خليني ساكتة ١٣٧ - المرشحين عم يكتروا بس السؤال الاساسي.. شو بيشتغل لبنان؟

لبنان شو بيشتغل؟

حقيقة هيدا سؤال حقيقي اللي يعرف بليز يعلق عالفيديو ويخبرني، لان يمكن اذا قدرنا نعمل definition شو بيشتغل لبنان يمكن نقدر نلاقي حل لازمته

اي شخص بالحياة بيشتغل ليأمن مستلزماته ويقدر يضمن حياته وحياة العالم المسؤول عنها وكل ما كبرت العيلة بتكبر المسؤولية ويمكن يضطر يشتغل اكتر من شغلة ليكفي افرادها

من هون حقيقة لبنان شو بيشتغل؟ شو شغلته؟ كيف هيدا البلد (المتمثل بعهده وحكومته الحالية وكل اللي سبقوهم) بيتحملوا مسؤوليتهم اتجاه هالشعب

شو الشي اللي بتشتغله هالدولة لتضمن انه شعبها يكون عنده الحد الادنى من الامان المعيشي.

منكون مفكرين انه هالبلد بيشتغل شي اي شي، مع كل ازمة بخيب املنا اكتر، على اساس انه بلد بنظام مصرفي نموذجي طلع نموذج بالفساد والنصب والنهب وسرقة تعب العالم. على اساس انه بلد سياحي عملنا اللي ما بينعمل بالسواح بالداخل والخارج لكرهنا انفسنا، بلد كان عنا زراعات موسمية وحمضيات بحسب كتب الجغرافيا تبين مع الوقت اننا منزرع فاكهة ومنصدر كابتغون، وارباب وزاراة الزراعة المتتالية واللي اكترهم من حزب العزة والكرامة ما امنوا اي شي لهلبلد لاخر شي يطلع المرشد الاعلى المحلي يعيط علينا ويقلنا انه طلب منا نزرع عالبلكون وما سمعنا الكلمة

البلد لا بيشتغل صناعة ولا زراعة ولا اختراعات ولا هندسة ولا خدمات ولا شي بيشتغل شحاد من دول العالم ونصاب عالداخل وناهب المساعدات والاموال

بيشغتل مسرح للنواب والوزراء والزعماء اللي بيكذبوا الكذبة وبصدقوها وبتطلعوا يوم بعد يوم يعيدوها وكإن تكرار الكذبة بيعمل منها حقيقة

انا يمكن اضطر وقف خليني ساكتة لان صارت المنافسة كتير قوية على الساحة جبران شخصيا نازل ببرنامج عالسوشيل ميديا اسمه دقيقة مع جبران، ما يغشكم بتاكلوا الضرب اذا سمعتوه لان دايما بخبر الخبرية بأكثر من دقيقة، عن شو بيحكي بيحكي عن درب الجلجلة اللي عيشها بيننا نحن الشعب الجاحد الحقود اللي دايما منخونه يوم منعمل عليه bulying بما خلونا ويوم منعمل ثورة كذابة هدفها ضده هو شخصيا، الحل الوحيد للرد عليه هو نعمل فيديو مقابيل فيديو والحسابة بتحسب، بس منتبه ع فكرة لابس اسود لا ما تبين المارك وشالح الساعة وراخي اللحية ومخفف anticern بليز ما يقرر يطلع بحلقات مع العوينات، لان بده يصير وزن الفيديو كتير تقيل .... دمه

خلينا بالمهم البلد ما بقى رايح عالانهيار، لان بعتقد الانهيار اله قعر آخر شي الواحد بيوصل له، اما نحن وضعنا فهو من دون قعر تهاوي لا متناني، يعني اللي بشوف حلقة الوف اوف اوف تبع هالاسبوع بتلخص المشهد العام تبع هيدا البلد اللي كمان بفترة كان يعتبر منارة الشرق وقبلته الاعلامية، حفنة نقاببين عم بكبوا على بعضهم وعلى الدولة مسؤولية الوضع، حفلة زجل وتبخير على اساس بكون عم ينسأل السؤال لنعرف مين المحتكر شوي بيطلعوا الكل محتكرين الا اللي مشاركين بالبرنامج، بهاجم وزير الاقتصاد اللي قال انه تارك عيلته ونازل عالطريق وبس يتصل وزير الاقتصاد منصير عم نعمل مغلي، وانه من باب الخرص انتقدنا.. الحاضر الغائب بالحلقة كبير اللصوص رياض سلامة وعصابة المصارف انا بقول وقفوا الشغل مع المحامين وحولوا البادجيت على ام تي في ونجم الاوف اوف اوف لانه ما رح تلاقوا محامي افضل من هيك بحياتكم

