بدهم يزيدوا التعرفة عالانترنت لل ٣٩٠٠ والارجح الكهربا اطباء الاطفال والامراض المستعصية والاخصائيين عم ينفقدوا من البلد، بالكاد بعد في كم استاذ عليهم القدر والقيمة هون، ما في واحد عنده الحد الادنى من المقومات الا لقي شغل برات البلد، او بالقليلة بيشتغل مع شركات من برات البلد..
طب نحن كشعب لبناني فتح وحربوق ليه مثلا ما منعرضهم لهل فتحيين اللي حاكمينا للبيع بالمزاد العلني للدول الصديقة وغير الصديقة يستفيدوا من خبراتهم، مثلا اذا راح المرشد الاعلى على اسرائيل معقول يعلمهم يعملوا طيارات بلا حس وبلا صوت بتفوت بتصور وبتفل لا مين شاف ولا مين دري، مش طيارات بتبعط بعط بترجف الميت بقبره. هي اصلا حسان رجعت ع لبنان لانها داخت للارجح شافت امور متل معامل كهربا، سدود بتعبي مي، طرقات، عالم بأشغالها.. والارجح انها رايحة تطمن على مصير الغاز اللي طلعوا زيادة البياع للاسرائيلي بترسيم الحدود، رايحة تشوف اذا عم تتهرب عالحدود او عم تنابع بالسوق السودا.
على فكرة هو الطيران كان هلقد واطي مش قصده يخوفنا، ولا يحط على عينه للسيد انه ما في يسقط الطيارة، لا ابدا هو الطيران وطي هلقد كان قصده يتفرج على معرض نحن قاسم على طريق المطار، قام تفاجأ انه خلص لصالح بل جهاد القرار ١٩٨٢، ويتخلله وقفات مع الاعلان عن توفر السلع الايرانية البديلة بالاسواق اللبنانية.
المشكلة الحقيقية للصراحة، انه نحن المفروض عايشين كتف بكتف بالبلد، يعني خاصة مع انعدام وجود التنظيم المدني، وهيك الجيران بيعملوا صبحيات مع بعضهم من البلكون، صرنا مجبرين بالصمود، يعني اذا جارك صامد ما فيك تكون انت خسع وانه تعملي بالرز بصل وانه بدي ربي اولادي بلا رعب، ليكون بدك اولادك يعيشوا من مهرجان لمهرجان ومن اكسبو لمدينة ملاهي متل دول الفجور والفسوق والازاز. وتقعد تخبر رواية انك ارتعبت وما نمت انه ارتعدت فرائصك وفرائص اللي خلفوك من طيارة؟ وانه ابنتك المراهقة بكيت وابنك الصغير نقز، لا نحن مما فينا نترك مجال للعدو يتسلل بيناتنا ويلعب على هامش الخوف والخنوع وهول من صفات العملاء، لازم توقف تضرب اجريك بالارض وتربي رجال، متل هول اللي كانه بقاعة الرسلات، وشو بيفرقوا اطفالك عن اطفال غزة؟
ما فيك تقرر. تكون جبان وتسأل ضو بده يصير فينا لان ما عنا ملاجئ، ولا تخاف من الحرب، لازم تآمن بتوازن الرعب، هيدا التوازن على فكرة مبني على انه الاسرائيلي عنده قيمة لمواطنينه، يعني اذا نقز ٣ اسرائيليين بينحسبوا بين عدد الجرحى، بينما نحن اذا تقطعت اطرافنا نسمى شهداء احياء. بس هيدا موضوع ما بجوز الوقوف عنده، لازم تكون متل جبل بعبدا ما بتنهز، في حدا مقرر يقاوم انت بدك تكون الحجرة اللي بتسند الخابية، او هو بصنفك عميل. بعدين اذا وقفت هيك وصفنت ما رح يهون عليك تزعل السيد، توتر له اعصابه؟ انه بدك اياه يعني هيك يبقى معصب لانكم ما عم تفهم اهمية المقاومة ولاحق لي ملذات الحياة، بالعيش بسلام واستقرار وعلاقات جيدة مع العرب والغرب، واستعداة لبنان لدوره التهييصي بالمنطقة.. حطتكم ع رقص وسكي وبرونزاج واكبر صحن تبولة.
على امل تكونوا فهمتوا اسس الوطنية، تماما متل يسلم لي اميل جونيور رجع عالساحة من بابها العريض، الهيئة بده ياخد صفقة بيع الاسرائيليين تيكيت ليفلوا من فلسطين، لان صار تحرير القدس قاب قوسين وادنى. مننتقل عند كبير اللصوص الهربان، اللي صار متله متل سليم عياش مجهول مكان الاقامة، هلق رياض سلامة مطلوب للعدالة وفرقة الطبيلة تبعه منهارين، ما عارفين بشو بدهم يشبهوا ملاحقته، شي باغتيال الحريري وشي باغتيال البلد وشي بالقضاء والقدر، نحن بالبلد وصلنا للدرك ما تحت الاسفل، يعني لما نلاقي حالنا عم نشكك بالنية ورا ملاحقة رياض سلامة هيدا مش تفصيل، لان القضية المحقة وراها قاضي مرتهن.
