خليني ساكتة ١٤١ - كنا ورح نبقى هون نحمي ونبني بدنا وفينا وبصوت العقل… نصوت ضدهم كلن يعني كلن!

أقل من ٤٠ يوم للانتخابات، ارتفعت صور المرشحين.. شعارات ع مد عينك والنظر.. شعارات معها مؤثرات بصرية شاهدة على انجازات السلطة وكتير من المرشحين واللوائح اللي مزينة الطرقات

مشهد 4D، بتكون شارد مثلا بشعار كنا ورح نبقى هون بتنزل بجورة برج دماغك وبتتخلخل مفاصل سيارتك، بتحس بأهمية حياتك، تروح تربيعات السيارة تروح السيارة روح انا المهم هني يبقوا.. التوازن بالقضاء واهمية السيادة وشعار نحمي ونبني مزين بسحبة نفايات الوان اكياس زبالة مختلفة بتعبر بأمانة عن التنوع بالبلد، بيحترق المشهد صورة اشخاص عم تبرم بالنفايات يمكن عن شي تبيعه، يمكن عن شي تلبسه ويمكن عن شي تاكله.. والشعار عم يطلع فيهم من فوق شامخ مناخيره لما يشم الريحة.. صورة شعارات نحنا فينا وبدنا، وبيروت بدها قلب مشعشعة بالعتمة بتكسر من وطأة الوحشة تبع الطرقات.. وبتمد ايدها لتسلم على صوت العقل، يعني لو اعتمدتوا العقل بلا صوت يمكن كان اكتر تعبيرا خصوصي انه الزعيم المرشح ولا مرة اسمعنا صوته دايما تغريدات بيه مغطاية عالساحة.

الحكيم شرح ووضح عملية تبادل الاصوات، وكيف فينا نعتمد على الحدمات والمعارف الخاصة بمقابل بدنا نجير اصوات لنربح المعركة.

رئيس الما خلونا اتحفانا انهم رح يبقوا هون، بس هالمرة رح يجيبوا الكهربا، لان الما خلوهم على مدى ١٥ سنة هلق بدهم يخلوهم.. والاهم من هيدا كشف مدى وطاوة الثورة اللي كانت ضده وهلق بعدها عم تشتغل لتسقطه من هيك المرحلة لازم لها قرارات مصيرية.

ثنائي امل وحزب الله قد يكون الاوقح على الاطلاق، يعني بنافس بالوقاحة حليفه الليموني، لجهة الاسماء والوعود المطروحة، يا ريت من شي ٢٠ سنة سلمناهم البلد، يا ريت كنا عاطيين نبيه بري رئاسة مجلس النواب، ووزارة المالية ويا ريت كنا من اول يوم مسلمين وزارة الزراعة والصحة لحزب الله، ووزارة الاشغال للمردة شي يوم، يا ريت شي مرة اعطينا وزارة المهجرين للاشتراكي، والاهم من كل هيدا يااااااا ريت كنا اعطينا وزاوة الطاقة للعونيين، صحيح كان انهار البلد بس ما كنا وصلنا لهيدي الدرجة من الانهيار، كان انهار شي قطاع وبقي قطاع تاني واقف على اجريه، ما كان صار هيدا الchute libre وخصوصي اننا بعهد قوي ماسكنا كلنا بالحبل وشادد فينا لما نوصل على جهنم، صحيح هو بعتنا لهونيك بس رجع غير رأيه قال حرام نحن.

وفي تيار المستقبل اللي ما غاب بشكل كلي بتحسه تحول بان كي مون بيقلق بيستنكر برحب.

الانتخابات هيدي السنة بتفرق عن كل مرة، مش بس بسبب غياب الزفت الانتخابي، ونوعية الرشاوى الانتخابية، لا كمان بسبب الوعود اللي بعد الانتخابات، لإن من المتوقع في حال حدوث الانتخابات، نحن موعودين ب ١٦ ايار بارتفاع هائل للدولار، ارتفاع فاتورة الاتصالات، ارتفاع سعر ربطة الخبز، ارتفاع فاتورة الموتور اللي وصلت خصوصي بالمناطق اللي مسيطرة عليها حركة المحرومين ببيروت لفواتير خيالية بالفريش دولار... ارتفاع كل شي ماعدا قيمة الانسان

