خليني ساكتة ١٣٦ - ترشيح مروان خيرالدين بمباركة من البيك والمير والسيد.. من سلطة النزاهة والوجوه الجديدة!

التونيل

او النفق دائما بينحكى عن النفق المظلم والضو بآخره، بس بحس تشبيه النفق ما بينطبق على وضعنا بلبنان

صحيح مثلا نفق فينيسيا صاير اقرب ل labyrinth بمدينة الاشباح ونفق شكا ونفق المطار وتونيل خلدة وضعهم مش كتير احسن الوحيد نفق سليم سلام مشعشع على فكرة في لمبتين احترقوا وينه جهاد العرب يقدم ع شي مناقصة بمليون و٤٣٦ الف دولار لغيرهم؟ صحيح انه وضع طرقاتنا وانفاقنا دليل صارخ على التدهور التام الحاصل بالبلد الا انه بتحس اننا بلبنان ما بينطبق علينا النفق والضو بآخره

بتحسها اقرب لمستنقع، مستنقع بسلطة آسنة، وبمعدل فساد يفوق اعلى معدلات التلوث بالعالم

من هيك الزفت الانتخابي عم يتم استبداله ببعض المناطق ب solar system، وبمناطق تانية عم بتروح السلطة انه هالسنة ما في لا مساعدات ولا خدمات، طب خَيْ بالقليلة اذا انتخبتوهم بتكونوا انتخبتوهم عن قناعة مش ع تنكة ببنزين

لهلق السلطة كتير متصالحة مع حالها منسجمة مع نفسها، ما في لزوم لتغيير الوجوه والتوجه عند الاغلبية الابقاء على الوجوه النضرة صاحبة الخبرة بادارة البلد والحفاظ على ازماته وتعتيقها متل النبيذ

هلق بيزعل منا الحج محمد رعد

بس الاهم من هيدا في تغيير ووجوه جديدة حقيقة بين المرشحين، هي جديدة عالترشيح بس مش هجينة هيك من طحالب المستنقع متل مروان خير الدين المبارك ترشيحه من البيك والمير والسيد يعني هيدا جامع المجد من اطرافه، اصلا بتحس انه الهدف من الانتخابات الجاية تبييض شخصيات، هيدي كيف تبييض الاموال بس اي تبييض شخصيات شي حرامي شي فاسد شي تاني متل عام شي عميل اسرائيل محكوم وشي هارب من التحقيق بتهمة القتل بمرفأ بيروت.

١٩ شهر على جريمة المرفأ والنتيجة اكتر من ١١٢ يوم تعطيل التحقيق، و٢١ دعوى من المتهمين بانفجار المرفأ بوجه القضاء، الدعاوي ذاتها والحجج ذاتها والتعطيل ذاته. وهلق عصابة المصارف عم تتجه لنفس الاستراتيجية بالتصرف مع القضاء اللي عم يستدعيها للتحقيق.

من بعد ما تبين الحصانات بهالمرحلة، بتحس هالانتخابات الجاية جاية لتوزع حصانات، هيك كيف بصير توزيع رخص الفومية والسلاح هلق الكتل النيابية عم توزع حصانات، انا بقول اكيد هيدا اللي عايز حصانة بكون مقعده اغلى من غيره وبالفريش دولار لمن استطاع اليه سبيلا.

الترشيحات عم تكتر وتتراكم، كتير حلو مشهد المعارضة بالمناطق، والاحلى المعارضة اللي بدوائر الجنوب، على امل انها تلاقي ارضية مشتركة تنعكس ايجابا وخرق بكل الدوائر، ومن دون ادنى شك الترشح ببعض المناطق بلبنان هو النضال والمقاومة بحد ذاتها بصرف النظر عن النتائج.

