مجلس القضاء الاعلى هاله شو عملوا اهالي الضحايا من تعتدي على القاضي مزهر، بس القاضي مزهر يتعدى ويعتدي على قضية مش قضيته ما هاله، القضاء يتهدد بالعادلية من الحج وفيق طبيعي، القضاء ينرفع بوجه الاصبع على التلفزيونات امر مقبول لا بيتطلب مجلس قضاء لا آعلى ولا أوسط ولا حتى اصغر.. وحق ضحايا المرفأ علقان بين كف ايد القاضي بيطار عن التحقيق، ورد القاضي بيطار عن التحقيق، ورد الكف، وكف الرد، ورد الرد، وكف الكف، ورد رد الرد..
بس ما تفكروا هيدي الردود عم بتصير والسلطة غافلة عنها ابدا، الرئاستين الأولى والثانية عم يتراشقوا بالتغريدات، عصافير تزقزق في ظل السما الصافية والشمس الساطعة بالبلد المزدهر
وجي بي مشغول عم ينخل نواب الامة، عم يغربلهم، ويشوف مين مع التيار بيستاهل انه يمثل الشعب، وبيستحق يكون جنبا الى جنب مع وج السحارة الصهر المعجزة
على الهامش حزب الله ما عنده سيطرة على البلد عنده تأثير بس هو مش مهيمن، هني اصلا بحزب العزة والكرامة مجموعة من الinfluencers متل ما المتواجدين منه باليمن هني مستشارين، واهم شي هيدا التغيير بالخطاب والدور لحزب العزة والكرامة بحرب اليمن، للصراحة يا سيد انت اهم مين ركّب دينة الجرة متل ما بده. حزب العزة والكرامة مستشارين bloggers بيشرحوا الفرق بين العميل والوطني، واللي بيقبض من السفارات وصاحب الحس الوطني، بعدين الديموقراطية أساس الحكم عنده، من هيك صناديق الاقتراع هي اللي رح تحكم، على أمل ما يكون تقبل نتائج الانتخابات على قدر تقبلها بالعراق.
وبيبقى انه المهم هزمنا الاميركان وحدينا من هيمنتهم على وطننا، هني من كتير زمان حاطين عينهم على انجازاتنا بملف النفايات والبنى التحتية وحقوق الانسان وحرية التعبير والاهم من كل هيدا الهيمنة على مرافق الدولة العامة متل معامل الكهربا، ومن وقت اللي اعلن السيد هزيمتهم نزل الشعب الاميركي مطأطأ الرأس بالشوارع، هاتف بمئات الالوف بده هجرة ع لبنان. اما بملف السعودية مش عم بفهم ليه عتبان عليهم ياسيد؟ هيك بيعملوا الاصدقاء؟ ما نحن ما مننهار، ومتل ما قتلت حالك كرمالنا لتجيب النفط الإيراني وتنقذنا، صدر على إيران وانقذنا، هونيك ما بحطوا علينا شروط وهني مع حرية التعبير، وبقدروا المواهب الكبيرة متل بونابارت لبنان وبثمنوا كرامته.
مرضى المخدرات بخطر، مجموعة من المستشفيات بدها تسكر مطلع العام المقبل، الانهيار ماشي على قدم وساق بمختلف المجالات، في ما عدا الدولار عم يحلق خارج السرب.. بس ما تشغلوا بالكم الهيمنة الاميركية محدودة وفي جهوزية تامة بوجه العدو الصهيوني.
على الهامش، وزراء الحكومة عم يشتغلوا وزير الأشغال بلش مناقصات العمل بإعادة إعمار المرفأ، ووزير الصناعة عم يشتغل لمصلحة البلد ووزيري العمل والسياحة متمسكين بدور المرفأ الاستراتيجي، هني ذاتهم الوزراء المقاطعين للحكومة اعتراضا على التحقيق بانفجاره.
وزير الطاقة، خبر رئيس الجمهورية انه كلفة توليد الكهرباء عالية، ووزير الاقتصاد جال على اصحاب المولدات، بس جائزة افضل performance هيدا الاسبوع بتروح لوزير الداخلية بسام المولوي، اللي سمع مش بس لنبض الشارع لا ولنكاته كمان وطلب بتقرير وتحقيق بشنط المنتخب الايراني، من ورا السوشيل ميديا، بس يا ريت حدا يسألنا اياه التايم لاين تبعه ببين له المطالب بالسماح بملاحقة رؤساء الاجهزة الامنية بقضية المرفأ او لا؟
قبل ما اختم رئيس حكومة البدل عن ضايع الميقاتي، قال ممكن للمودعين استرجاع اموالهم بعد ٢٠ سنة، الملفت غياب كبير اللصوص عن الاعلام وال trends هالايام لان على ما يبدو في delegation بطرق الاحتيال على العالم يمين شمال. وقال طوني بك فرنجية كمان عم يقترح على المودعين انهم يسترجعوا اموالهم بعد عشرين سنة اذا استثمروها بقطاع الكهربا، يعني المصيبة مش بس انه هيدا تلميح انكم باقيين على قلبنا ٢٠ سنة تانيين، الا انك بدك ايانا نستثمر بأكتر القطاعات نجاحا بلبنان، يعني اضمن يمكن تخلينا نستثمر بتبخر بالمياه على السما قبل تحولها غيوم وتضربها هبة هوا باردة وترجع تشتي لنا الميات.
ان شاء الله موت اذا عم كذب بس نحن عم نتحول ليوم بعد يوم لبلد خارج عن القانون، بيهرب عليه رجال أعمال متهمين بقضايا نصب عالمية، رجال دين محكومين باغتصاب اطفال، رجال ميليشيات متهمين باغتيالات سياسية ورؤساء حكومات، والاخطر من هيك أهم رجالات سياستنا واقتصادنا على لوائح العقوبات و ملاحقين ببلاد العالم بتهمة النصب والاحتيال وتهريب الأموال والفساد.. خليني ساكتة