لوائح التغيير اكتملت، وللاسف بكتير من الدوائر اختلطت، والمشهد بدل ما يكون رايح لمواجهة حقيقية مع قوى السلطة، صارت مواجهة بين قوى التغيير، اكيد تعدد اللوائح والخيارات هو دليل عافية ديموقراطية، بس للاسف هيدي الديموقراطية بتشبه كل شي ببلدنا، متل الفجلة المفوخرة، يعني كان الاساس بناء معركة حالية ضد السلطة بما يؤدي الى خرقها بشكل كتير كبير بلوائح موحدة كمرحلة انتقالية، بهدف ادخال نسبة على البرلمان بالقليلة تضمن تغيير القانون الانتخابي بما يضمن صحة التمثيل والعالم الديموقراطي الحقيقي، على انه بالانتخابات اللي بعد هيدي يصير في معركة حقيقية بين جميع الافرقاء التغييرية السيادية والمعارضة والسلطة، ولكن للاسف هيدا الشي ما صار، ومع هيدا لا بد من اننا كلنا ننتخب وما نقاطع، حتى لو في ثغرات ببعض لوائح قوى التغيير، ولكن هيدا واجبنا الحقيقي لان هيدي فرصتنا الحقيقية وبتبديل المشهد والغربلة حتى داخل صفوفنا وفتح الباب قدام محاسبة حقيقية بعدين..

تعويم السلطة فيه ملامح دولية اتفاق صندوق النقد الدولي باعطاء ٣ مليار دولار، بذكر بالوعود بمؤتمر سيدر بال ٢٠١٨، بعد بس ناقصنا حدا يطلع يوعدنا ب ٩٠٠ الف وظيفة وبيكمل المشهد.. يعني الحاكم بأمر الليرة الهارب من التحقيق اللي كسر الرقم القياسي بالقرارات المالية الواهية صرف آخر سنتين اكتر من ٣٢ مليار دولار دعم على مواد تهرب معظمها لآخر شي يطلع له ٣ مليار مقسطين ع ٤ سنين، هلق الصندوق الدولي يا حرام شايفة فرصة لفرض الاصلاحات، اما علي بابا اللي هو مجموعة الزعماء وال ٤٠ حرامي اللي هني كتلهم النيابية والوزارية ما شايفين اللا فرصة لنهم ٣ مليار جداد من هيك قاتلين حالهم عالانتخابات

بيبقى الامل انه تتم ادارة ال ٣ مليار متل ادارة نجيب ميقاتي لشركاته الخاصة ويحقق لنا ارباح. المدعى عليه رياض سلامة، تارك خيه بالتوقيف وعم يحاول انقاذنا، واكد انه بعدنا منملك تاني اكبر احتياطي دهب بين الدول العربية بـ286 طنًا من الذهب، على امل ما يكون نفس تصريحات الليرة بخير.. بس بكل الحالات شيلوا الاحتياطي من تحت ايديه قبل ما يتبخر متل الودائع.

على الهامش وزيري الاقتصاد والزراعة عملوا عملية كوماندوس على سوق الخضار، نشاط امين سلام على الارض مشكور بس الشي اللي ما عم افهمه تحديدا علاقة وزير الاقتصاد بأمن الدولة، يعني هيك هو جاية باكيدج كل ما ينزل على الشارع بتنزل معه كتائب مدججة؟ حدا يسألنا اياه محل ما كان عايش بواشنطن شي مرة بحياته شاف كونغرس مان، او حتى الرئيس شخصيا ماشي هيك، يعني بالكاد قائد القوات المسلحة الاميركية بينزل بهيدا المشهد بمناطق ساخنة فيها حروب متل مثلا زيارته للعراق.. انه طب فهمنا الخسة وصل حقها لل ٤٠ الف ليرة بس مش يعني تكبر براسك معايك لدرجة تحجب الرؤية

قبل ما اختم باقي اقل من شهر على اقتراع ٢٤٥ الف مغترب، اصواتهم رح تنحفظ بمصرف لبنان، على امل ما يكون مصيرها متل مصير الودائع، بس اعتمادنا كتير كبير على المغتربين معليه اتذكروا منيح انكم برا لان هيدي السلطة هي اللي هجرتكم الخوف كل الخوف انه نتائج الانتخابات تعطي هيدي السلطة شرعية صورية جديدة..

ان شاء الله موت اذا عم كذب بس باقي اقل من ٢٠٠ يوم على انتهاء العهد القوي، ومعركة الرئاسة بلشت انا رح اقترح لائحة مرشحين بشوفهم اساسيين لادارة المرحلة المقبلة وملئ الفراغ اللي رح يتركوا اقوى رئيس بتاريخ الجمهورية.. وانتو بليز صوتوا

جبران باسيل - شربل خليل - سيمون ابي فاضل - اميل اميل لحود - سركيس سركيس ورياض سلامة... خليني ساكتة