الاهم من كل هيدا انه ما في ولا واحد امتنع عن الترشح اعتراضا على السياسات العامة للبلد او نصرة للمواطنين، لا كل المنسحبين حتى الان في ما عدا سعدالحريري انسحبوا لاسباب شخصية، بس في اللي ما بيتخلى عنا لا بالسراء ولا بالضراء، يعني بيتحمل مسؤليته معنا متل حامل للامانة، طب دولتك يعني نحن منعرف انك نظيف الكف وما في غبار عليك ولا شاركت بصفقات ولا بعمولات ولا بتوظيفات ولا حتى انت من زعماء الحرب السابقين طب دولتك ما تعتب؟ انه الواحد بيشتغل ليرتاح آخر عمره ما بدك ترتاح؟ او لحقتك الهندسات المالية ونهب لك رياض سلامة اموالك وما بقى مطمن ع آخرتك؟ مضطر تبقى مرشح عالانتخابات لان ما في ضمان شيخوخة ولا تقديمات اجتماعية بفهمك الواحد ما بأمن ع آخرته بهالبلد بده يبقى عم يتقاسم الحصص لاخر يوم بعمره، بس انا بحييك اثبتت لحد هلق انك ضد التوريث السياسي، الا اذا عملتنا اياها مفاجأة، وسابقة بالبرلمان وفتت انت وواحد من الشباب باسل او عبد الله مثلا عالبرلمان، بحق لك على فكرة بعد هالعمر لازم يكون الك تسعيرة خاصة انه بالقليلة بعد ٣٠ سنة رئاسة مجلس نواب يحق لك بنائب ببلاش.

على الهامش سليمان بيك فرنجية مش محمس لمعركة الرئاسة لانه ما بيقبل يكون في منظومة عم تعطله ولهلق ما فتح مع الحاكم بامر السلطة موضوع الرئاسة، بس هو مستعد يكون الشمعة اللي بتحترق كرمالنا اذا اختاره المرشد الاعلى المحلي بس كمان اذا ما اختاره رح يتفهم الوضع. هلق في مشكلة وحدة معرقلة معه كإن، أو رح تعرقل معنا انه مش عارف حاله وين بده يصف من ميلة هو مع الحرية والليبرالة والتقدمية اللي هي كلها صفات الغرب وتحديدا اميركا، ومن جهة تانية نصير واعظم حليف لحزب الله، مع العروبة ومع الفرس ومع المحور.. ما بعرف اذا هو منتبه انه هول مشروعي نقيضين ما فيهم يكونوا بشخص واحد او برئيس واحد.. او مش منتبه وهون بتصير المصيبة شوي اكبر.

قبل ما اختم لو ما مبادرة فردية من د محمد مراد بولونيا لكانوا اولادنا راحوا فرق الحيطة والحذر بأوكرانيا، لان اصحاب السيادة والاموال والمسؤولية مشغولين بانقاذ الداخل من الانهيار الوضع الاجتماعي والاقتصادي وصل الى ما بعد بعد الانهيار، الاسعار بالتلفونات بالبنزين بالكهرباء بالضرايب بالسلع طالعة طلوع بشكل متواصل الشي الوحيد اللي عم يرخص بالبلد هو المواطن. المصارف عنم تسكر ع بكير قال كرمال المازوت، طب اللي سرق المصاري ما معه يدفع حق مازوت، مين منا بده يكون معه؟

للامانة الواحد ما كتير اله عين يحكي وهي الدنيا قايمة قيامتها بالحرب، ولهلق بعد ما انحلت معنا نحن كلبنانيين، بالقليلة رسمياً بعد ما عرفنا مع مين لازم نصف، يعني كل يوم منراقب التطورات عالارض ببين انه الاميركان ميال مع اوكرانيا منقول اليوم مع اوكرانيا، ببين انه الخليج ميال لروسيا منصير مع روسيا، بس هو اسلم شي متل ما هلق الوضع كل فريق مع جهة هيك كيف ما خلصت الحرب منلاقي مين نوقف معه، لان للصراحة اللي عم يصير بأوكرانيا اكبر مني ومنك.

ان شاء الله موت اذا عم كذب بس في سلسلة عاملها الزميل جاد غصن اسمها التاريخ الذي لم يروَ لازم تنعرض عالشاشات بالساحات العامة لانها بتختصر التاريخ والحاضر... والمستقبل اذا رجعنا صوتنا لفنس السلطة الفاشلة المجرمة النصابة.. خليني ساكتة

--