خليني ساكتة ١١٥- الحكومة الميقاتية للتسول، لا خطة ولا مَنْ يخططون.. ومناظرة بين جبران باسيل والوقاحة.. مين بيربح؟!

خليني ساكتة

تم النشر في 26 سبتمبر 2021


سريعة الحركة بالحكومة سريعة

كل وزير اخد محله عالسريع

والرئيس النجيب راح دغري يجس النبض عند ماكرون

هو اصلا كان واضح بخطه الحكومية الشحادة ثم التسول فالشحادة من دول العالم

نحن مش مضطرين لا نحط خطة ولا اتنين هيك بس بدنا ندق ابواب الناس كلها

بانتظار انه يحنوا علينا بالمملكة الشقيقة لان هيدا هو المخرج الوحيد الاوحد للتعوييم المطلوب اللي مرتكز على ولا شي حقيقة

يعني بدنا المجتمع الدولي والعربي يعاملنا انه نحن الولد اللي ما بينضج ابدا، لا بعد بلوغه شن الرشد ولا يعد تخرجه من الجامعة ولا حتى بعد زواجه واهله بدهم يبقوا مسؤولين عنه بالسلم والحرب الاهلية والحرب ضد العدو وآخر شي بدهم يعوموا الفساد والفاسدين.. بالوقت اللي نحن اللبنانيين لازم نخبره لهيدا المجتمع اللي كل فترة بتنطّح لمساعدتنا انه المال السايب بعلم الحرام.. وهيدي الطبقة اللي عنا عندها القدرة تسرق اللي المال العام والخاص اللي بالمصارف والمساعدات اللي بتجي هول بوطة سياسية بالشكل هوفر بالفعل

بالشكل العام ما تغير شي نزل الدولار بحدود ال ٦٠٠٠ ليرة، بس الاسعار نزلت بين ال ١٠٠ ليرة والالف قال التجار اشتروا عالغالي، وبكرا بس يشتروا عالرخيص ويرتفع الدولار ببيعوا كمان عالغالي لان رجع الدولار طلع

بمشاهد سريعة امنوا حالهم تيار الافقار والتعتير بوزاررة الشؤون الاجتماعية حيث تصب معظم المساعدات الدولية، وبالكهربا اتحفنا الوزير الحالي المتحدر من نفس فصيلة آخر ٤ وزراء تعاقبوا على الوزارة بإنه المشكلة مش سهلة وانه موضوع المازوت معقد من الاخر انه ما نتأمل خير

مش نحن يعني كنا رح نتأمل خير بس انه بالقليلة يكون هو بيعرف يقول جملة مفيدة وحدة، او عنده خطة اوضح شوي من خطة وزير الاقتصاد مثلا اللي شمر عن زنوده ونزل يعمل جولة على السوبرماركات، معاليك هيدي على ابعد حد لازم يستلمها المدير العام بالوزارة مع المختصين، انت لازم تنكب على العمل على خطة اقتصادية واضحة، حتى تقدر بالقليلة تدير دينتك الطرشة في ما بعد للانتقادات.

وزير العدل بعد ما سمعنا حسه ولا حفظنا اسمه، مع انه يعني القضاء كان بالواجهة هالاسبوع، طارق البيطار واقع بين ما قيل عنه تهديد مباشر، لا هو ،لا المهدد نفيوه.. وبين اتهامه بتسييس التحقيق والارتياب المشروع، وبين انه مش عارف حاله مع مين عم يحكي ولا وين عنوان اللي عم يحكي معه وبين الاهم من كل هيدا دخول الاخوين صقر على معادلة النيترات.

