خليني ساكتة ١٣٣ - الجيش وضيوفه تحت مجهر الدويلة.. و"دولة" الميقاتي فاشلة بس بدنا نتحمل بعض!

خليني ساكتة

تم النشر في 14 فبراير 2022


اسبوع عاصف بالاحداث والمواقف

اكيد كرمال القيمة لازم نبلش بالتراتبية من راس السلطة

لا لا مش من هيدا قلنا راس السلطة يعني اللي حاكم بأمر السلطة وامرنا، بالمرشد الاعلى المحلي، اللي طلع هالمرة بالجزرة، يفهمنا ع رواق ما في اصبع ولا تهديد ولا وعيد، طلع يخبرنا عالرواق عن الوضع، واهمية الاستحقاق، ودقة اللحظة اقليميا ودوليا وداخليا، والمؤمرات اللي عم تنحاك بالسفارات (ما عدا السفارة الايرانية) لا سيما واننا داخلين على استحقاق كبير متل الانتخابات

الخلاصة بعد المقابلة، انه ثلاثية جيش وشعب ومقاومة بخطر.. لإن من بعد ما نزل الشعب عالارض وصار ياكل مناقيش وتخون تلات ارباعه، اجا دور الجيش اللي على ما يبدو كمان عم يتحول عميل اميركي لان فاتح اليرزة على مصراعيها لضباط اميركيين ومساعدات من الشيطان الابعد، هلق على بعد امتار من اليرزة نزول انه يجي ضباط ارتباط ايرانيين يشرفوا على حروب وتدريبات وغيره بإيام الحرب مع اسرائيل وبإيام السلم هيدا شي عادي، لان ايران هي صديق.. ما بحق لحدا يعتبرها الشيطان الاقرب، ليه؟ لان الوحيد الاوحد اللي بحق اله يصنف العميل من الوطني والعدو من الصديق هو السيد نصرالله

بس والله حنون، عنده هيك دايما لمحة انسانية، لدرجة بعت خاتمه لسيدة بدها شي من ريحته.. على امل انه ما يصير مصير الخاتم متل مصير العباية ينباع على صفحات الفايسبوك.

وللامانة في كم بادرة حسن نية قدمتها الدويلة للدولة، اول شي اعتبرت الدولة سيدة نفسها تصطفل بترسيم الحدود، مع التأكيد على رفض التطبيع، وتاني شي مهرجان المعارضة البحرينية بالضاحية، ومن بعد ما تفاجأ مطعم انه المعارضة البحرينية بدها تطرق لموضوع سياسي، وسحب حاله، فتحت قاعة اخرى بالدولية صدرها لاستقبالهم. هو هيك فجأة صار في زعزعة بقاعدة الحزب، مش عارفين بطروها مع الخليج او بيقلبوا الطاولة، لان عادة الاساس هو تحرير القدس، هلق بهالحشرة توسعت الاجندة وصار بدهم يوقفوا كمان مع الشعب اليمني والمعارضة السعودية والبحرينية، انه عجقت شوي خصوصي انه الوضع الاقتصادي ما بيحمل يعني ع شو بركزوا عالمازوت والكهربا والاكل لاولادهم والا على دعم الشعوب المتهضة؟ فقرروا اجر بالبور واجر بالفلاحة، قسم بطريها وقسم بيرفع الراية، وكتير معبر رفع الراية تضامنا مع الشعوب المظلومة، خصوصي بمناطق مزدهرة ومأمن فيها كل ما يلزم متل بعلبك.

هيدي كانت اخبار الدويلة باختصار، اما بالدولة نزل جبل بعبدا، ع قداس مار مارون وفي شي ١٣ واحد هتفوا بحياته، منيح انهم عملوا هيك لزكرونا بوجوده، لان ضروري هيدا التزكير قبل الانتخابات، خصوصي انه المنطق بقول بعد الانتخابات في حال حصولها، رح يصير التيار الوطني الحر يتنافس مع حزب التضامن الوطني تبع اميل رحمة بعدد اعضاءه، هلق هو وهمته الصهر المعجزة وقدراته اذا ممكن يقدر يقنع حليفه الاوحد بتطيير الانتخابات، للحفاظ على اكتريته النيابية لوقت اطول او لا.

دولتك، عم يتهموك انت اقريت الموازنة لحالك والتعيينات كمان، انت كرئيس حكومة بدل عن ضايع، اصلا معروفة مهمتك بإنك بتاخد القرارات الصعبة، اللي الاعتراضات عليها ما بتأثر عليك، يعني طولك مساعدك انه الاعتراض عليها من قبل الشعب ما بيوصل لسمعك، اما الاعتراض من قبل الاحزاب فإنت عارف انهم رح يعترضوا وهني عارفين انك عارف وانت واياهم عارفين انه هيدا الاعتراض شعبوي لارضاء الجماهير.. بس بالاملية يعني بس تخبرنا انه خدمات الكهربا والمي والتلفونات ما بقى فيها تكون ببلاش، تذكر انه اول شي لازم تكون هيدي الخدمات موجودة، ومن بعدها طالب بسعرها.. هيدي اذا بدنا نسلم جدل انه انت ما خصك بأموالنا النهوبة، طب انت مش الدولة؟ يعني اذا سرقونا ما بترد لنا مصرياتنا واذا قتلونا ما بتحاكمهم، يعني هيك كيف منكون تحديدا عم نتحمل بعض؟ هيدا يعني نحن عم نتحمل وانت عم تتفرج علينا، يعني انت عم تعاملنا على قاعدة اللي بجيتنا اذا في شي باقي النا والك واللي بجيبتك اسم الله الك، (عم تحدثني عن مصلحة نفسك لنفسك)

