خليني ساكتة ١٢٦ - سيمفونية نصب بقيادة رياض سلامة.. وعزف طبقة حاكمة فاسدة مجرمة!

خليني ساكتة

تم النشر في 12 ديسمبر 2021


 انفجار بيروت آخر كان الليفيل الاخير من الوجع، وقت اللي انقلتنا ببيوتنا وما انزلنا نتفناهم بإيدينا عرفوا انهم ربحوا

وهيك تحول البلد لنكتة نكتة سمجة

بسماجة حكامه وزعماؤه

خلصت المفردات اللي ممكن توصفكم، انتو مجموعة من الحكام النصابين الحرامية، الفاشلين والاهم من كل هيدا مجموعة من المجرمين

وللأسف اغلبية الشعب متل الأغنام الماشية عالذبح بلا ما تطلع يمين شمال

بتنزل السلخة ع راسنا منحكي ومتعلق ع السوشيل ميديا ومنكمل حياتنا

خدوا مصرياتكم ع ٣٩٠٠ مناخدهم على القرار ١٥٨ مناخدهم عل ٨٠٠٠ مناخدهم

هيدا كبير اللصوص رياض سلامة لازم يطلع له جائزة نوبل للنصب

حقيقة كيف يعني بلد ماشي على هالحفلة النصب اللي ما بتخلص المايسترو رياض سلامة ومن ورا الطبقة السياسية بإنها وبيها

بس مَش العونيين للامانة العونيين ما بدهم اياه ندموا على التمديد اله وكمان ندموا انهم سرقاتهم وعمليات النصب تبعهم كان هو مغطي عليها لان وصلوا هلق لمحل مسكر

هيدي السلطة قد ما هي ذكية وكل طرف عارف انه ما بيتأمن له، كان مأمن رقبته من التاني، وهيك صاروا يلتفوا على بعض لتحصين حالهم، بيعملوا العملة وبيطلعوا يتلوا فعل الندامة

جلسات بمجلس النواب، ومجلس وزراء واقف او ماشي عهد واعي او نايم ما بقى رح تفرق حقيقة بحس الواحد انه ما في امل

طب يعني في نكتة اكبر من انه مجموعة نصابين خبروا اشخاص انه في دولارات بتخلص مدتها؟

اضطروا الاميركان شخصيا يتدخلوا، هيدي المؤامرة الاميركية بتوعية العالم مَش مسموحة.. ما فيكم تتدخلوا بالشؤون الداخلية للنصابين وتقولوا انه الدولار ابيض او اخضر او اسود هو دولار وعلى فكرة بلشوا الشبيبة الطيبة يحضروكم لدولار ب ٦ ارقام يعني ١٠٠ الف ٢٠٠ الف ٢٥٠ الف .. لا وانه عادي بيقدروا حتى بلا يحضرونا نفسيا يعملوا العملة ليه شو يعني رح نعمل؟ اكتر شي بيطلع معنا نجيب شباب تورس نو يرقصوا وكمان رح ناكل اتلة، اي نوع من انواع الاختلاف مَش مقبول فشر

بس ما علينا خوف عنا رجال بتحب لنا حقنا من قلب السبع هيدا جي بي رفض قرار وزير العمل انه يسمح للفلسطينيين ومكتومي القيد يشتغلوا قال هيدا توطين مبطن النكتة وين انه حسسونا انه في شغل عّم نتقاسمه مع الجنسيات الاخرى على الاراضي اللبنانية

لا ونقيب الاطبا اعترض على الموضوع قال بدهم يزاحموا ع سوق العمل على اساس بعد في شي طبيب عليه القدر والقيمة ما حمل حاله وفل.. وبعدين ع اي سوق تحديدا بدهم يزاحموا؟ على سوق النصب الجديد بين شركات التأمين والمختبرات والمستشفيات والصيدليات صار المريض بده خريطة طريق بين نصابي المصارف ونصابي المستشفيات

وزير الشؤون الاجتماعية اسم الله مبسوط قال يوميا عّم يتسجل ٢٥ الف عيلة للبطاقة التمويلية، هيدا شي ببكي ما بيبسط يا زعيم لانه مؤشر على وين وصل البلد بالعهد القوي الراعي الرسمي لوصلك عالوزارة

طلع صوت وزير الاتصالات قال ما تخافوا ما رح يزيدوا كلفة التشريج ولا داعي للتهافت على الشراء لان بده مجلس وزراء.. انا بقول اوثقوا فيه لانه عارف انه ما في امل ينعقد مجلس الوزراء يمكن لبعد الانتخابات النيابية اللي على ما يبدو لن تحصل.. بلش النعي قال هني ما رح يمددوا كرمال يضمنوا المغتربين يقدروا يصوتوا ما الان قلب يخلوا اصوات ٢٤٤ الف لبناني برات المعادلة بدهم يسمعوا صوتهم بشفافية لان اللبنانيين بدول العالم ممكن يكونوا عّم يعانوا من مضايقات في حال قرروا ينتخبوا افرقاء معنيين انا سمعت في لبنانية عملت حفل انتخابي قاموا ضايقوها بالمجر لان كان في شباب عّم يرقصوا عندها هني وعاريي الصدور

على الهامش قال في هونيك واخد رافع دعوى على امونز قال عّم تهين العلم والعهد، طلعت امونز مهدمة البلد وجايبتنا جورة خلص بس يربح الدعوى كل شي رح يزبط اموال المودعين رح ترجع، موقع لبنان على الخارطة العالمية والاقليمية، الكهربا رح تجي رح يقدر يكوي العلم اللي هانته امونز، لا ومصدق حاله الاخ.. اي اي ارفعوا دعاوى على كل واحد بشره صورة البلد بس المجرمين والنصابين والحرامية اللي حاكمين هول اصلا لازم يتحاكموا قدام محكمة خاصة لمحاكمة الوزراء والرؤساء.. او بنبقى عم نعطل القاضي كل ما جرب يفتح تمه ويستدعي حدا

قبل ما اختم السفيرة الاميركية زارت المجلس الشيعي الاعلى، فاتت بكامل اناقتها عملت اجتماعها وضهرت عاموديا

معقول نائب الرئيس صار شيعة سفارة؟ لان بحسب البيانات حكي معها على اهمية المساعدات اللي بتعطينا اياهم..

ان شاء موت اذا عّم كذب بس قال جورج قرداحي مصدوم انه استقالته ما احدثت خرق بالعلاقات مع السعودية، يعني نحن خسرنا هالقامة الوطنية وماقدرنا نسترجع علاقاتنا مع السعودية، وعلى فكرة قال وزير خارجيتهم انه ما عندهم مشكلة مع لبنان ومشكلة لبنان بين اللبنانيين وحزب الله.. هلق هو قال اللي تلات ارباع اللبنانيين عّم يقولوه بس لما نحن نقوله بقولوا عنا انبطاحيين… خليني ساكتة