خليني ساكتة ١١٧ - أعلى مرجعية دستورية توصي: "بأن يختار كل متهم القاضي الذي يرتاح إليه"!

Politics

تم النشر في 10 أكتوبر 2021


لاني مقررة اني اخلع النق وانبذ ال depression واقضي على الاحباط

رح اقرا كل اخبار الاسبوع الحالي بدرجة عالية من التفاؤل،

اولها انقطاع الكهربا ٢٤/٢٤ خلص ارتحنا وريحنا، لا بقى اجت الكهربا ولا راح الموتور ولا هيدي دولة او اشتراك خلص دولة ما بقى في، الحق ع مين؟ عليي انا لما يزعلوا جمهور تيار الافقار والتعتير ويعتبروني حاطة حطاط الصهر المعجزة هادر ال ٤٢ مليار دولار ع فرد اجر، لان هو حقيقة ما خصه لو وزير المالية الشيعي اللي تابع لحركة امل مضي على انشاء المعامل هو كان عنده استعداد يتخلى عن كارادانيس وكل بواخر العالم للصالح العام المهم بكل ايجابية حققنا ال ٢٤/٢٤ وما بقى حبر على ورق والايجابية بإنه رهاننا على محور الممانعة طلع بمحله وما رح يتركونا

والايجابية امتدت لتشمل حركة ديبلوماسية ناشطة وزير ايراني جاية سفير سوري رايح وزير اردني بيدعم من هونيك او وزير مصري بصرح من هون وما بينهما وزير عراقي بيعرب عن استعداده لمساعدتنا لتأمين مرة كهربا مرة نفط.. خيييييي واخيرا رجعنا لامتدادات العربي.. لولا هالكم اسم الفرنسي اللي بيتذكرونا من وقت لوقت كنا حسينا انه البلد انوأد عن الخريطة العالمية

بس اصلا شو بدنا بالغرب؟ يعني شو رح يعطينا الغرب؟ ايران بعد ما وقفت معنا بمحاربة العدو الغاشم، جاية توقف معنا بإعادة الاعمار، تتذكروا اعادة الاعمار ما بعد الحرب هيدي فترة الرئيس الشهيد؟ ايه هلق مرحلة مشابهة بعد ما تكسر طموح دول الغرب على عتاب وطن النجوم، جاية ايران تساعدنا معامل كهربا خاصة للطائفة الشيعية هي ما قصدها فيدرالية او شي ولا قصدها تقلبها طائفية، هي ببساطة ما بدها تحرج حدا بلكي ما بناسب الافراق التانيين بالبلد الانتاج الكهربائي الايراني؟ علاقتنا مع الايرانيين هيك صواريخ فحروب فصهريج مازوت فمعمل كهربا فمترو فمرفأ فصواريخ فحروب

اي اجا الوقت الطائفة المحرومة تكسر الاحتكار وتتمدد، بس ما في خوف على المسيحيين حقوقهم محفوظة بوجود رئيس قوي وصهر رح يكون اقوى

كل هالايجابية حتما رح تنحسم بصناديق الاقتراع، وعلى ما يبدو بالموسم الانتخابي رح يكون اسهل نعد غير المرشحين على الانتخابات النيابية، والمعركة معركة كسر عظم بوجه ديناصورات سلطتها قائمة على حجم اجرامها وفسادها وامساكها برقاب العالم

والمعركة بدها ذكاء خارق على كل الصعد اكتر شي على صعيد التحالفات، ومن دون ادنى شك المنظومة رح تلعب على شعار "على اساس كلن يعني كلن" والمعارضة رح تستتحي وتزعزع والمنظومة رح تضحك وتستشرس لحد ما تربح

بالنظرة الايجابية للأمور مغتربي الانتشار هيدا المصطلح اللي تقل دمه بتقل دم وزير الخارجية آنذاك ومين غيره اي اي جبران باسيل، اللي عم يحذر من التلاعب وتطيير الانتخابات، بتحسه متل غراب البين، بقضيها تحذير من الاسوأ وما بعرف اصلا اذا في أسوأ منه هو شخصيا.. المهم انه بحذر من بعدها ما بخلوه واكيد هو ما خصه بالتعطيل

بس فجأة بيطلع حدا متل وزير الداخلية بايس تيريز ليتوزر، ورئيس الحكومة بايس تيريز ليترأس ورياض سلامة بايس تيريز ليتفاوض... وتيريز مش راضي

للحقيقة اقرأ توتيتاتك اصدقك اشوف افعالك استعجب

ومنبقى مع النظرة الايجابية للامور الانتخابية لان الغاء الكوتا تفصيل خفض سن الاقتراع تفضيل موعد الانتخابات تفصيل، بيبقى انه احسن شي اقتراع المنتشرين لنواب منتشرين، يعني ما رح يجوا المنتشرين بطيارات ينتخبوا لنا حماة القضية ويدافعوا عن الطوائف ويكرسوا الزعامات على راسنا ويرجعوا على بلادهم الملونة يعيشوا هني اولادهم بأمن وامان ورغد ومستقبل ويتركونا نحن واولادنا نحارب المؤامرات والاطماع الخارجية اللي جاية من نفس البلدان اللي مستقبلتهم

