خليني ساكتة ١٣١- الحريري يعود او لا يعود.. وموازنة ٢٠٢٢ لازم تلحظ ثلاثية كابتغون ومتحرشين وتزوير!

شهيق زفير

شهيق زفير

شهيق زفير

لمدة ٣ دقايق كل ٤ ساعات، وكل ما كررتوا التمريم بكون مكسب الكم،

من هلق لنهار الاثنين، وقت انعقاد مجلس الوزراء، هيك متل ما بقولوا بتزمطوا بالنفس الاخير قبل ما ياخدوه.

موازنة الشق التشغيلي منها على الدولار ١٥ او ٢٠ الف، طب بتبقوا عم تنقوا ما عم يجتمع مجلس الوزراء وبس يجتمع بدكم تنقوا على مقرراته، ما بصير بدكم تعتمدوا مجلس الوزراء باكيدج هو ومقرراته، والموازنة بند اساسي الثنائي الشيعي بشحمه ولحمه رجع على حكومة المستقلين كرمال اقرارها.

بس ما تخافوا اكيد كل الكتل رح تكون ضد الموازنة، ما ممكن يقبلوا بموازنة بعجز ٣١٪، وكل شي بتعمله انها تضييق النفس على المواطن، بس بقدرة قادر بكرا بنقر الموازنة باعتراضات شكلية من نائب من هون او نائب من هونيك، لنحافظ على ديموقراطية نظامنا، حيث لا تصويت ١٠٠ في ال ١٠٠ على أي مصيبة جاية.

حسن فضل الله استنكر الخضوع لشروط الصندوق الدولي وفق معايير وضوابط وطنية، هيدا التصريح تماما متل تبع معه ملفات بتطير روس كبيرة، وكل واحد يفهمها متل ما بده.

الموازنة منزلة الضرايب عالشركات، ومقلصة موازنة الجامعة اللبنانية، هيدي الجامعة اللي عم تلاحق مستحقاتها من فحوصات ال pcr اللي وصلت ل ٥٠ مليون دولار، بس حوت طيران الشرق الاوسط ما ملاقي حاله معني يرد اي متى رح يدفع المستحقات، اصلا هالطيران الشرق الاوسط متل المنشار طالع واكل نازل واكل، وعلى فكرة قد المواطن غالي ع قلب الدولة، الموازنة بتنص على زيادة ضريبة الخروج من مطار لبنان على كل مسافر وبالفريش. وغلاوة المواطن وخصوصاً المنتشر وصلت للباسبور اللي صار سعره بالسفارات ٦٠٠$، اي بلد متل هيدا اله قيمته على الخريطة العالمية ما ممكن يكون سعر باسبوره اقل من هيك.

وعلى قد ما الدول قاتلة حالها علينا وعلى الاستثمار عنا، مدد وزير الاشغال مدة تقديم المناقصات لاعادة اعمار المرفأ لان لحد هلق ما في الا شركتين قدموا، لان بعتقد اللي بده يعني له هيك مشروع بده يكون مش بس مهتم بالمرافئ كمان بده يكون عنده اهتمامات متل تهريب، تخزين أو رح تخلص معه بخسارة.

على كل حال الاثنين عابق بالاحداث، والعين على رئيس السلفي والبلد خلفي ورجعته على البلد، وتوجهه للبنانيين برسالة يعلن فيها مشاركته بالانتخابات من عدمه، وهل سيعترف انه السياسة مش شغلته او انه بده يعلن ترشحه كرمال الناس والطايفة لما يتركم لحالهم يواجهوا مصيرهم، ويربحهم جميلة من كيسهم انه باقي بالعمل السياسي.. للامانة مش حلوة تطلع براس الحريري لحاله، لانه بين الاقل سوء بالطبقة السياسية.

المنطقة عم تغلي، بالبحرين السنة والشيعة لاحقين بعض عالنفس، الحوثين رفعوا المعركة بقصف وتهديد الامارات، بس نحن الثنائي الشيعي عنّا ناضج رجع عالحكومة كرمال مصلحة الشعب العليا، هلق ما بيخلى الامر من تصريحات وتغريدات تسخر من امارة الزجاج والرذيلة، هيك نحن بجمهورية الموز ما بيعجبنا حدا، يا حرام عليهم عندهم بنايات من ازاز وهيك عايشين متل البشر، يجوا يشوفوا عيشتنا، نحن اللي اخترعنا الحرف وهلق صرنا من اهم مصدري الشهادات المزورة، دايما السباقين.

يمكن لازم مجلس الوزراء الاثنين يعدل ثلاثية شعب وجيش ومقاومة ويحوله لثلاثية كابتغون ومتحرشين وشهادات مزورة.

بس هلق عنا نبي جديد، هيك وعي الصبح وقال ليه ما بعمل نبي، وعم يطلع آيات على حسابه واقاويل وكمان عنده معجزات، بكل أمانة انا ما حضرت له ولا ثانية ع صوت عالي، بس بيقطع قدامي بكل المحلات، هلق دار الفتوى ما هان عليه هيدا الموضوع ورفع دعوى عليه، طب مثلا دار الفتوى مش منتبه انه في واحد مصنف حاله اله علينا، ونحن لازم نتبعه على العمياني؟ لان هو الوحيد اللي بيعرف الصح من الغلط، والوطني من العميل، والمؤامرة من المقاومة؟ ومش حلوة بحق دار الفتوى يعني اللي بحط خطوط حمر تعرقل التحقيق بجريمة العصر يضيع وقت بفيديوهات نشأت.

على الهامش قال مكتب الجرائم المعلوماتية، اللي كل كم يوم بينتبه على تغريدة او تصريح سوشيل ميدياوي بهدد السلم الاهلي، وصلت مواصيله يتحرك بدعوى من فيصل كرامي يعني عن جد هلق بدنا نشغل ٣ / ٤ اشخاص ونعطل شغل المدعى عليه كرمال فيصل كرامي، ما بهالوقت اللي بدكم تحققوا معه لطارق ممكن يستفيد بإنه يأمن علبة حليب لابنه اللي عمره كم شهر، وكرمال مين؟ فيصل كرامي؟

ان شاء الله موت اذا عم كذب، بس في مراقب سياسي للجواء داخل التيار قال انه باسيل هو ورا توريط العهد القوي بحروب إلغائية للاستئثار بالسلطة، وانه في امتعاض وتململ منه داخل القصر الجمهوري والتيار وخصوصي انه صارت معاركه ضد الثنائي الشيعي والرئيس بري شخصية ومن بعدها التراجع ومد جسور الحوار صارت مكشوفة خصوصي انه من الواضح انه قائد حملة استرجاع حقوق المسيحيين ما رح يشوف النيابة الا بأصوات الشيعة.. خليني ساكتة