خليني ساكتة ١١٨ - الطيونة - عين الرمانة: السلاح بولد السلاح... وزعامات عايشة عالدم !

خليني ساكتة

تم النشر في 17 أكتوبر 2021


هلق لوين؟

وقع ٧ ضحايا، عشرات الجرحى، ورعب على وجوه الكبار بالعمر والأطفال وما بينهما

من هالضحايا ام لخمس اولاد، ومنهم شباب محاربين مقاتلين مدججين بالسلاح

السيناريو واحد، قاتل قرر ينهي حياة عالم تانيين قال اخد القرار يدافع عن منطقته؟ مين اعطاه الحق؟ هو اخده لإن في سابقة بالبلد انه حزب مقرر يدافع عن البلد كله وقت بده وساعته اللي بده ووين ما بده

السلاح بولد السلاح، والعنف بولد العنف، القتل جريمة، صح الاستقواء بولد الظلم بس قنص عالم عزّل جريمة.. وما بحياته خطئين عملوا صح..

هلق لوين؟

هلق منقعد مننطر الحلقة الجديدة من المسلسل اللبناني الطويل، هيدا المسلسل حيث الابطال هني زعماء الطوائف والاحزاب وهول كراسيهم متل الشجر بحاجة لشي يغذيهم، بس الفرق انهم بيتغذوا بدل المي على الدم، كل ما نزل دم بالارض كل ما ارتوت جذور الكرسي تحتهم ورسخت زعامتهم وتشبثت بالارض.

مشهد مبارح بجوز عليه عنوان كيف تربح الانتخابات ب ٣ ساعات، شد عصب طائفي من هون ودليل على استهداف

الطايفة المحرومة من جهة، وحاجتها لحماية من المؤامرات اللي بدها تستفرد فيها بالبلد.

المتاريس هي هي حتى لو ما في أكياس رمل، المشاهد هي هي النسوان عم تركض وتهرب اولادهم، الاولاد بالمدراس والرعب بعيونهم، القتلى والمقاتلين على الأرض.. خطوط التماس مرسومة وواضحة حتى لو ما في حواجز على اطرافها. المرتكب هو ذاته من ال ٧٥ لليوم، هي ذاتها الطبقة الحاكمة، ومش مستبعد اي واحد منكم يعمل اللي عم يعمله، يعني مش انكم لبستوا بدلات واخدتوا مناصب انكم ما بترجعوا لحقيقتكم بأي بلحظة وهي انكم مجرمي حرب.

بتحس كان ناقص هالبلد السوشيل ميديا، حتى يكمل المشهد بالمزرعة اللي عايشين فيها.

حصيلة اللي صار ١٢ بيان استنكار واكتر، مئات الالوف من البوستات وعشرات الهاشتاغات، واتهامات بالمباشر وغير المباشر للقوات بتهديد السلم الاهلي وايقاظ الفتنة.

للأمانة القصة اكبر من هيك، وللأسف التنظير هو ودم العالم على الأرض معيب، بس هيدا ما بيمنع انه مشكلة الثنائي الشيعي ما بقى محصورة مع فريق او مجموعة، المشكلة انه هالفريق على قد ما استقوى وعم يستقوي عالعالم صار في حالة نفور جماعية منه، ما بقى في قدرة عند الكتار يعيشوا تحت فحص الدم المستمر، اذا مش معهم يعني عميل، واذا ما توافقهم الرأي بدو يتدمر البلد.

التظاهرة اللي بلشت سلمية، وكان لازم تبقى هيك لو ما الموتورين القتلى اللي فلتوا عليها، كانت من الأصل خطأ، عنوانها كان خطأ، وهدفها كان خطأ، هيدي التظاهرة انطلقت ضد القاضي بيطار بالشكل اما هي بالحقيقة ما هي ضد حدا الا ضد ضحايا المرفأ واهلهم وحقهم وحق اهلهم، هيدا تحديدا اللي عزرائيل الصحافة اللبنانية خبرنا انه ما لازم ينسكت عنه الحق اللي كمان ما بيتاخد بالتوسل وانه المقاومة شلحت توب الصبر كرماله، طب ليه السكوت عن حق ضحايا مبارح هو امر مرفوض، واذا طالبوا اهالي ضحايا انفجار بيروت بحق أولادهم بكونوا عملاء؟

شو الفرق بين علي مشيك ومريم فرحات؟

او شو الفرق بين الضحايا ال ٦ التانيين والفرق انه ٢١٧ ضحية بانفجار المرفأ ما في ولا واحد منهم كان حامل سلاح ولا واحد اختار يدافع عن زعيم وولا واحد كان بمعركة.. ال ٢١٧ ضحية تفجروا ببيوتهم واشغالهم.. بس القاضي اللي عم يحقق بالجريمة اللي طالتهم، بعده بس عم يحقق لا اتهم ولا اصدر احكام، صار عميل ومسيس ويجوز هدر دمه.. يعني اذا صار تحقيق عدلي بجريمة الخميس كمان بحق لفريق آخر يطلع يطلب اقالة القاضي ويتهمه بانه مسيس.. او لا؟ لان ما يجوز للفريق الحاكم بأمر الخلق والعباد لا يجوز لغيره؟

