خليني ساكتة ١٣٥ - الخارجية ضاعت بالغزو الروسي لأوكرانيا.. الحزب ما عجبه وجبران باسيل مركّز عالداخل!

في حال جرت الرياح بما لا تشتهي السفن ورجعتوا انتو ذاتكم بعد الانتخابات، أول خطوة لازم تعملوها تلغوا وزارة الخارجية، ويمكن احسن تلغوا الحكومة من أصلها وما تشكلوها

ليه احسن يكون هيدا اللي محسوب علينا بلد، لبنان بلا حكومة؟

لان ببساطة وجودها متل عدمه، بس زيادة قرقعة ومخانقة، وبعدين الاسوأ من كل هيدا بتعطي الاحياء انه نحن بلد لازم نعطي رأينا بأمور مش لعمرنا مش لمستوانا هيدا المستوى اللي صار اوطى من الشفرة على الأرض.

هلق قبل ما تفهموني غلط، انا شخصيا ضد الغزو الروسي لاوكرانيا، وانا مع الشعوب المظلومة شو ما كان جنسيتها، يللا بليز بلشوا هلق بالكومنت انكم ما سمعتوني تضامنت مع اطفال اليمن والقدس والسند والهند، مش قصة المهم انا بعرف تحديدا اني مع الابرياء بالعالم وين ما وجدوا وضد الطغاة اللي بيستقووا عليهم تماماً متل ما انا ضد الأنظمة الغريبة اللي تستغلهم كل مرة تحت مسميات مختلفة.

بالعودة للبنان، النأي بالنفس والحياد، واجب مش لازم يكون موضوع خلاف. بتعرفوا ليه لان كيف ما حكيتوا عم بتغمقوا اكتر لهالبلد. بعدين هيك زعلتوا لنا امل ابو زيد، طب مش هو حاليا القائم بأعمال المصارف عبر ال omt ؟ شفتوا شفتوا انه ما ممكن الواحد يأمن لكم.

بكون الواحد شغله ماشي بتخربوه، لاحظتوا بس رياض سلامة رخّص لشركات تحويل الاموال بأعمال الصرافة يعني على رأسها آو آم تي، كيف بقدرة قادر بردت اعصاب غادة عون، وحتى لو بعدها عم تلاحقوا صارت عم تعملها عالسكت، بلا ضجيج لان في عنا اشغال بدنا نمشيها.

على فكرة البلاد المارقة الفاشلة الشحادة، وهيدي المواصفات الحقيقية للبلد اللي حاكمه جبل بعبدا، ما بحق لها تعطي رأيها بشي او بحدا. هيدي المواصفات تكرست بالعهد القوي، بعد ما كانت مخباية تحت اوراق توت مختلفة عم تغطي عورتنا على مدى العهود السابقة، منكرر البلاد المارقة الفاشلة الشحادة ما بحق لها تعطي رأيها بشي او بحدا.

وبعدين يعني كتير مبسوطين كل مرة بتعطوا رأيكم بحدا بتقضوها دهر عم تعتذروا، هيدا غير اكيد انقسام البلد بين مع وضد، هلق الفريق اللي كان داعم حرية رأي جورج قرداحي اللي طلع له تعويض عن جرح شعوره بأكتر من ٥ مليارات ليرة، ضد حرية تعبير وزير الخارجية عن رأيه، بعدين الثنائي المرح بالحكومة ما عجبه انه وزير الخارجية تسرع واعطى رأيه، مش معقول عن جد هيك هالوزراء كيف بينسوا حالهم وبديروا وزاراتهم بلا ما يرجعوا للمرجعيات العليا بالبلد.

يعني لا بوتين رح يرجف ولا أوكرانيا رح تنجى، تماما متل انه لا اسرائيل رح تنقرض ولا القدس رح تتحرر.. هلق نحن اللبنانيين مش بس حكومتنا بتعطي رأيها، لا كل واحد فينا بده يدلي بدلوه، واللي ضد المحتل هون بصير مع المحتل هونيك واللي مع حركات المقاومة والتحرر هون بصير ضدها هونيك.. لان نحن يعني كشعب لبناني ضليع بتوزيع الادوار ما شايفين مللا بلد بانيين

خلونا بالمهم، قال جبران هيدا الموقف من الخارجية مش لرفع العقوبات عنه، لانه هو مناضل ابن مناضل وما بهمه اصلا الترّهات اللي تتفوه فيها بلاد كبيرة.

وعلى فكرة شفتوا الاميركان كيف بيتركوا حلفائهم بنص البحر خشبة خلاص ما بزتولهم تذكروا قبل ما تنتخبوا شو عملوا بالافعان، هيدا بس خطاب استباقي للمرشد الاعلى المحلي اللي دايما خايف على مصلحتنا اننا نراهن على الحصان الخسران، خصوصي واننا فايتين على حرب تموز جديدة بس بأيار بصناديق الاقتراع. اسمعوا منيح في واحد طبع كمامات عليها كلن يعني كلن نصرالله واحد منهم طلع عميل اسائيلي، وفي صحافي كتب مقالات مناصرة للخليج ومشككة بدور الحزب بلبنان كمان طلع عميل، وفي واحد بجزر الواقواق فكر هو ونايم انه بده ينتخب ضد الثنائي الشيعي هيدا بعد ما عرف بس رح يطلع كمان عميل لان سوّرته نفسه انه يشارك بحرب تموز سياسية.

على الهامش قال اقروا خطة الكهربا، الوزير الكاريكاتير رح يجبلنا الكهربا ١٧ ساعة بال ٢٠٢٣ ومن بعدها بده يعمل هيئة ناظمة، هيك على قياسه وقياس اسلافه، تحديدا من بعد ما تربح ندى البستاني بالانتخابات ويصير عندها حصانة، هيك اي تحقيق بالهدر بوزارة الطاقة معها بصير بده رفع حصانات، اي شو على حسن خليل وغازي زعيتر احسن؟

قبل ما اختم في لبنانيين علقانين بأوكرانيا، والدولة مستعدة ترد اللي معه تيكيت طيارة، مش عار ابدا على الدول اللي بيتنقلوا سياسييها بطيارات خاصة، وفي من بيناتهم اغنى اغنياء بالعالم من بينهم رئيس الحكومة ما يلاقوا حل مثلا مع حوت طيران الشرق الاوسط ويجلوا العالم اللي بحاجة، على كل حال للامانة ما بعرف اذا افضل الهم يرجعوا او يبقوا بالقليلة هونيك في ملاجئ لحد هلق، وفي قمح..

بس فحص ال بي سي ار على المطار رح يلتغي من اول آذار على الارجح مش كرمال خرق الداتا على ال application بس من بعد ما طالبت الجامعة اللبنانية بأتعابها من سعر الفحص على الارجح بطلت توفي قالوا بلاه.

ان شاء الله موت اذا عم كذب بس صار في لائحة للحصول على طلب مستعجل للباسبور اكثر تعجيزية من الحصول على هجرة على شي بلد عليه القدر والقيمة او بدك تنتطر دورك اللي ممكن يوصل ل ٨ شهور للحصول على الباسبور.. باختصار اللي بده يرجع على وطن النجوم اموره مسهلة بس العترة على اللي بده يفل منه... خليني ساكتة