خليني ساكتة ١٢٨ -تسلم وتسليم بين ٢٠٢١ و ٢٠٢٢.. من الانهيار الكبير الى الانهيار الاخير؟!

خليني ساكتة

تم النشر في 2 يناير 2022




ودعنا سنة غير مأسوف عليها لنستقبل سنة على الارجح رح تخلينا نترحم على اللي راحت

٢٠٢١ سنة "الانهيار الكبير"، سنة "الفشل الخطير"، سنة "النهب الأثير"، سنة "الدولار المهيب".. سنة اذا قررنا نمنحها عنوان واحد بتزعل اللغة العربية من جهة والزعماء بالبلد من جهة تانية

٢٠٢١ شهدت احداث اساسية بالخريطة السياسية للبلد، عادة هيدي الاحداث بأي بلد ممكن وصفها بالمفصلية، بس لاننا بلبنان هيدي الاحداث قطعت بس لتمرق الوقت اسرع لما نحس بالملل

على الساحة العالمية سجلنا حضور بسويسرا وفرنسا اللي عم يستهدفوا كبير اللصوص الحاكم بأمر الليرة بمؤامرة عم تطالب بالتحقيق معه بتهمة الفساد وتبييض الاموال

على الساحة الاقليمية ابرز ما سجلناه هو تهريب الكابتاغون بالفاكهة على انواعها.. وهلق الشباب عم يتدربوا على كيفية حشو الكستنا والكرز بالكابتغون

اما على الساحة المحلية كان عاماً مفعماً بتشكيل الحكومة، قضيناها اشهر ناطرين عون والحريري يتفقوا ما منعرف ع شو، المهم ما اتفقوا صرنا ناطرين نجيب ميقاتي وعون يتفقوا.. وبس اتفقوا زعل الثنائي الشيعي، زعل عبر من ٢٠٢١ لل ٢٠٢٢ مرورا بأحداث الطيونة وشبح تحقيق المرفأ مغطاه

اذا بتراجعوا اكتر الكلمات بحثا على غوغل بلبنان بال ٢٠٢١ الارجح يطلع قديه الدولار.. ومن بعدها اي دولة بالعالم ممكن تقبل انه نهاجر عليها

من اللي ممكن نوجه تحية لاصرارهم بهالسنة المرشد الاعلى المحلي حسن نصرالله اللي ما زهق ووسع اهدافه الاستراتيجية والى جانب تحرير القدس صار في تطيير القاضي طارق البيطار من التحقيق المسيس.

الرئيس بري بقي بيضة القبان، من بعد ما بطل يطلع أرانب وحلول سحرية معه، خصوصي بعد كسر كلمته بموضوع الدولار.. بس بعده هو الاوعى للمصيبة اللي واقع فيها لبنان وبعده ضد اقالة رياض سلامة لان معقول يصير الدولار ب ٢٧ الف وينهار الاقتصاد اذا غيرنا الضباط بالحرب.. آه هيدي لنجيب ميقاتي، هو هيك من فوق رئيس حكومة البدل عن ضايع بشوف المصلحة الاستراتيجية اقتصاديا وبظن دخول اورانس على المشتري بال ٢٠٢٢ رح يقضي بشكل نهائي على ودائع العالم.. وراح يطير ما تبقى من الاموال المنهوبة اصلا، على استكتابات ببلد حتى الاشجار عم تتمنى تهاجر منه.. بس سعد الحريري راجع.. يعني غير هالمواقع الاكترونية ووسائل الاعلام اللي عايشة على مين بيدفع اكتر وعم تحط budget الانتخابات ما بعرف مين كان انتبه يسأل وينه سعد الحريري او اذا رح تيرشح او يعتكف.. هلق نزيه نجم طمنا انه بعد راس السنة الشيخ سعد راجع يطل علينا بيبقى السؤال هل يأخد سعد الحريري السيلفي الاخيرة مع مناصريه او يتخلى عنها؟

وسنة ال ٢٠٢١ كانت سنة الاعترافات الخطيرة، هيك عرفنا انه وليد بيك مهرب ٥٠٠ مليون دولار بس صارفهم بمحلهم عالطايفة والمناصرين.. والشعب بس عرف انه المصاري انصرفت بالمكان الصحيح ما بقى انتبه حتى يسأل من وين اله كل هالمصاري وكيف هربهم ومين ساعده يهربهم؟

على الهامش الحكيم والجمهورية القوية عن يدرسوا الوضع وعم يوزعوا هلق الاوضاع بين السطور.. والعين على التحالفات ووين ممكن زيح الاستراتيجية يفرض حاله على زيح التكتيك، ويطلعولنا بشي حلف على قاعدة اوعى خيك او انتخب بيك.. علماً انه الدفة مايلة لصالحهم بعد ما انهم خاضوا معركة تعطيل الحكومة والعهد القوي وقطع الطريق ع جبران باسيل.. آخ هول مش القوات عملوا هيك هول الطرف الاخر من مذكر التفاهم، طب لماذا قولكم يا احبائي الرئيس القوي ما سمى المعطل وما فجر القنبلة.. عن جد الله ستر وما فجر القنبلة او كان انتهى العام بطريقة مأساوية بس قال الحج وفيق كان عقله اكبر وسحب الفتيل قبل الانفجار.

على الهامش الثنائي الشيعي انهى ٢٠٢١ متل ما بلش ال ٢٠٢٢ عرضة لمؤامرة ارض جوية من كافة انحاء المعمورة وغير ما يدخل اورانوس على نيبتون ويبرم من حد بلوتو ما ممكن شي يأثر على شعبية الثنائي او على نتائجهم بالانتخابات اللي من المتوقع تصير ب شهر ايار

قبل ما اختم قال جبران باسيل لن يبحث التحالفات النيابية قبل حسم موضوع الرئاسة، معه حق هلق صحيح الطقس بأيار ما رح يلعب ضده بس انه ما في يترك الموضوع للصدف.. لان بكرا بمعركة الرئاسة بيجوا بقولوا خلونا نعتمد المعيار تبع آخر مرة صاحب الاكترية النيابية المسيحية هو بسمي الرئيس وحذروا شو رح يطلع انه كان باسيل بده يكون هو المقصود.. بس الناخبين ما خلوه

ان شاء الله موت اذا عم كذب بس بال ٢٠٢٢ العيون موجهة على ال ان جي اوز وكيف عم توزع مصاري على المجتمع المدني وعلى الحصار العالمي اللي رافض يعطي السلطة اي مساعدات قد ما بيوثق فيها.. وبظل كل هالتطورات من وين بدها تجي اموال الحملات الانتخابية هيدا اذا صار انتخابات .. خليني ساكتة