المرشحين عم يكتروا وهني ٣ انواع السلطةاشهر من ان يعرفوا مطلوبين عالتحقيق ومسؤولين عن هدر اموال عامة مشاركين بالفساد والانهيار/ احتياط السلطة هول مع بالشكل معارضين بالمضمون موالين للكل ما عدا فريق واحد من السلطة قد يتغير بتغير المنطقة/ المعارضة وهني شاركوا بالسلطة وعندهم مسؤوليات متفاوتة ولكنهم بالمبدأ من كلهم يعني كلهم/ والثوار هول الشباب والصبايا الحقيقيين اللي بيستاهلوا ياخدوا فرصتهم الا انه الخوف الاكبر عليهم تشرذمهم ضمن لوائح متعددة هو اللي بيعطي الpass الاكبر للسلطة الاصيلة والرديفة، من هيك هول المجموعات بحاجة انهم يتكاتفوا ويحاولوا يبنوا تحالفات مع الاقل سوء من افرقاء كلهم يعني كلهم لثالح الغاية الكبرى ،منها وعلى رأسها اسقاط اكترية العهد والصهر وحليفه وحليف حليفه

ومتل ما البلد ما بيشتغل شي مرشحين السلطة كمان ما بيشتغلوا شي من عزا لفرح لمقابلات تلفزيونية، لا بتفهم على اي اساس عم يرجعوا يترشحوا ولا على اي اساس ممكن فجأة يصيروا مع الغاء الانتخابات، بس الانتخابات او محاولتها اساسية خدوا مثلا النائب حسن فضل الله واخيرا من بعد سنوات قال انه الملفات عبارة عن ٢٥٠٠ ملف اخده شي ٥ سنين ليقلنا كم ملف هلق بياخده شي ١٠ سنين بيبلش يعطينا الحروف الاولى من اسماء الرؤوس الكبيرة المتورطة. السؤال الاكبر هل من بين حلفاء الحزب الحاليين والمرشحين من بين هؤلاء؟ خليها للزمن يخبرنا

هلق انتقاد النائب حسن فضل الله سهل بس الوجه الجديد عند حزب الله هيدا كيف بتنتقده؟

اي كلمة بتحكيها بتطلع عم تحتقر الرموز الدينية بكفروك او بخونوك يمكن احسن شي يكتفي الواحد بالفيديو لان فيه ما يكفي من احتقار العقل البشري بما لا يمكن وصفه، يعني بس ناقص هو وحليفه جبران باسيل يعملوا ديو شي فيديو مع بعض.

على الهامش عن جد طلع عنا تقل بالحرب ع اوكرانيا انه رأينا مؤثر لدرجة خصص لنا المرشد الاعلى المحلي خطاب من وقته ليبهدلنا على موقفنا، وعلى عداوتنا غير المبررة للروس وكشف لنا بهالحشرة انه الروس كانوا بدهم يساعدونا بالنفط باللبناني، مش ع اساس داعمين الليرة الاساسيين هني الايرانية؟ هلق صاروا الروس؟ هو الهيئة محور كامل مؤمن بالليرة من ثبات الليرة بالتحديد.

اهم شي في بس يبلش يبهدل وينتقد الحكومة بتحسه هو وجبران باسيل عندهم حكومة وهمية وسلطة موجودة براسهم ليهاجموها وحكومة حقيقية ليحكموها، وهيدي شي طبيعي بعلم النفس انا ابنتي بس كانت صغيرة شو ما تعمل غلط قل لها مين عمل هيك تقل لي دييغو ودييغو كان خيها الnaughty ال imaginary اللي بعزب وانا كان مطلوب مني قاصص دييغو متل ما هلق السيد نصرالله والاستاذ باسيل بدهم ايانا نحن الشعب نحاسب المقصرين اللي منهم وفيهم وهني حاميينهم

قبل ما اختم وكمان مدير عام مصلحة السكك الحديد ما عجبه انه الفرنسيين قدموا باصات هبة قال بالمصلحة ما بقى عنده موظفين فتحوا باب التعيينات بالسكة الحديد عجلوا، وين بدك تحطهم اذا وظفتهم ما حولتوا كل السكة لنايت كلوبز

ان شاء الله موت اذا عم كذب بس مع ازمة الزيت والقمح والبنزين والسكر والدولار بس الحكومة لقيت وقت للتعينات زعلت جبران باسيل وما قبلت بالميغاسنتر بس رضيت عمه بتعيين اللواء صليبا بأمن الدولة من دون ما يلاقوا مخرج انه هو ورايح يستلم منصبه الجديد يمرق ع قاضي التحقيق بقضية المرفأ وكمان صار عنا وزير اعلام جديد يعني تخايلوا نفوت على مرحلة المجاعة وانعدام الامن الغذائي من دون وزير اعلام.. خليني ساكتة