خليني ساكتة ١٢٧ - القضاء ما عم يسمع الكلمة.. وجبران باسيل بده يربي "المنظومة"!

خليني ساكتة

تم النشر في 26 ديسمبر 2021

بدك تسحب ١٠٠٠ دولار

منحول لك اياه ع ٨ الاف منقسمهم ع ٢٣ الف بترجع انت بتضربهم ع ٢٧ الف قسمة ٣.٤ باليد ٧.٢ و١٠ عالشجرة بتنقص منهم ٩وربع بتاخدهم بالدولار وبالباقي باللبناني هيدا التعميم رقم ١٦١ الصادر عن كبير اللصوص رياض سلامة

، هلق المفارقة انه المصارف اللي بيتسابقوا عالنصب كل واحد فيهم حرّف التعميم بطريقته فواحد بس بده يعطي ٥٠$ والباقي باللبناني والتاني بده يعطي ٧٠$ والباقي باللبناني والتالت مرتاح ع وضعه ما بده يعطي دولار بالمرة والشاطر يحاسب..

بالاسبوع قبل الاخير من ٢٠٢١ رجعت الطوابير على المصارف.. هيدا المسار الطبيعي بالعهود القوية، خصوصي انه ابرز المتقاتلين على بواب المصارف هني من القوى الامنية والجيش والقطاع العام.. هلق الخوف الوحيد انه اسرائيل جنوبا وداعش شمالا يستغلوا انشغال جيشنا بالحصول على ال ١٠٠$ ويتسللوا عن الحدود وينتهكوا سيادتنا.. او يمكن الحدود بأيدي امينة طالما في ١٠٠ الف مقاتل بالبلد بعدهم عم يقبضوا بالدولار وعيونهم ١٠ ١٠ على العز والكرامة

الحكومة بالايام الاخيرة من السنة بعدها ما قادرة تجتمع الحق على القاضي بيطار لانه عمل القضاء سوق انتيكة، تخايلوا بعده مصر يستدعي المقصرين بجريمة العصر علنا ويطالب بتوقيفهم فورا، عن جد مش مسموح هالزلمة ما بيعرف اسس الحكم والقضاء اللي بصير عادة بتدوير الزوايا ودراسة الحلول من تحت الطاولة بعدين بيطلعوا وبيعلنوا التسويات كل هالعمر وعرف يتعلم ولا شي من المدعي العام المالي على ابراهيم.. يعني لو تعلم ١٪ منه كانت انحلت هياه بلد بكامله انّهب وافلس وانسرق وواحد واحد بس ما تم الادعاء عليه.. هو اصلا لو القاضي بيطار من الاول فضى العادلية كلها من الموظفين وعزم على حسن خليل على فنجان قهوة متل عمل المدعي العام المالي مع جبران باسيل كانت بينت الحقيقة.. بس هو هيك عنيد وعنده فوّت البلد كله بالحيط.. ومش بس صار في تشهير بالمقصرين اللي ما عم يمثلوا قدام التحقيق لا وكمان بيّن انه ما بيسمع خطابات المرشد الاعلى المحلي يعني ٨/٩ خطابات ولا حياة لمن تنادي عم يتخنها القاضي بيطار

هلق هو القضاء بشكل عام مش عاجبنا هالايام، يعني شفتوا مثلا المجلس الدستوري انه معقول يعني زعل جبران باسيل وعرض حقوق المنتشرين للهدر؟ مش مسموح عن جد هالقضاء فاتح ع حسابه صاير بلبنان ما بقى عم يتهدى، ما بقى في احكام غب الطلب.. وبعدين المشكلة انه بموضوع متل موضوع الانتخابات حتى الرئيس عون بي الكل قائد العهد القوي ما قادر يعمل شي، انه مش معقول يقدر يوقف الانتخابات سنتين متل ما عمل بترقيات قوى الامن لاخر شي يعملها ع ذوقه متل لما رقى سوزان الحاج اللي المفروض معاقبة مسلكيا لرتبة عقيد.. بس اصلا هو كان ناوي عالاصلاح والتغيير بس ما خلوه.. ما شفتوا كيف ضغطوا عليه بموضوع رياض سلامة واضطر يجدد له؟ بس هو وحلفاؤه بيقدروا يعطلوا البلد مرة كرمال قاضي ومرة كرمال صهر بس انه يضربوا اجرهم بالارض ويعطوا البلد الى حين اقالة رياض سلامة فشر ببطل فيه راجح اقتصادي على مين بده يطلع ينشر سيناريوهات سالم الزهران اذا مثلا بطل فيه رياض سلامة؟ وجبران مين بده يلوم.. بس هو بالبترون قال بتروح المصاري وبيبقى هو والحرس القديم.. ونبضه كتير قويان قبل الانتخابات قال عم يحاول يستقطب الشارع المعادي لحزب الله بإنه هو متميز عن الثنائي الشيعي وحزب الله للحقيقة بعد هالاداء الرائع الكم بالحكم.. كبيرة المزحة هاي

على الهامش انا كان عندي كورونا ومن هيك ما كان في حلقة الاسبوع الماضي، بس قضيت فترة المرض عم حاول افهم معركة جبران باسيل لضمان حق المغترين بانتخاب ٦ نواب بدل من ١٢٨، حاولت لاقي سابقة تاريخية او جغرافية بهيك قانون انتخابي، ما قدرت لاقي لا بديموقراطيات العالم ولا بديكتاتورياته، انه ما عم بفهم هلق المغترب المنتشر المهجر اللبناني لازم ينتخب نائب عنه بتشيلي مثلا.. انه على هيدي القاعدة لازم وقت الانتخابات الاميركية مثلا يرشح الحزب الديموقراطي على بزي عن المنتشرين الاميركيين بمنطقة بنت جبيل؟ ويترشح سيمون ابي رميا عن تولوز التحتا عن المنتشرين الفرنسيين بمنطقة جبيل؟

ان شاء الله موت اذا عم كذب الشيخ نعيم قاسم من بعد رئيس الجمهورية قال اللي مش عاجبه الوطن المقاوم يهاجر والشعب اللبناني التابع منه قبل غير التابع عم يتمنى يلاقى شي بلد يلمه لان من الواضح انه العهد القوي وحلفاؤه بنهاية ال ٢٠٢١ اذا آخدينا على محل آخدينا على نهايتنا.. خليني ساكتة