خليني ساكتة ١٢٠ - كنّا بجنهم ومع رمز الكرامة والسيادة جورج قرداحي.. دخلنا على بئس المصير!

خليني ساكتة

تم النشر في 31 أكتوبر 2021



كان صار النا فترة بجهنم هلق فتنا على بئس المصير

كنا عارفين انه ما في أمل شو ما كان شكل الحكومة او الاسماء اللي فيها لان المشكلة بالنهج بس للأمانة ما كنا عارفين الانزلاق رح يكون بهالسرعة

وقبل شعارات الكرامة والعنفوان والسيادة والاستقلال وحرية التعبير ما حدا يستغرب نظرة العالم النا طالما نحن بقلب بلدنا ما النا قيمة ولا النا اعتبار

الواقعة وقعت مع دول الخليج مش بسبب تصريح بسبب نهج، باختصار العالم ضاق ذرعاً بنا، ولما واحد ما جاييه ولااا شي من ورانا ليه بده يتحمل عنجهتنا ومناخيرنا المرفوعة وفوقهم اصبع التهديد والوعيد من حين الى آخر

من اللافت انه حكومة الانقاذ الوطني المتراصة كما وصفها الوزير جورج قرداحي فاتت بأزمة ديبلوماسية لتدافع عن وزير الاعلام، هيدا الوزير لوزارة ما الها وجود بدول العالم المتحضر وبلبنان ما منعرف شو بتعمل، يعني لو عملتوا ازمة ديبلوماسية كرمال وزير الدفاع كنا مناخد ومنعطي بس انه ازمة كرمال وزير تلفزيون لبنان؟

فرنجية زار البطريرك ورح يحرد اذا استقال قرداحي ما بده يسمي وزير غيره، وهيك طالع بكامل شبوبيته كاوي البدلة، ورافض استقالة القرداحي، ما بده يقدمه فدية، ما خلاه يستقيل، كورقة اعتماد للمرشد المحلي بتذكره بمين صديقه الوفي خصوصي انه باقي ٣٦٥ يوم على انتهاء العهد،

بس المضحك المبكي بكلام فرنجية لما يذكرنا اننا بلد مع حرية التعبير، هيدا التعبير اللي حاولنا نعمله ب ١٧ تشرين، واللي عملوه اشخاص متل سمير قصير وجبران تويني ولقمان سليم وغيرهم

وهيك تجمع محور الممانعة كله ورا جورج قرداحي كالسد المنيع، وفجأة صار بليغ سوق عكاظ كل ما فتح تمه كل ما ورط نفسه وورطنا اكتر

رئيس حكومة البدل عن ضايع ميقاتي متريث باستقالة الحكومة وعم يعمل مباحثات دولية

وخلية أزمة، حضهرها القائم بأعمال السفارة الاميركية شخصياً، قال الوزير بو حبيب حكينا مع الاميركان، هيدي باللغة العامية دخيكم تعوا انقذونا، طب ليه كنتو جبتو القائم بأعمال السفارة الايرانية، ما هيك هيك رأيه هو اللي رح يمشي بالنهاية


topic الاساسي بالبلد داخليا بيبقى القضاء

دياب طلب من المفتي حمايته لانه ما بده يمثل قدام القاضي والمفتي ما تأخر

البطريرك عمل جولة رئاسية ثلاثية الابعاد لدرء الفتنة اللي لعن الله من ايقظها لتغطية عدم مثول جعجع قدام القضاء العسكري

بس القاضي مين بيحميه؟ كان القاضي عم يحقق صار عم يتحقق معه وينرفع عليه دعاوى

بموضوع الطيونة واستدعاء جعجع، الموقف مفهوم وان كان منطق الدولة بقول انه جعجع كان لازم ينزل عالتحقيق، بس اللي محروق من الشوربة بنفخ عاللبن، ومتل ما قالوا مناصرينه لجعجع الزمن الاول تحول

هيدا الحكي مش دفاعاً عن جعجع مني انا شخصيا لاني انا مع محاكمتهم كلن يعني كلهم واللي بيطلع بريء منفتح صفحة جديدة معه، ولكن كمان من منطق الدولة والدعوة لبناء الدولة والمؤسسات مش من المنطق يبقى المرشد الاعلى المحلى حاكم بأمر السلطة والشعب اللي هو مش راضي عليه بصير عميل واللي هو معه بكون اكثر الوطنيين الاحرار

وبرافقه بحملة التبجيل او التخوين مجموعة المطبلين في جريدة الاخبار اللي فجإة بتخلق عندها ملفات سرية ومحفوظة وتسريبات من اكثر الاجتماعات "حساسية" بالبلد

بالعودة لموضوع المفتي والبطريرك والسيد في مجال مثلا نطالب رجال الدين كلن يعني كلن يرتاحوا ويديروا شؤون رعيتهم ويتركوا السياسة للسياسيين والقضاء للقضاة، انه في عبرة من موضوع الاختصاصات عادة، وفينا مثلا نطالب بفصل الدين عن الدولة؟ واذا عملنا هيك بيعتبر حاله المرشد الاعلى معني او لا؟ لان بس بده هو رجل دين ممنوع المساس بمقامه وبس بده هو رجل سياسي حاكم باصبعه البلد.

