خليني ساكتة ١٢٤ - الرئيس عون ما رح يتركنا للفراغ.. ومع السيد ما وقفت ع الغلطة بتاريخ الاستقلال!

خليني ساكتة

تم النشر في 29 نوفمبر 2021



اخدنا فرصة الطلاق الاسبوع الماضي قصدي الاستقلال ما تقولوا اني ما ريحتكم من النق

طب انا كان بدي كمل بالتفاؤل وبنقل المعركة لمرحلة اكثر تقدما والفوكسة على الاستحقاق الانتخابي، وبلش حقيقة لاقي طريقة نحكي فيها بهيدا الموضوع لانه الاهم والامل الوحيد اللي رح يخلصنا من هالمنظومة وعلى مرشدها الاعلى وحزبه..

بس هيك طلع قدامي كم خبر حسيت لا بد من اني اقرا عناوينهم من دون ما علق عليهم لان العنوان كافي ووافي

عراجي: 60% من اللبنانيين لا يستطيعون دخول المستشفيات حتى لو كانوا خاضعين لجهات ضامنة

اليونيسف: 8 من كل 10 أشخاص في لبنان يعيشون بفقر و40 بالمئة من

الأسر باعت أدوات وأثاث منازلها

هيدي العناوين، بتجي بين اخبار الدولار اللي صار ٢٥ الف، وربطة الخير اللي ب ١٠ الاف ليرة، والغلاء اللي ما عم يعرف اللبناني من وين عم يضربه، وهي بصلب المعركة الانتخابية اللي ما رح تصير ب ٢٧ آذار ٢٠٢٢ بحسب اقوى رئيس بتاريخ الجمهورية، قال هو معترض على التوقيت كرمال البرد مش كرمال صهره، كان في تقرير تلفزيوني طلع اشار الى انه من اصل ١٦ سنة من يوم اللي رجع عون عالبلد، عطل عون البلد حوالي ٩ سنين، كرمال عيون الصهر المعجزة، الاهم انه وجه لنا الرسالة الاخيرة بالعهد يعني الاستقلال الجاي رح يكون خلص العهد القوي تحضروا لما بعد هيدي الفترة، هيدي بعالم الابراج ممكن انها تنقال من بعد الغيوم بكوكب عطارد بفوت ميركور على مارس وبيشهد البلد انفراجات

انفراجات متل اللي عم يوعدوا فيها بملف انعقاد الحكومة،

هلق بي الكل كان عمل لنا سوسبانس وبلش يحضرنا نفسيا انه ما رح يترك الرئاسة للفراغ على اساس هو لما استلم البلد استلمه من المعبى، من الطايف.. بعدين مين اللي قال لفخامتك انك انك بس تفل يتترك فراغ، ما ملاحظ انه وجودك متل عدمه؟ لا بل ممكن يكون الفراغ افضل من وجودك.. لان يعني ما تآخذنا فخامتك شو مقدم وشو مأخر حضرتك؟ يعني انه من اي متى هالطبقة الحاكمة او عدمها اذا صار فراغ منوصل على الانهيار الكبير؟ طب حدا يخبرنا شو الانهيار الكبير عم يأثر بحياة اللبنانيين بشكل ايجابي، ما صايرين متل عزرائيل اذا ما سحبتوا روحنا بتسحبوا شقى عمرنا..

مش مهم المهم ما نكون عبيد عند السفارات نكون اسياد عند اسيادنا ونستعبد العالم لصالحهم

على الهامش كتير عاجبيني مواقف انور الخليل.. انه هو نائب من قبل ما انا اخلق، بس بهالدورة الانتخابية واضح انه مواقفه صايرة هدارة بعتقد عم يقول مش باقي بالعمر قد اللي راح خليني ريح ضميري

على الهامش ما بيستحوا يطلعوا خبر بعنوان

بري ربح حسم قضية البيطار بمجلس النواب إذا تعذر الحل قضائيا خلال اسبوع .. الضمير المتصل هون بروح لمعدومي الضمير اصلا اللي بعد ما حرقوا الاخضر واكلوا اليابس انقضوا على اهالي ضحايا انفجار قضى على نص العاصمة

هيدا الانفجار اللي خلى اي شي منفكر فيه بلا قيمة واي عمل؟ الخسارة كتير اكبر واكتر وجع لان ببساطة صار المشهد اذا قتلونا وما قدرنا نوقف بوجهم بالقضاء طب وين الامل وبمين الامل وكيف ممكن نوقف ضد منظومة لا قادرين نحاسب النصاب فيها ولا الحرامي ولا القاتل ولا حامل السلاح كل الحساب عم ينزل على القتيل اللي كل

