خليني ساكتة١٣٩- مجزرة انصار تأكيد إننا ببلد غير مؤتمن على حياتنا!

خليني ساكتة

تم النشر في 27 مارس 2022


مجزرة. مجزرة اودت بحياة ٤ نساء، مجزرة اخدتنا ٢٣ يوم لنعرف او ننتبه انها صارت. مجزرة وقفتنا مرة جديدة قدام حقيقة اننا بلا قيمة كبشر بهيدا البلد، وفي اصلا تدرج بانعدام القيمة، يعني المرأة بشكل عام بلا قيمة اكتر من الرجل. وهيدا الحكي ما خصه بالنسوية، بس لو كان اللي انفقدوا ٤ رجال، ما كان انحط فرضية انهم هربوا، ولا طلعت اخبار طالعة نازلة عن اسباب اختفائهم، كان دغري انحط فرضية جرمية، اما وإن المفقدات نساء، فكان اسهل الاستلشاء بالقضية، لدواعي عائلية وشرفية وصيت البنات.

نحن ببلد ما بيتهم بالجوعان الا اذا كان ناحب ولا بالمرأة الا اذا كانت عارية. نحن عايشين ببلد غير مؤتمن على حياتنا، نحن عايشين بحماية قوى امنية عندها استنسابية بالتعاطي مع الامور وعندها مناطق ما بتقدر تفوت عليها الا بإذن لجان امنية، نحن عايشين ببلد مقسم لجزر طائفية أمنية على قاعدة حارة كل مين إيده اله.

عادة نبيه بري كان دائما يقول اللغة العربية فضفاضة كل مرة يعلقوا فيها العصابة كرمال كتابة البيان الوزاري

يلاقي حل يتقاسموا يتحاصصوا ويرجعوا يركبوا محلهم

ولكن يبدو لغة المسؤولين غير اللغة اللي نحن الشعب منستعملها لان مفردات لغتنا ضيقة وعم بتضيق اكتر واكتر متل الحبل اللي عم يلف على رقبتنا، لدرجة صار اللي عم يتنفس منا بيتعبر شهيد حي واللي مات ما بجوز عليه الا الرحمة من دون ما يكون في امل انه ياخد حقه

ما في مسؤول بيطلع عالتلفزيون بكون مسؤول عن شي دائما في ضرب هو آكله من حدا التاني المصارف من مصرف لبنان ومصرف لبنان من الدولة والدولة آكلة الاخضر واليابس

على سبيل المثال لا الحصر وزيرة مالية سابقة ووزيرة داخلية سابقة وعضو مجلس ادارة بأكبر مصارف لبنان ريا الحسن طلعت مبارح آكلة الضرب اكتر من اي مواطن راح شقى عمره بالمصارف.

من المفترض اني حاول اتهاضم او اكتب الحلقة بشكل تهكمي على الوضع، من هيك رح خبركم شو صار هالاسبوع غادة عون وقفت رجا سلامة خيه لكبير اللصوص الحاكم بامر الليرة رياض سلامة واللي المعلومات بتقول انه متحصن داخل المصرف المركزي بما يقبضوا عليه، رجا توقف ورياض مطلوب للتحقيق بس مش تفكروا بتهمة هدر اموال الدولة او الاموال المنهوبة لا مطلوب كرمال الاثراء غير المشروع انه هو غني اكتر من اللازم، هلق رياض مطلوب بس عم يجتمع مع وزير الطاقة وعم يسير امور البلد المالية.. كل القرارات المالية اليومية بالبلد بإيد رياض سلامة بس غادة عون مانعته من السفر.. يعني كبير اللصوص ممنوع من السفر بس مش ممنوع من التصرف والتداول والتشاور والتفاوض باسم الدولة.

اذا ضحككم السيناريو اللي هلق قلته ما الي جميلة فيه، لان ما بظن انه اهم كاتب بالعالم ممكن يلاقي طريقة اكثر سخرية وكاريكاتورية بالعالم من الحقيقة بهالبلد.

