قبل كل شي واي شي بدي اطمن على المعتقلين اللبنانيين بدول الخليج
لازم الرئيس عون هلق دغري ومن دون اي تأخير وجبران باسيل الخبير بشؤون المنتشرين يطلقوا خط ساخن للاطمئنان على ٣٠٠ الف رهينة بدول الخليج
بالقليلة لازم نطمن انهم يكونوا بالقليلة عم يقطعوا عنهم الكهربا كم ساعة بالنهار لما ينسوا جذورهم
على امل انه اساليب التعذيب ما يكون عم يتخللها مي نظيفة ودوا مأمن ومستشفيات بتستقبل المرضى، ما بعرف اذا هال ٣٠٠ الف رهينة قادرين بعد يتحملوا انهم بيقبضوا معاشاتهم على الوقت، والاهم من هيدا انه بيقبضوا المعاش معاش مش انه شي باللبناني وشي عالمنصة وشي ع سعر السوق، وانهم ما بخافوا المصارف تسرقهم، وانهم ملاقيين شغل وعائلاتهم عايشة بأمان واولادهم عم يروحوا عالمدارس بعيدا من محور الشياح - عين الرمانة. عن جد الله يعين هاللبنانيين بالخليج كيف قادرين تحملوا كل هالعذاب بفوتوا عالسوبرماركت كل الاسعار واضحة وصريحة، ما حدا بيسترجي ينهبهم او يسرقهم. كل شي بقدر قل لكم اياه معليه تحملوا وادعوا لنا نكون بينكم رهائن بدول تأمن لنا فرص عمل نقدر نطعمي اولادنا.
بالعودة للبنانيي الداخل المحررين، الاحرار، الشهداء الاحياء، بعتقد نحن بتابينا عالجنة، بيكفي قادرين نبلش السنة الجديدة بخطاب لجبران باسيل فخطاب لحسن نصرالله فمناوشات باسيلية علي حسن خليلية يتخللها اطلاق مواقف عشوائية تصيب بكلماتها الطائشة عشرات الاشخاص وتعرض السلمي الاهلي للخطر.. كله بهون قدام الانتخابات والنتائج المرجوة منها
هيدي اللعبة هي ذاتها عبر العصور، بتتكرر قبل الانتخابات، وفجأة بصير الكل عم يهدد الكل بتسمية المقصرين بأسمائها
وبتبلش المباراة، اول شي نائب حالي وزير سابق مطلوب للعدالة بيعلن قبل بيومين انه عنده مؤتمر صحافي بمقر قيادة حركة امل، هلق هو علي حسن خليل بعتقد كان عم يعلم على السيد حسن مش على الدولة او الرئيس او الصهر، انه ليك انا بعلن عن محلي وابن مرة يجي يطالني.. على حسن خليل بمرر الطابة بيقطعها باسيل بطلب تحقيق شفاف وعلني، بهجمة مرتدة بيطلب الخليل استقالة رئيسي بعبدا مقابل الرئيس بري.. بينتفض جبل بعبدا قال فشر بعبدا ما الها رئيسين وانه حق مين ما كان يطمح للرئاسة وبذكرنا ليه الافرقاء المعاديين خايفيين من رئيس الما خلونا كل هالخوف لانه تربايته.. اي هلق مش بس اخصامك بالسياسة صاروا خايفين كلنا يعني كلنا صرنا خايفين.
ومن بعد هالتمريرات بينطلق العنان للابواق عند الفريقين هيدا بطالب بنزع سلاح حزب الله والتاني بوقف فساد بري بالمقابل بيتريث السيد حسن وبقول معهم حق التيار لازم تطوير مذكرة التفاهم بس هالكم مش فاضي عنده استحقاقات ذكرى مقتل سليماني اللاطمئنان على الرهائن اللبنانيين بالخليج سحق ما تبقى من الحد الادنى من العيشة الكريمة بلبنان بعدين بده يطور تفاهم مار مخايل ليفرض جبران باسيل رئيس.
وللأمانة الصيت بتغيير المواقف لجنبلاط بس مؤخرا الفعل ل جي بي، كتير قويان ما بعرف شو شعوره هيك المرشد الاعلى المحلي انه واحد ماسكه من الايد اللي بتوجعه او بتعطيني اللي بدي اياه او بطالب بسلاحك، يعني للامانة اسرائيل ما هلقد هتته بهالسلاح، بس هو السيد عم يمرق له اياها لانه اكل عقوبات بسببه، طلع هو مش عامل شي الاميركان هيك قالوله او بتبعد عن حليفك او رح نحطك بالزاوية، بالحرف الواحد كل الاميركان شعبا وادارة حكيوا معه وقالوه هيك ولانه ثابت ع مواقفه اكل الضرب، بس لان مش حلو يقولوا انه لانه ما بعد عن حزب الله قاصصناه قاموا اتهموه بالفساد.. وللصدف بس للصدف انه الوزارات والمناصب اللي تبوأها باسيل الشفافية فيها صاخبة بشعع فيها الهدر. بس اهضم شي بالمعركة بين باسيل وعلى حسن خليل دخول الشتلة ندى البستاني على المعركة، هيدي الشتلة بالذات بيسقيها جبران باسيل وقد ما عم تنمى الخسة قال رح تترشح عالانتخابات.. هيدي للامانة بدها بوجها تنزل الست رندا شخصيا عالساحة بوجهها تشهد هي كمان لنزاهة وشفافية على حسن خليل وزعيمه.
هيدي كانت الاخبار على جبهة الثنائي الشيعي - بعبدا الحليفين اللدودين بس مش تفكروا الجبهة بالحلف التاني اهدى احمد الحريري شخصياً اخد على خاطره من الحكيم وطلب منه يلعب بملعبه وعلى قده وما يتعدى على الغالبية السنية او يفكر انه بمون عليها، الحكيم كان صرح تصريح تكتيكي استراتيجي بإنه الغالبية السنية الشعبية حليفته تارك الباب موارب على موضوع الحلفاء السياسيين، هلق انا ما فهمت ليه زعل احمدتو، ما اذا انت شخصيا مش عارف اذا زعيمك باقي بالحياة السياسية او مش باقي، انه المفروض الحلفاء يتمسكوا بشبحه ويصيروا يعلنوا التحالف معه كضمير مستتر تقديره رئيس السيلفي والبلد الخلفي؟
على الهامش قال بلال عبدالله كان عم يهزأ لما قال انه البيك هرب ٥٠٠ مليون دولار، طب في مجال يا شباب تصيروا تغمزونا بس تكونوا عم تهزؤا لان نحن شعب معتر يعني بصدق كل شي
ان شاء الله موت عم كذب بس هلق في عالم وكتير كتير كتار وهني الاغلبية مصدقين انكم علقانين بين بعض وانكم قررتوا تقلبوا الطاولة على بعض وبكرا ينتخبوا ليحموا طوائفهم من المؤامرات.. وعلى فكرة المشكلة ولا مرة كانت بس تتخانقوا لان المشكلة الحقيقية هي لما تتصالحوا لان دايما بتطلع براسنا نحن الشعب.. خليني ساكتة
