انه الشرير واللامبالي والمقصر بكل القصص طلع الشعب والاعلام ولازم نصدق انه المخلص المنقذ هو شخص وصل لموقعه بمباركة احزاب كتبت باسمها وزارات فاشلة وكرست الفساد بكل مرفق من مرافق الدولة .. خليني ساكتة