للامانة بلبنان في أزمة ثقة، أزمة ثقة بالمقاوم وبالعميل بالقاضي وبالمدعى عليه بالراشي وبالمرتشي بالنائب وبالناخب، بالرئيس وبالمرؤوس، ٣ احداث بشكلهم الخارجي ايجابي الا انهم كمان ما قدروا يجمعوا اللبنانيين عليهم محاكمة رياض سلامة، تلزيم اعادة تشغيل حاويات المرفأ لشركة فرنسية يقال انها كانت محور احاديث جانبية بين ماكرون والاشاوس اللي حاكمينا والميغاسنتر.
الا انه بقضية رياض سلامة في جزء من اللبنانيين نكاية بالطهارة بدهم يعملوها تحتهم، بدل ما نكون كلنا عم نطالب بمحاكمته ومحاكمة كل مين استفاد من سياساته المالية، عم نحاول نكشف الصفقة اللي عم تتركب من ورا توقيفه، وهيدا الكشف شرعي ولازم على انه يتم من قبل عالم موثوق فيهم مش من قبل فرقة طبيلة مستفديين من بقاء لص متل رياض سلامة من دون المساس فيه.
بكل الحالات للأسف ما بتنقرا مشهدية رياض سلامة الا بإنها بالون حراري للهو العالم، وأكثر ما يثير السخرية فيها انه اللي رايح يقبض عليه هو بنفسه ما عم يمثل قدام قاضي التحقيق بقضية المرفأ، فضلاً أكيد عن الخلافات غير الموجودة بين الاجهزة الامنية اللي كل واحد فاتح فيها على حساب زعيمه.
هيك بتنبني الاوطان برؤوسء اجهزة امنية وقضاة موزعين ٦ و٦ مكرر، لحد ما تجي القوة الضاربة الحقيقية وتفرجيهم قيمتهم على الارض في حال اضطرت، خصوصي اننا هلق فتت بمصلحة تصنيع الاسلحة مين بيعرف ممكن تصير الدويلة تعمل صفقة اسلحة مع الدولة لتسلح هالجيش المعتر.
من كلام الحق الذي يراد به باطل كمان، الميغاسنتر، هيدا الهدف الرئيسي من وراه اذا الله اخد بإيدهم انه يتم بالحد الادنى تأجيل الانتخابات، لان الصهر المعجزة ما عباله يترشح.
كتير قوي ومقنع جبران باسيل هو عم يحكي عن موقفه من الانتخابات، على فكرة نحن بدنا كمان اياك تترشح بالبترون لان ببساطة ما في احلى من انك تخسر الانتخابات على أرضك وبين جمهورك وترجع لحجمك الطبيعي قبل ما يصير عمك رئيس ويفصل القانون الانتخابي على قياسك، وقت اللي كنت تبكي جبت لهم الكهربا نص ساعة زيادة وما انتخبوني.
على كل حال هي الميغاسنتر من الاول بنفسك لدرجة انت والضمانة لكسح الاخضر واليابس.
على الهامش، بلش يبطل العجب بموضوع ارتياح الويسترن يونيون على وضعهم، بما يشكل رافعة للانهيار الحاصل، ولان نحن اللبنانيين عينا ضيقة وما منحب لحدا الخير، بلش يبين لنا انه القصة منها بيزنيس ناجح وبس، لا هيدا شغل ناجح مع رشة اصلاح وتغيير.. على كل حال مش غلط يعني بلكي بيتحول شوي شوي ليتقبل رهن ذهب واراضي ويعمل امتداد عصري للقرض الحسن، لان هيداك اسمه مش رنان.
قبل ما اختم التحضير للانتخابات ماشي، واهم مشهد انه في لوائح عم تتشكل ضد السلطة بكل المناطق، ويمكن لاول مرة منشوف ترشح اشخاص جديين بكل المناطق اللبنانية من الشمال لاقصى الجنوب، هلق صحيح نعيم قاسم عم يحذركم ويذكركم انه المجتمع المدني ما قدم شي لتنتخبوه. يا شيخ نعيم صح هني ما عملولنا شي، لان هني مش السلطة ولا مطلوب منهم يعملوا شي، وبيكفي بس نتذكر انتو شو عملتوا فينا انتو والمنظومة اللي حامينها والذل اللي عم نشوفه بعيونا كل يوم بسببكم كلكن يعني لكلكن لنعرف بالزبط مين لازم ننتخب.
ان شاء الله موت اذا عم كذب، بس هالمرة في فرصة، اذا خلوا الانتخابات تصير، رح تكون فرصتنا الوحيدة للانقضاض عليهم.. واذا رجعتوا انتخبتوهم هني ذاتهم تذكروا منيح انكم انتو حفرتوا قبركم وقبر هيدا البلد بإيديكم.. خليني ساكتة.