يوم بموت بأكتر من طريقة

قضاة اصحاب ضمير عم يستقيلوا احتجاجا على التحقيق بالمررفأ، واستدعاءات بالادراج، والاهم صور الاقمار الاصطناعية الروسية بخزنة بو حبيب خلص بأمان قال بس يوصلوا لوزير العدل ، منخلص

هيدي الصور ممكن تخلي الحكومة تجتمع، هيدي الحكومة اللي لو بقيت على الوعد كانت شالت الزير من البير، هلق هي علقانة بمحلها ومعلقة بين القرداحي وتحقيق المرفأ، الشي الوحيد اللي ماشي فيها قرارات الاعدام الاجتماعية والاقتصادية.. هيدا كله بلا موازنة ولا ميزانية لان اصلا ما رح يعرفوا يقرشوا قيمة العجز عالدولار.. على فكرة سمعتوا بخبر انه رئيسة وزراء السويد استقالت بعد ٢٤ ساعة على تشكيل الحكومة لانها فشلت بتقديم موازنة، هيدي الدول الفاشلة اللي ما بتعرف تتحمل المصاعب.

وكمان هيدا الاسبوع شهد تظاهرات بتركيا بسبب ارتفاع سعر صرف الدولار، يا حرام على الاتراك يجوا يجوا يتعلموا من الشعب اللبناني العظيم الصمود، بس مفهوم اصلا هني شعب مش مقاوم وما عندهم حزب العزة والكرامة وبالتالي السفارات اذا وزعت مناقيش على المتظاهرين ما بتكون مؤامرة كونية على حماة الديار والمنظومة

نحن املنا معلق على الانتخابات، وعلى ال ٢٤٤ الف مغترب انهم يكونوا احرار بخياراتهم بعيدين عن مقصلة النصابين والمجرمين، ولكن كمان صار لازم ننتبه انه ما بقى في وقت نخسره وانه صارت المعركة بتستلزم لملمة صفوفنا وبناء جبهة موحدة بوجه the elephant in the room

اي بشكل مباشر بوجه حزب الله وما يمثله من غطرسة سياسية بتوزع فحوصات دم وطنية على اللي بدها اياه

هلق اهضم نكتة اللي عم يلموا حولها العالم، انه قال المغتربين ما فيهم ينتخبوا اللي عليهم عقوبات وبالتالي لازم الزخم الانتخابي بالداخل لتعويض التضييق على التضييق الخارجي، على اساس مثلا بالجنوب اذا حدا بده ينتخب ضد الثنائي بكون في توسييع عليه، وبيفتحوا له باب حرية التصويت على مصراعيه

قبل ما اختم كان لافت تصريح الحريري يوم الاستقلال، شو اللافت فيه؟ انه صرح؟ طلع انه بعده بصرح هلق شو فرق التصريح من عدمه مش مهم المهم هو ارتاح نفسيا وصرح يعني هيك هيدي ثيرابي متل اخد السيلفيات مع المقترعين بعد الانتخابات..

وكمان كان لافت هالاسبوع الشفافية المطلقة اللي بيتمتع فيها كبير اللصوص رياض سلامة يعني اوف اوف اوف شو هالاداء بمحاسبة النفس والاوديت على الثروة والاهم من هيدا كله الحفاظ على احتياطي ال ١٤ مليار دولار والتعليم على صندوق النقد الدولي اللي هو وفرنسا وسويسرا والكرة الارضية عم يشككوا بنزاهة الحاكم بأمر الليرة بس وما همه اهم البرامج تحت امره لتبييض صفحته قدام العالم.

بس هيدا التبييض ما قطع على غادة شريم تتذكروها؟ اي قالت السيناريو نفسه يتكرر منذ حكومة حسان دياب، هروب من الاجوبة ومماطلة غير مبررة.

ان شاء الله موت اذا عم كذب بس رفعوا الدعم عن الدوا وعن المحروقات وعن النِفِس بس وليد بيك عم يتساءل اين اصبحت البطاقة التمويلية ولماذا يتم التعتيم عليها او التنصل منها؟ قال هو يعني حريص على المواطن وحقوقه وال

well being

تبعه، معركتنا مع هالمنظومة بالانتخابات ومعركتها معنا كل يوم بس ما عنا خيار الا انه نحارب لاخر نفس متل احراجنا اللي كل سنة بتحترق وطرقاتنا اللي كل سنة بطوف والاغلبية الساحقة بعدها ماشية ورا الزعيم .. خليني ساكتة