هلق الجمهور المقاوم ما بده يصدق انه معقول الحج وفيق يهدد بهالسخافة، بس بده يصدق انه مدير مستودع معه الخبر اليقين انه السفيرة الاميركية قال للصقر بدها تبرؤه وتحطها بالثنائي الشيعي.. على اي حال انا شخصيا بهمني وضح موقفي من التحقيق، انا مع التحقيق مع كل بشري عرف او سمع او علم بموضوع المرفأ اولهم رئيس الجمهورية، ومن بعده كل واحد لا يزال متحصن بحصانة او مغلف بتوب طائفي، وصولا عن الطفيليات، والمنطق بقول لو من اول نهار مثله اللي تم استدعائهم على التحقيق ما كان استرجى لا الاخوين الصقر ولا اللي اكبر منهم انهم يفرعطوا.. وعلى فكرة اذا الاخوين صقر بيعرفوا حقيقة نيترات المرفأ ومين مخزن ومين مصدر ولوين رايحين شو يعني كل هالاسماء الكبيرة بتشتغل عند الصقر؟ وكل هالسنين بقي النيترات بدراية اللواء صليبا ومعرفة اللواء ابراهيم ومعية على حسن خليل وتوقيع يوسف فينيانوس ونهاد المشنوق وتطنيش ميشال عون وحسان دياب.. لكن صار المرشد الاعلى المحلي عنده منافس كتير قوي على الارض وكان الاجدى فيه يجيب ابراهيم الصقر رئيس ويعملوا عهد قوي بالاسم والفعل

والاهم من كل هيدا انه حق ضحايا ٤ آب ما لازم يروح هدر بسبب حساباتكم الوسخة. وبعتقد مجرد انه كلكم عم تلتفوا ضد طارق البيطار هيدا شي بيوحي انه عم يعمل شغله صح.. بيبقى الخوف من العدو الصهيوني يقبعوا من محله بالقانون او بأي اسلوب آخر

على الهامش قال الباخرة الايرانية التانية وصلت، طب اول وحدة انتهكت سيادة لبنان ولحن لها على ال violant النجيب العجيب، هلق شو بده يعمل للتانية؟ بس تفوت عالبلد وهو بكامل هندامه الحكومي؟ واذا بده ما يخليها تفوت حفاظا على السيادة شو خطته بمقابلها؟ عنده الجرأة الكافية يطلع يخبر الدنيا انه نحن ما عم نعاني من حصار وانه اللي عم نعانيه هم مفاعيل السرقة والنهب اللي هو كان جزء منه؟

التخطيط شي بعتقد انه عصي على اي حدا بهالسلطة من كبير اللصوص وجر، كل القرارات الامور بتحسها هيك طالعة من مكان اعتباطي بحت، شائعات اقاويل حكي تحليلات بالهوا ما في شي مرتكز على اي علم سياسة او اقتصاد او حتى اجتماع بتحس كل بلاد العالم مساطيل انه اخده كل هالعمر والمجهود ليلبنوا بلاد على اسس ويكتبوا اطروحات بعلم السياسي والاقتصاد ونحن بالبلد الوحيد اللي هيك ماشي والرب راعيه

والاهم من كل هيدا بعد ما غسلوا ايديهم من الحكومة، بلشنا ال matraquage تبع باسيل جايي رئيس او لا، فجأة صار كل الشائعات بصب بمصلحة وصوله على سدة الرئاسة، شي بقول ما في انتخابات للمغتربين، شي بقول ما انتخابات نيابية، وآخر نكتة انتخابات رئاسية مبكرة مع احتفاظ عون بالرئاسة لاخر يوم من عهده، يعني ما بعرف نحن شو عاملين بحياتنا لبدنا نستاهل هيك عقاب، وبعدين يعني رئيس الما خلونا اللي الوحيد تلات ارباع الشعب بشبيه وشبابه غنا له الهيلا هو بده يجي رئيس؟ انه للأمانة عدي صدام حسين ما زبطت معه ولا سيف الاسلام القذافي

ان شاء الله موت اذا عم كذب بس الوقاحة اذا عملت مناظرة مع جي بي، بيربح جي بي وبعده بيطلع بده يفهمنا انه هو العفيف الشريف الوحيد بالبلد، وبس يزركه واحد لو من حلفاؤه بالزاوية بصير ما بيقدر يسمي، يعني سمى الصقر وما بعرف مين بالبرلمان لانهم مخزنين نفط.. بس انه يسمي واحد من اللي هربوا مليارات الدولارات برات البلد وسببوا بإفلاسه او من اللي اهدروا المال العام.. هيدي بدها قضاء مختص.. خليني ساكتة