خليني ساكتة ١٤٠- حدا يخبر مرشحي السلطة انه الكذب برمضان وشهر الصيام حرام!

خليني ساكتة

تم النشر في 4 أبريل 2022


ويل لأمة تاركة نوابها جوعانين

ويل لأمة بتقبض فريش دولار وتاركة زعمائها شحادين

ويل لأمة عايشة عندها كهربا وتاركة حكامها معتمين

ويل لامة نفطية وتاركة وزرائها واقفين بطابور البنزين

للأمانة اليوم بس ندمت اني ما ترشحت عالانتخابات، لإن اكتشفت من بعد تشكيل اللوائح وبشكل خاص تبع السلطة، انه مشروعي بيتقاطع مع مشروعهم، هني كمان حلمهم يبنوا دولة ويعيشوا بكنفها، وهني كمان بدهم يجيبوا المي والكهربا، ولدرجة بدهم يرجعوا يشغلوا السكة الحديد

ومع اقتراب الانتخابات خاصة عند المرشحين الشيعة في شغلتين اساسيتين بالخطاب الانتخابي، البعد الشيعي بمعناه الديني هيدا متل التبرع بالدم، بقدمه المرشح اللي ضد خط الثنائي الشيعي او احد اقطابه، بقدمه كدليل على شيعيته، والشغلة التانية انه دايما هالحدث المرتبط بالائمة والاولياء بكون شاهد عليه حدا من حزب الله، نائب، مسؤول، مراسل بالمنار المهم في شاهد ولاؤه مثبت

شفتوا ليه انا ندمانة ليه ما ترشحت لان بحس بيلبق لي شكل لائحة واترشح هيك كل عمري بحس فيي شي من الملكة اليزابيث ما في شي بيغريني ما في شي بعيني، حتى سألوا الشخص الوحيد اللي بعرفه من حزب الله ابن خالي هو بيشهد لي

بعدين من بعد ما سمعتوا الاستيذ نبيه او الحج محمد رعد او جبران باسيل وبرامجهم الانتخابية ودعوتهم الصادقة للعالم تنتخبهم على برامجمهم الاصدق، شو حسيته؟ عن جد ما تذكرتوني؟ ما حسيتوا انه هاللوائح والبرامج كلها لازم يكون اسمها خليني ساكتة؟

واحد ما خلوه، وثنائي مستهدف، ومعارضة حدث ولا حرج كل لائحة وكل مرشح بيطلع بقل لك انه بده يجيب حق ابن منطقته المهمش، وهيك بتتكرر الخطابات او بتحسها هي ذاتها، لان صح ابن عكار مهمش، وابن صيدا مهمش واين الجنوب مهمش وابن الشوف مهمش، ما هو البلد كله مهمش وقفت على ابناؤه؟ والاهضم انه كل ما واحد يطلع يحكي بقول انه كانت الثورة موجهة ضده متل المشانق بالساحات كانوا لبري ونصرالله بس بحسب بري شخصيا، والثوار نزلوا بالهيلا هو بس ضد باسيل بحسب باسيل، والقوات معتبرين التعميم بالثورة كان مؤذي، والحريري ترك الجمل بما حمل، وجنبلاط عم يحذر من الاموال المتدفقة ضده.. طب اذا كل واحد فيكم لقي انه الثورة كانت ضده فإذا الثورة حقيقة كانت ضد كلن يعني كلن

ومع هيك قانون انتخابي، منقدر ننافس بالجهبزة بالعلوم السياسية قد ما عم منافس بالعلوم الاقتصادية، طلعت اللوائح وفي كتير منها وخاصة عند المعارضة ما بعرف اذا لازم نقول يا ريت ما طلعت.. يعني بتطلع بتشوف اول اسم تمام التاني برافو التالت كتير منيح الرابع بضوي راسك؟ هيدا مين كيف ليه؟ سلطة رديفة بس شو بدنا نعمل هيدا اللي طلع بإيدنا.. والمضحك المبكي الفرد الرديف بغير خطاب المجموعة كلها وبيفرض شروطه لان هو اصلا هيدا دوره الحقيقي من انه ينضم للائحة.

واصدق عالم من الكل هني اللي اطلقوا برامجهم الانتخابية يوم اول نيسان، هيك هول اصلا هيدا اليوم بناسبهم لانه للامانة هو يمكن لازم بلبنان استبداله بيوم عيد الاستقلال لانه بالقليلة بمثل تقريبا كل الطبقة السياسية بالبلد واكثر من ٦٧.٣ بالمية من الشعب

على الهامش قال الرئيس عون ما رح يترك الكرسي لحد ما يقضي على آخر فاسد، في حدا يطلع عند فخامته ويلعبه لعبة hot cold، هيدي بس نخبي شي وبس اللي عم يفتش عليه يقرب منه منصير نزقف وبس يبعد منقول cold cold cold، علموا اياها وخلوه يعمل عزيمة عشا عائلية مع بعض الاصدقاء من وزراء ونواب وخدوا ع زقيف من اول ما يوصل الصهر سندة الضهر على القصر

قبل ما اختم مضطرة علق على وزير ما يطلبه المشاهدون، وليد فياض يعني تخايلوا لو نحن بلد طبيعي، وانه اصلا الوزارة اللي سلموه اياها ما عليها ٤٦ مليار دولار دين اكيد زادوا هلق، انه بعتقدكنا استهضمناه كزلمة، هيك شي مسلي بخلال اليوميات الداكنة متل الوقفة مع الاعلان، الشي الوحيد اللي عم شكك فيه كل يوم اكتر من يوم هو انتماؤه السياسي بتحسه كتير اهضم من انه يكون عوني

ان شاء الله موت اذا عم كذب بس رجا سلامة كفالته ٥٠٠ مليار ليرة اكتر من ٢٠ مليون دولار، كفالة غير مسبوقة بتاريخ المحاكم اللبنانية، بس يعني كل واحد وعلى قد قيمته، ما عادة منقولعن اللي معه مصاري شو قاعد على بنك؟ فما بالك اذا كان خيك قاعد حقيقة على بنك ومش على اي بنك على البنك المركزي خليني ساكتة