انا شخصيا ما هاممني الوضع العام ولا اذا بيزعل رياض اذا بطلع قرارات بتأثر عالمحروقات او الاكل انا الشخص الوحيد اللي هاممني رضاه هو صاحب الموتور، صاحب الموتور هو اهم واحد تحافظ على علاقتك معه وخصوصي جايين عالصيف، يعني هلق الدنيا برد عم يفوتنا عالنوم الساعة ١٠ الاسبوع الماضي كان الساعة ١٢، بس بكرا بالصيف كيف يعني بدنا نتدلل؟؟ اه بتكون طلعت نتائج الانتخابات وعلقنا صورة الزعماء تنور لنا حياتنا

يعني اذا هلق قبل الانتخابات وهلقد مش معبرين هالشعب، تتذكروا وقت كانوا يدللوا والكل يتطلب شي بده زفت شي بده قسط جامعة شي بده وظيفة شي بده واسطة.. هلق راسمالها القصة ٢ كيلو عدس وكيلو حمص وغالون زيت.. أسوأ نوع هيدا اللي بقل لك ياخد منه وبنتخب غيره.. ما هو اصلا اذا كان رب البيت بالطبل ضارب.. ما هني روضوا الاكترية الساحقة لتصير رهن الزبائنية

الانتخابات عم تقرب السلطة عن ترجف لدرجة بكلمتين مختصرين عليكم انكم تنتخبوهم برضاكم او اذا كنتوا زعلانين النتيجة وحدة فكونوا اذكيا وما تتعبوا حالكم وتتعبوهم.

الكل كان خايف من مشهد امني يطير الانتخابات بس الارجح انه السلطة وبعد ما عم تشوف عالارض تشرذم المعارضة كل يوم عم ترتاح اكتر بس كمان ما رح تمزقها بلا ما تحصن حالها وعلى ما يبدو الاحكام على ما تبقى من بارازينات رح ينحل من باب القضاء اللي بحاكم المصارف بس ما بحاكم ولا سياسي واللي بيدعي ع جعجع بقضية الطيونة بس بخاف يجيب علي حسن خليل عالتحقيق بقضية المرفأ.. ولا ما تفهموني غلط اكيد انا مع محاكمة المصارف وجعجع اذا مذنب بس كمان مع محاكمة السياسيين والمتهمين بقضية المرفأ واللي بيطلع بريء صحتين ع قلبه

على الهامش المرشح على الانتخابات ميشال الياس المر زار جريدة بيه.. خلص خلصت النكتة

قبل ما اختم بتحس اننا شعب مخدر هيك منوم مغنطيسيا انه ايه بدهم يقبضوا جد اذا قبضوها ع ارواحنا وما طلع من امرنا شي، امها لرولا يعقوب قالت لها صار فيكي تنامي يا ماما اخدت لك حقك، من بعد ٩ سنين المجرم انحكم بإنه المسبب بقتل رولا يعقوب.. ما لحقنا ناخد نفس انه رولا تنام عرفنا انه تالا وريما ومايا وامهن انقتلوا.. الابشع من الجريمة العالم اللي عم تقول اكيد في شي عاملينه النساء ال٤ ادى لقتلهن

ان شاء الله موت اذا عم كذب، لو تحاكم واحد بس من المسببين بانفجار المرفأ، لو تحاكم واحد من المسببين بانفجار التليل، لو تحاكم واحد بس من اللي سرقوا مصريات العالم، لو تحاكم واحد بس بقضية الاغتيالات السياسية من رفيق الحريري للقمان سليم، لو تحاكم مجرم واحد مدعوم، لو القوى الامنية ما بدها إذن لمداهمة مناطق معينة، لو محاكمة المجرمين ما فيها زعماء بترسم خطوط حمر ولو محاكمة المجرمين ما فيها ٦ و٦ مكرر بين الطوائف لو في عنا قضاء مستقل... يمكن يمكن كان المجرم اللي ارتكب مجزرة انصار ما استرجى يرتكبها... خليني ساكتة

--