بس فيصل كرامي ما ترك له اياها اي مسك التلفون وصفقوا تويت "رح نعيش على الشمعة ونلغي التلفونات والسيارات والدفايات ونشرب قهوة وشاي"، "تكرم عينك دولة الرئيس وتكرم عيون المصارف". (تلمأنت عليها)

هلق حزب الله وحركة امل، لان في اشخاص طلبوا مني وقف استعمل الثنائي الشيعي، لانه هني ما بمثلوا كل الشيعة، ولازم يعرفوا حجمهم.. حزب الله وحركة امل اعترضوا على اقرار الموازنة وعلى التعيينات وانه صار في هرج ومرج وما عرفوا انه تم اقرار الموازنة والتعيينات الا بعدين، هني لما صار الاقرار على ما يبدو انه كانت السفارات لاهيتهم بشي مؤامرة وهني ومفوكسين على احباطها تم تمرير الموازنة من تحت اجريهم. بس على فكرة الرئيس بري متابع امور الطايفة عن كثب وطلب من وزير الاشغال انه يوصل خطة النقل المشترك لآخر قرية بالجنوب.. هو يعني حامل الامانة يضوي لمبة على اوتوستراد الزهراني ونحن ممنونين

على الهامش التحضير للانتخابات ماشي، والخطابات عم تتأجج، في عالم عم تنقدوا سامي الجميل كيف رشح ابن بطرس حرب بالبترون وفي عالم عم تقول انه الخطوة هدفها قطع الطريق على جبران باسيل واسقاطه بالانتخابات.. انا شخصياً وبكل راحة ضمير اذا هيدا هو الهدف الفعلي من وراه هيدي الخطوة انا معه، لان صح انه كلن يعني كلن بس جبران باسيل لازم يكون اولهم هو واللي حاميه، لان ببساطة لازم تخلص من الاسوأ بالسلطة وترجع تخلص من السيء لإن عملية تطهير البلد ما ممكن تصير ضربة وحدة، بظل سلطة متل الاخطبوط الها راس واحد وايدين كتيرة.. اصلا جي بي شو بده بالمقعد النيابي طالما البلد كلها بإيده وبإيد حلفاؤه وعم يخلوه، يعني معقول يخلوه بس تصير كتلته بتتألف من ٣ اشخاص وربع؟

الانتخابات اذا صارت مغتربينها بدهم يصوتوا قبل ١٥ يوم من تاريخ الانتخابات العامة، وينقلوا صناديق الاقتراع عبر وزارة الخارجية (المستقلة عونيا وحركة امليا منذ الأزل)، وينحط صناديق الاقتراع بمصرف لبنان بهيدا المكان محل ما صار اعظم نصبة بالعالم، بأكبر عملية تبخر مالية بعد ponzi scheme، على امل ما تنهب الأصوات المقترعة أو يصير في عليها هير كات لصالح المنظومة.

المشهد الانتخابي والجو العام بظل الخنقة العامة للناس، بقول من المستحيل هيدي الطبقة السياسية ترجع متل ما هي، وانه الصوت عم يعلى حتى داخل الطائفة الشيعية، لدرجة انه بشرى الخليل معتبرها حالها رافعة حزب الله وتشكل خطر عليه اذا ما تحالف معها.. بيبقى أنه كل ما ضاق الخناق على هيدي السلطة كل ما صار الخطر على تطيير الانتخابات اكبر، والخوف الاكبر انه يكون الحل الوحيد للإبقاء على هيدي السلطة وتطيير الانتخابات عمل امني او تخريبي كبير.

قبل ما اختم قال آحمد الحريري عم يلعبها زكية وعم يطالب بعفو عام وتقصير السنة السجنية، هيدا الوعد اللي ربحوا آخر مرة تيار المستقبل على اساسه الانتخابات، هو اصلا احمدتو بوضع ما بينحسد عليه يعني بس وصل دوره يفوت على المجلس قرر سعد ينسحب من الحياة السياسية ويسحب كل التيار معه.. حقه تياره وحر فيه

ان شاء الله موت اذا عم كذب بس قرار انسحاب سعد الحريري من الحياة السياسية، واذا كان تم عن دراسة او غير دراسة عن وعي او غير وعي، هيدا احسن قرار سياسي اخده بحياته، ومن دون ادنى شك قلب الطاولة بشكل خاص على قوى الامر الواقع اللي بتستمد سلطتها من التسويات السياسية.. ومن دون ادنى شك حط محور الممانعة خصوصاً بموقف ما بينحسد عليه، بيبقى انه هيدا المحور للاسف في بضهره ١٠٠ الف مقاتل و١٥٠ الف صاروخ.. خليني ساكتة