هلق لوين؟

العالم العادية خايفة من رد فعل حزب الله، والانظار متجهة لكلمة المرشد الاعلى المحلي مساء الاتنين، هلق صار الامين على الدماء وهو اصلا سيد المقاومة وكمان الآمر الناهي ويمكن القاضي والمحامي والرئيس والامين العام والصادق والصدوق وما حدا غيره بيحكي الحق

على كل حال اكيد الكل بيعرف انه بموازين العين والمخرز، والقوة على الأرض هو الاقوى، بس يمكن فائض القوة هو اللي بعده عم يحمينا، عم يخلي يعد للعشرة انه شو بيعمل بيبر الصواريخ بوجنا، أو لا؟

للأمانة، في شي يا أحبائي مش فاهمته كتير، يعني كان فينا نبعت على حسن خليل على تحقيق وبلا ما ننزل آلاف الاشخاص عالارض، يعني هو القاضي اذا بده يمعمع القضية معكم ما عم تعطوه مجال يلاقي مخرج.. بعدين يا احبائي المشكل مع القاضي بيطار هو مشكل مع معظم اللبنانيين اللي بدهم قضاء مستقل، وكمان يا احبائي رئيس الجمهورية حليفكم الأول هو كمان عم يدافع عن البيطار، وصهره المعجزة تمايز عنكم وواقف مع البيطار، لان عنده بصيص أمل بالانتخابات بده يبيعنا مواقف للعالم تتنتخبه، وبعدين بيرجع بقول ما خلوه، يعني مشكلتكم شوي كتير اكبر من شخص أو فريق.

وبعدين اذا متل ما أشار عزرائيل الصحافة اللبنانية انه القوات كانت محضرة كمين، وعون وميقاتي والوزراء والجيش والأجهزة الأمنية معهم خبر، وهالشي صار بالتنسيق مع سفارات العالم، يعني في خرق امني فظيع صاير بالبلد وما عارفة فيه العين الساهرة على الأمن والأمان وحامية النساء والأطفال من الاغتصاب والأرض من الاحتلال.. وهون بتصير المعضلة ان كنتم تدرون بالكمين كيف بعتوا الشباب يمارسوا هوايتهم المفضلة بالهتاف شيعة شيعة شيعة بالمنطقة الثانية.

على الهامش طل علينا جي بي ليخبرنا درب الجلجلة تبعه وكم مرة صار عايش ١٣ تشرين، وانه في عليه تقريبا حوالي المليون و٣٠٠ ٦٥ الف مؤامرة ونص، وانه هو مع القضاء المستقل وضده ومع اهالي عين الرمانة يدافعوا عن حالهم وضدهم ومع ورقة التفاهم وضدها.. خلص اختاره اللي بدكم اياه وفهموا اللي بدكم اياه المهم انتخبوني

طيب هلق لوين؟

هلق الحقيقة الثابتة انه المدعى عليهم وعلى رأسهم علي حسن خليل اللي قال "ممنوع تمييع التحقيق بجريمة الخميس" لازم يمثلوا قدام قاضي التحقيق بقضية المرفأ منعاً لتمييع التحقيق،

ولازم تخلوا القاضي يعمل شغلوا.

ولازم اللي قنص على المتظاهرين يتحاكم، واحذروا شو لازم كل واحد كان حامل سلام يوم الخميس اللي لابس كمامة او بلا كمامة يتسلم هو وسلاحه

ولازم يتأمن حماية وحرية تعبير لاهالي الضحايا

ولازم حق الضحايا يبين لو حتى اهلهم ما بدهم

ولازم الجيش اللبناني، يترقى من كونه دفاع مدني جدير بإخلاء المحاصرين، ليصير قادر يمسك يمارس مهامه كجيش بالامساك بامن البلد والمواطنين. وإذا هيدا الامر مش ممكن، شرعوا الحشيشية ووزعوها عالمواطنين والحزبيين اللي عندهم قدر كبير من الوعي وعم ببينوا هيدا الشي كل يوم بممارساتهم، وبدل نشرات الأخبار فليعرض فيلم هلق لوين على جميع المحطات التلفزيونية لمدة شهر لنتعظ

ان شاء الله موت اذا عم كذب بس القرف والحقد والكره اللي طلع بهاليومين كفيلين انهم يقضوا على آخر نفس كان الواحد عم يجرب يتنفسه ليقول بعد في امل

خليني ساكتة