بس الحليف اللطيف طالع له انياب وكل ما عم تقرب الانتخابات جي بي عم يستشرس لدرجة وقف بوجه التسوية البطريركية الرئاسية الدستورية المخيطة بأنامل نبيهية، اي شو بدكم بهالحكي جبران باسيل ما رح يخليهم يطيحوا بتحقيق المرفأ.. لان احداث الطيونة ما بتتقارن بانفجار المرفأ بس كان ممكن مقارنتها بسهولة بتصويت المنتشرين ل ٦ نواب وعدم تقديم موعد الانتخابات

وحزب العزة والكرامة ما قبلان المبادرة لان ما رح يقبل يطيحوا بتحقيق الطيونة

المشكلة انكم مخبوزين بالكذب ومعجونين باللف والدوران، وما بتقولوا كلمة الحق الا لما قصدكم فيها باطل او حاسبين لها حسابات ربح وخسارة بالسياسة

العقوبات هالاسبوع من فج وغميق شي عربي شي اميركي يعني بعد في طاجيكستان ما عاقبتنا

وحزب العزة والكرامة قال تصنيف القرض الحسن كيان ارهابي تدخل سافر بشؤون لبنان الداخلية، كمان معه حق، بس التدخل بالقتال مع الحوثيين هيدا اسمه تفقاية بزر بشؤون الدول

والعقوبات الاميركية وبعد رئيس الما خلونا طالت المتعهد باسمه، اكيد هيدا لانه مش فاسد بالمرة، هو بيتصلى وراه جماعة بس الاميركان غيرانيين ما لقوا متعهد بنقاوته يستلم سد غابة تونغاس،

وحرام افتروا على داني خوري لان في جارة قالت لجارتها انه بيعرف جبران باسيل وهي وعم تخبرها وصل الخبر للادارة الاميركية قالت يللا منضرب عصفورين بحجر

تماما متل ما لقيوا واحد متل جهاد العرب ينفذ مشروع بشفافية بقيمة ٢٨٢ مليون دولار وعظمة مشروع نفق سليم سلام او بوزن النفايات المضروبة

اما النائب جميل السيد فهيدي مؤامرة صرف تحدي لمحور الممانعة شكلا ومضمونا انه مثلا من وين ممكن يجيب شخص عصامي لواء بالدولة ١٢٠ مليون دولار يستثمرهم مش معقول، بعدين الاميركان لو هني اللي بيطبعوا الدولارات وين كنا منقول، وبعدين هول ال ١٢٠ مليون استثمارهم بال ٢٠٢١ لتهريبهم من الحاكم بأمر الليرة انه بهون عليكم انتو مثلا ياخدهم رياض سلامة، وهيدي محاولة لتدمير صورته قبل الانتخابات وانه هو من كلن يعني كلن (فيديو قوصوا من الشباك)

قبل ما اختم وزير العمل عم يطالب القطاع الخاص بزيادة على المعاش وعلى بدل النقل، هلق هيدا الطلب اللي هيك طالع هيك عالخيرة يعني لا مدروس ولا معروفة انعكاساته لا على رب العمل ولا على الموظف ولا على الاقتصاد سحب الفتيل من الاضراب

ومن بعد ما لحقوا الاتحاد العمالي العام والنقابات يلبسوا شروايل الغضب شلحوهم

ان شاء الله موت اذا عم كذب بس ما بدي علق على موضوع الغار اللي جاية عبر الانابيب للكهربا اذا اسرائيلي او لا ولا انه

العدو الغاشم شفق علينا وسمح للمزارعين بقطف الزيتون بسبب الوضع المتردي.. بس نحن حالفين يمين انه ما نرحم حالنا

وقررت قطر التوقف عن استيراد النعنع والبقدونس والملوخية من مزروعاتنا الملوثة هيدا اكيد بفضل مية الليطاني.. بيبقى السؤال اذا الخضرة اللي عم تصدروها لدول العالم ملوثة بالايكولاي شو عم بتطعونا نحن بالداخل؟ خليني ساكتة