خليني ساكتة ١١٦ - بعد انجازاته بإدارة الطاقة.. عين جبران باسيل على إدارة البلد!

خليني ساكتة

تم النشر في 3 أكتوبر 2021


حقيقة طلع القاضي البيطار مش عارف حاله مع مين عم يحكي

وتقاطعت مصالح ابو صالح مع الحج وفيق، وقفت التحقيقات بانتظار محكمة الاستئناف، وهيك حقوق ضحايا ٤ آب، بمهب تكاتف السلطة اللي متل الاخطبوط راس واحد عم بدير ايادي متفرقة لتنفيذ اجندته

بس الحكومة ماشية عم تشتغل شغلها، وحده وزير العدل مفقود، ما نطق بعد، يمكن مقصود يكونوا جايبينه كاتم للصوت، أو يمكن بعد ما لقى شي يسرق الاضواء من زملائه اللي نازلين تعفيس من فج وغميق

المنيح انه وزير العمل انتبه لنسبة البطالة بلبنان وعم يفتح آبليكايشن لتأمين فرص للبنانيين بقطر، ما بعرف إذا قطر منتبهين انه اذا بدهم يشغلوا اللي عم يعانوا من البطالة بصير بدهم يتوسعوا الحدود لتلاقي لنا محلات نعيش..

وزير الطاقة حلها قال اذا في فيول رح تجي الكهرباء، هلق د. وليد فياض بالذات ما بتعرف تاخد موقف منه هيك بتحسه متل شخصيات ١٠ عبيد صغار، بلفه الغموض، ما بتعرف لما يضيق خلقه من الصحافيين هل هيدي شخصيته او شخصية متقمصها الاكيد انه لهلق مراعي الشروط الاساسية لوزارة الطاقة من تاريخ ما استلمها وزير الما خلونا وهو ممنوع يجي حدا ع هالوزارة يبين انه بيفهم أكتر من جبران باسيل او يعمل شي يغطي على انجازات جبران باسيل اللي قد ما نجح بإدارة وزاراته بعدنا لهلق عم ناخد قروض لنجيب الكهربا، هلق طامح طموح كبير لادارة البلد كلها كرئيس جمهورية، بالمينيموم ننتخبه رئيس بزيادة بلشنا نودع البواخر اللي امنت لنا كهربا ٢٤/٢٤ وفالة من هون هي وعم تقاضي البلد بكامله وتطالبوا بمئات ملايين الدولارات، يوصلها بالسلامة على بلادها لانها قد ما حاملة شفافية هي ورايحة خايفة عليها تغرق

المشكلة الوحيدة بجبران باسيل هي انه يعني هو مصدق انه نحن مصدقين اللي هو عم بقوله، وانه بمسيرة حفاظه على حقوق المسيحيين في عالم رح تكافئه

للأمانة ما في شي بهيدا البلد بيوحي بإننا ممكن ننجى من الشرور الاتية، لان كل ما نفكر انهم ما ممكن يرتكبوا شي جرم دستوري بيدعسوا بقلبنا وبيمشوا بكل وقاحة

يمكن لازم نبلش نحضر حالنا خصوصي انه موسم الانتخابات بلش، هلق هيك كل خميس بيطلع مع ملك الاوف اوف اوف حدا مرشح عن منطقة ما، هلق هول للتحماية، عم يزمطوا قبل ما يغلى سعر الدقيقة على التلفزيون. يمكن لازم نحضر حالنا للأسوأ بما انه الانتخابات رح تصير تحت نفس القانون الانتخابي، بإشراف نفس السلطة الحاكمة من ٣٠ سنة، الفرق الوحيد هو سعر صرف الدولار.. وبحكم اننا شعب قابل للبيع، بلش البازار على سعر الصوت، وفي حكي انه الشعب ما رح يقبل يبيع صوته الا بفريش دولار.. اي اذا بتريدوا نحن شعب ما بيتاكل براسنا حلاوة.. مصرياتنا نهبتوها، عاصمتنا فجرتوها، اهالينا قتلتوها بس صوتنا بدنا ندفعكم حقه غالي، غير بالسوق السودا مش بايعين، وهلق اللي بده يعمل فرق ببلش بخزن أصوات وببيعهم Balk.

هلق لان ببلاد الاغتراب ما رح يفرق معهم الفريش دولار، عم بصير في اخد وعطا، بتلتغى بتبقى، بيعطوهم نواب ما بيعطوهم، بس لاننا نحن بلد مصدر للديموقراطية، رايحن على قارات العالم، نوزعها، اي نوزعها مش للديموقراطية للطائفية، قال كل القارات بالتوازي بين الاسلام والمسيحية، مع اعتراض حزب العز والكرامة لان بكتير قارات وبلدان هو على لوائح الارهاب قال هيدا بأثر على حظوظه بالانتخابات، ما طبيعي بده ياكل لبنان ويتمدد على دول العالم.. بعدين بشرفكم يعني كيف بعملوا كل هالخياطات؟ انه كيف بتفصلوا لكل زر بدلة، يعني صرنا حالة تدرس بالسياسة وبالاقتصاد، ما في بلد واحد بالدنيا مغتربينه بينتخبوا نواب مغتربين ولك يا عمي حقيقة من شو انتو مصنوعين؟ انه لقيتوا في كم لبناني بيفهموا وشالحين طايفتهم وعايشين متل البشر ببلاد العالم قلتوا باطل لاحقينكم على قبركم ما بيسوى يكون في واحد بيفهم؟ عاملين منا حالة نادرة فشر اكسبو ٢٠٢٠ فشر رؤية ٢٠٣٠ فشر كل انظمة العالم الفاشية والديكتاتورية والديموقراطية؟

بس معليه انا بتفهمكم بدكم تحموا حالكم من التمدد الاميركي والحصار والاستفراد فيكم، من هيك مثلا رئيس الجامعة اللبنانية ممنوع يكون الا من الثنائي الشيعي، بس بحيي روح الديموقراطية اللي فيكم لانه بتسمحوا للعالم من غير طوائف انها تترشح مش قليل والله هالسعة الصدر اللي عندكم بتقبل الاخر

على الهامش اللجنة الوزارية للمناقشة مع البنك الدولي تشكلت هلق رئيس الجمهورية ورئيس الما خلونا جبران باسيل يعني احسن ما تكونوا نسيتوه بده يحاكم رياض سلامة بس كمان فوضوا رياض سلامة يفاوض البنك الدولي، بس حرصا على الشفافية وحتى ما يلعب هيك هيك حطوا معه اشخاص متل شربل قرداحي ورفيق حداد اللي هني مدراء ماليين ب آلفا وتاتش وما ادراك ما هاتين المغارتين بس المهم تيار الافقار والتعتير مع التدقيق المالي والشفافية والمحاسبة

ان شاء الله موت اذا مع كذب بس قال وزير الشباب والرياضة هيدا اللي ما كانوا عارفين اي وزارة بيعطوه اعلام او سياحة وآخر شي رسي بالشباب والرياضة قال طلب من رئيس الجمهورية اعادة العمل بخدمة العلم لان اكثريةٌ من شاباتنا و شبابنا لا يعرفون بعضهم، ولا يتلاقون و لا يتفاعلون.. دخلك يا جهبذ عصرك قطع عليك خبر انه الجيش اللبناني كل فترة بعيش فترة detox وبيتميز بإنه الجيش ال vegetarian الوحيد بالعالم لانه ما معها دولتك مصاري تطعميه لحمة ودجاج.. خليني ساكتة