للامانة من ايجابيات كل هالتخبيص القانوني اللي غايته الاولى والاخيرة احكام القبضة على البلد، انه حقيقة بده علماء بالسياسة ليفهموا على اي اسس ماشي هالبلد، تماما متل بالاقتصاد، حيث ان اذا بونزي شخصيا قرر يفهم نصبة كبير اللصوص الحاكم بأمر الليرة وكيف بعده عم يركب طرابيش ما رح يقدر يفهم سلامة Skeam ورح يستسلم

لااا ورايح يتفاوض ويتدين بعد مرة للبلد، ويفاوض نفس العالم اللي قال ما عندهم استعداد يدينونا اذا ما حاربنا الفساد.. وهون لا بد من التذكير للتاريخ هو رايح بتفويض من رأس الحربة بمحاربة الفساد الرئيس ميشال عون شخصيا واكيد اكيد برضى تام لرئيس الظل، بشخصيته الحقيقية، مش بشخصيته الافتراضية او التلفزيونية

على الهامش هلق بما انه العام الدراسي بالمدارس الرسمية قرب ينطلق بعد ما اغرقتنا دول العالم بعطفها وحنانها وسحبتها الحرف، يمكن لازم نعدل تفسير العلم اللبناني بكتاب التاريخ، لان الهيئة اللون الابيض اللي فيه بيرمز للون نيترات الامونيوم اللي بيتلاقى على اراضيه بالاطنان مش للون التلج اللي بغطي جباله

على صعيد المعيشة الدولار رجع لايجابيته التحليقية، بعد ما كان لعب بمشاعر اصحاب ال fresh $، حتى النطرة على محطات البنزين صارت فيها تكون لاعب ايجابي ببرستيج اللبناني، انت مستقل انه تكون واقف بكل ثقة بالنفس لتعبي بنزين، والنقطة ب ٥ جنيه والحسابة بتحسب؟

يا دلي انا كمان طلع الميقاتي كان بليونير وبطل بسببنا.. بس عاضض على جرحه متل كل لبناني معتر

بس رئيس الميقاتي متفائل متلي وشاف ايجابية بالمازوت الايراني وقال انه عرف بالمعابر غير الشرعية من ورا دخول هيدا المازوت عالبلد، على امل يكونوا هني ذاتهم المعابر اللي عم يتهرب منهم النفط من البلد.. بالقليلة اذا شي مرة قرروا يعملوا رجال بهالسلطة ويفرضوا هيبة الدولة منضرب عصفورين بحجر واحد

وكمان من الايجابيات هيدا الاسبوع انه الوزرا والنواب المدعى عليهم بقضية المرفأ بعدهم عم يلجأوا للقضاء لكف يد القاضي بيطار عن التحقيق بعد ما اكلوا كف من محكمة الاستئناف برد الرد،

بس بصراحة، هالوزرا هني عاملين بحالهم هيك، ما عم يسكتوا بيبعت وراهم القاضي بيرفعوا عليه دعوى، واخد ورد بالاعلام، انه لارم يعملوا متل رؤوساء الاجهزة الامنية اللواء صليبا واللواء ابراهيم ما يعطوا القضية اكتر من حجمها، يعيشوا حياتكم بشكل طبيعي يتصرفوا انهم مش معنيين بالاستدعاءات هيك بينسحب اسمهم من التداول

بس طالما بعدهم عم يلجأوا للقضاء من جهة، وحزب العزة والكرامة عم يلجأ السوشيل ميديا بالتشهير والتشكيك بالبيطار، يعني الامل كبير بإنه بعده بعيد عن عيون العدو الاسرائيلي اللي ممكن يستغل الوضع ويإذيه، ما هيدا العدو ما بيتأمن له خصوصي انه من يومين عرفنا من الاعلام انه كان عم يكزدر بالنبي شيت

بس نحن مش غايبين بشكل كلي عن بال المجتمع الدولي، والفضل للمشنوق قدر يلاقي مرجع دستوري فرنسي كامل يعمل له مطالعة قانونية ع قياسه وانه لازم يتحاكم قدام المجلس الاعلى وانه البيطار خالف الدستور ما هو اصلا هيك القانون بصير كل واحد بتم الادعاء عليه هو بيختار القاضي ونوع التحقيق وكمان الصفة اللي بده يمثل فيها قدام القاضي

ان شاء الله موت اذا عم كذب بس ابو صالح بعده عم بطالب برد الدعوة للارتياب المشروع.. ونحن ارتيابنا بعدم مثولك قدام قاضي التحقيق مشروع.. انا مقدرة موقفك لانك عارف ممكن تتوقف وتطلع براسك لحالك او مع كم حدا تاني بس هيدا ما بيمنع قل لك انك لازم تمثل قدام قاضي التحقيق وتخبره كل شي بتعرفه والمنطق بقول بما انك هيك كنت وزير داخلية عالخفيف بوقتها انك بتعرف كتير فبليز وفر ع حالك وعلينا وقت.. لان حق الضحايا وحقنا رح ناخده من هلق لوقتها.. خليني ساكتة