خليني ساكتة ١٢١ - بونابارت لبنان جورج قرداحي متمسك بكرامته.. وبلطوا البحر!

خليني ساكتة

تم النشر في 7 نوفمبر 2021


وأخيرا وصلنا على المرحلة اللي صار فينا نغير فيها كتاب التاريخ نحن ومرتاحين، يعني هالعمر كله كنا ناطرين شخصيات لبنانية فذة تليق تكون بنفس مرتبة فخر الدين المعني، بأهمية المير بشير، وأخيراً رح يكتب التاريخ انه في رجل وقف بوجه المرحلة وقال أنني جاهز أن أستقيل في مقابل مردود وطني وليس شخصياً. هيدي وقعها على تاريخ لبنان رح يكون متل «يستطيع العالم ان يسحقني، ولكن لن يأخذ توقيعي»

بونابارت لبنان لن يستقيل وبلطوا البحر، حقيقة هلق يعني ما صار لك بالقصر من امس العصر، اي متى لحقت تتعلق بالكرسي والمنصب، سعد الحريري بذاته وقال عم يفكر يعتزل ومش طالع حسه.. الميقاتي وزملادك الوزراء ما عارفين كيف يترجوك.. طب انت نجم اوليردي اعطيه هالوجوه النقية فرصة ليبنوا شوي وينجموا..

يعني انت بعدك لما تكون عم تسوق بالطريق او عم تحضر تلفزيون ويطلعوا اعلانات شي عن الشامبو وشي عن الشركات المصرفية انه ما بتحس هونيك كنت معبى مكانك؟ يعني الواحد متل اللي ما اله عين يحكي معك انسان مثقف، مخضرم، متكلم اذا استقلت فعليا شو رح تخسر غير كلمة معاليك.. والحكومة بشو تحديدا رح تتأثر بغيابك؟ انه رح تفقد صوتها الاعلامي؟ او دورها الاستراتيجي؟

قال مدير عام اوجيرو عم يحذر من انقطاع الانترنت؟ شو بدنا نعمل اذا انقطع الانترنت، كيف بدنا نتابع اخبارك استقالة معاليك؟ ووين صرت بموضوع تطويع كرامتك لتلاقي مصلحة الشعب؟

قارورة الغاز صارت ٢٨٠ الف، الف ينطح الف، بس نحن لازم نتابع اخبارك الك، اخبار راحتك النفسية معاليك واي متى ممكن تحس حالك مستعد تستقيل..

على فكرة قضيتك هيدي رح تغطي على بيسكويت ماري انطوانيت، يعني رح تمحي انجازات لويس السادس عشر رح تبين ما شي بمقابل موقفك البطولي..

بس كل خوفي تغطي قضيتك على انه حسين قاووق عم يأبلس بيئة المقاومة، البيئة كلها بإمها وبيها والماءة الف مقاتل بخطر من استهداف وتنميط حسين قاووق الها قادرة تتحمل كل الحروب والضغوط والمؤامرات اللي عم تحاك بوجهها بالداخل والخارج العربي والغربي بس نكتة حسين قاووق مش عم تعرف كيف تهضمها، هو الوحيد اصلا الحريص على هالبيئة وبيعرف مصلحتها اكيد بعد المرشد الاعلى المحلي هو السيد ابراهيم الامين وجريدته الحرة الابية..

يعني مش بس حزب العزة والكرامة حوّل مهامة من تحرير القدس لرفض استقالتك، لا وكمان تحول الشعب من متأمل باستعادة الاموال المنهوبة ومحاسبة المجرمين بانفجار المرفأ لمتأمل بشأن إستقالتك

بونابارت بس بدي خبرك شي اذا بعد ما حدا خبرك اياه انت وكرامتك ومكانتك رح تصير تفصيل كتير صغير تماما متل حماية الحدود بس يقدر المرشد الاعلى المحلي وجماعته يزيحوا القاضي بيطار اللي وصلهم انهم يتعاونوا مع قضاة ما خصهم بالقضية ليكفوا ايده عن قضية المرفأ

هلق اذا في نية للمضي قدماً بهالحكومة، وعدوه بمقعد نيابي، ما بعرف ماروني هو؟ حطوه رئيس انه وين رح تلاقوا واحد يتمسك بكرامته معكم هلقد؟

من حسنات قضية بونابارت حكومة البدل عن ضايع، لا عارفة تجتمع ولا رح تعرف، انه خلانا ملهيين عن بشاعة المنظر اللي شناعتكم السياسية وصلت اهالي ضحايا المرفأ مختلفين بمطالب مختلفة، كمان خفف من وهج الصهر المعجزة وحربه ضد الطقس وموعد الانتخابات

باختصار بالسياسة نحن بلد معفن فاشل مفلس منهار من قوة عهده ورئيسه اللي ما قادر يمون على حاميه وعرابه وحليفه بإنه يمشينا ويقيل وزير

على الهامش قال سالم زهران انه المطلوب تهجير المسيحيين من لبنان وهي مؤامرة كونية، معه حق فيها بس نسي يقلنا تحديدا مين اللي عم يغذيها لهالمؤامرة ويعملها اقرب للتحقيق عبر تهير كل واحد بالبلد ما بيشبه الطغمة الحاكمة والحاكم بأمرها؟ ويا ريت كمان ينتبهوا انه هالماآت من الالوف من المهاجرين لوين عم يروحوا؟ ويخبرونا قديه نسبة اللي فلوا اللي هاجروا على الصين وايران وسوريا والعراق والاراضي الممانعة بمقابل اللي عم تحفى لتوصل على بلاد اوروبا واميركا او بالقليلة دول الخليج لنعرف تحديدا اي نموذج يريد اللبنانيين واي نموذج بيسعوا ليعيشوا بكنفه

ان شاء الله موت اذا عم كذب بس نحن عايشين بدولة مخطوفة، رهينة عند ايران ومرشدها المحلي، اذا زعل البلد كله بده يزعل اذا رضي البلد كله بده يرضى باختصار الامر الناهي الحاكم بأمر السلطة متربع على عرشه خليني ساكتة