مع اقتراب الانتخابات المفترضة
إسهال كلامي عند مرشحي السلطة، اجترار حاد للحجج، للمشاريع، للخطابات وللوعود
اللاعب الاكبر الوضع الاقتصادي، وجع الناس، كلهم حاسين مع الناس بس عم يتفرجوا عليهم، بدهم يساعدونا هني كنواب وازلام سلطة بس اذا اعطيناهم فرصة جديدة، انه القليل فيهم الها عيلته بالحكم شي ٢٠ سنة، بس هني كانوا ناطرين ال ٢٠٢٢ حتى يصححوا الامور قبل كانت السنوات الانتخابية ما عندها رنة على الاذن
صرت استحي ابقى عم عيد نفس الحكي، انه بحس عيب رح تفكروني عم كرر حالي، او فارغة ما عندي شي قوله، بس اذا واحد كل يوم بيطلع بقل لك مرحبا مضطرر ترد ب اهلين، يعني هيك وضع وهيك تكرار ما فيك ترد عليه الا بنفس الطريقة،
شو ممكن تقول لجبران باسيل مثلا بس يقل لك ما تصوت الموتورات صوت للكهربا انه معقول مثلا تسكت له؟ تسمح له يستغبيك هلقد؟ طب في حدا يخبره انه اذا واحد بقي يعيد الكذبة بالنهار الف مرة رح تبقى كذبة وما رح تصير حقيقة؟
تماما متل لما بطالعنا الحج محمد رعد بخطابه عن المؤامرة والتدخلات الخارجية، ما نحن اذا سلمنا جدل انه ازمة البنزين مؤامرة وحصار، وازمة الدولار مؤامرة وحصار، وازمة القمح مؤامرة وحصار، وقص على ذلك كل القصص طب كيف بدنا نصنف ازمة النفايات؟ يعني منقنع الاجيال انه فاتت المؤامرة الاميركية عملت حصار على مطامر الزبالة لتغرق جمهور المقاومة بالنفايات؟ انه جبل البيت الابيض شخصيا امر السفيرة انها تكتر عزايم واكل لتزيد كمية النفايات لتملي الشوارع؟
الحدث البارز هالاسبوع انه الدويلة طلبت من الدولة ببيان من الثنائي تفوت عالضاحية تضبط الامن من النشل والسرقة والمخدرات، هيدي مؤشرات انتخابية عالية الجودة، ما تستخفوا فيها، طبيعي بالتنسيق مع قوى الامر الواقع ولكن سيتم رفع الغطاء عن اي متمادي، يعني في وعد ولو غير مباشر بانه اذا فاتت شي دورية تعمل شغلها تطلع سالمة. هيدا الطلب اجا بعد ما صار موضوع النشل على مدار الساعة، وهون منرجع عالتدخل الخارجي، اللي وصل العالم لهيدي الدرجة من الفقر اولا وثانيا اللي عمل من مناطق معينة دويلات تخلت عنها الدولة وسلمتها لقوى الامر الواقع.
الامن قد ما ممسوك بالبلد ككل، بتحس مش انه في فلتان امني فيه هوشان امني، هيدا بيتمثل باطلاق نار من هون، اعتداء من هونيك، سكينة، نشل، وهيبة الدولة مش انه ضايعة بالدويلة بس لا انعدام هيبتها واصل لمطامر النفايات.. انتو متخايلين دولة بامها وبيها مش قادرة تضبط مطمر نفايات؟ انه مش بزيادة المطامر بشكل عام مصيبة بيئية لا هلق اكتشفنا انها كمان مصيبة امنية.. ومش بس طلع عنا مافية مصارف، وبنزين، وموتورات، لا وفي مافية نباشين.. طب يعني شو بدنا ننطر من دولة ما قادرة تسيطر على نباشين بالمطامر اكيد بهيبتها رح تقدر تسيطر على السلاح غير الشرعي وعلى الميليشيات وعلى المعتدين يمين وشمال.
مع اقتراب الانتخابات عم نكتشف level جديد من المشاكل كنا مثلا بادوية الامراض المستعصية صرنا بالبنج، كنا بالقمح صرنا بالطحين، كنا بجريمة المرفأ صرنا بهدم الاهراءات
بس روقوا شوي الميقاتي عم يهاجم المحتكرين وقوى السلطة عم تهاجم المحتكرين والمحتكرين عم يهاجموا المحتكرين وجبران باسيل بده يجيب لنا الكهربا
الانتخابات بدها تكلف ١٦ مليون دولار بس بيجيبوا الكهربا ليوم واحد فقط بكل لبنان، والبعثات الديبلوماسية رح تأضرب اذا ما اخدت مصاري الهيئات الادارية والقضائية رح تمتنع عن تسيير العملية الانتخابية اذا ما تم النظر بمطالبها، اقلام الاقتراع باستراليا في اعتراض عليها، وبعد رح نسمع كتير بس ما حدا يحطها بجبران باسيل هو ما خصه، اصلا هو بس كان بوزارة الخارجية عمل كل شي لمنع اي محاصصات وهيك بس ما خلوه، يعني تطيير الانتخابات ممكن يصير بشكة دبوس، بس السلطة كلها مع الانتخابات وعم تأكد انها صايرة بعد اقل من شهر
على الهامش بلشنا نصرف مصريات ال SDR من صندوق النقد الدولي قبل ما نقبضهم، لهلق فرمت الحكومة حوالي ٩٤ مليون دولار من ٣ مليار ٦٠ مليون منهم رايحين مباشرة للقطاع الانجح على الاطلاق على قطاع جبران باسيل لانقطاع مستدام في الكهرباء
قبل ما اختم الحملات الانتخابية ماشية والصوت عم يعلا، العبرة بالانتخابات، ووصل مراقبين دوليين ٢ لهلق عن كل دايرة لمراقبة نزاهة العملية الانتخابية وقال من مهمتهم يمضوا نص ساعة بكل مركز اقتراع.. حدا يخبرهم انه السلطة اللي عاملة الانتخابات نهبت كل مصريات العالم من ٣ سنين واغتالت اكتر من ٢٠٠ شخص ودمرت نص المدينة من اكتر من سنة ونص وصار لها ٣٠ سنة بتنهب وبتسرق والحج حسن فضل الله معه ملفات فساد بتطير روؤس كبيرة وما حدا قدر يمسك عليهم شي واحد لهلق.. فموفقين بالنص ساعة تبعكم باقلام الاقتراع
ان شاء الله موت اذا عم كذب بس بلشت لادي بمراقبة الانتخابات تحكي عن تهديد بالقتل وترهيب للمرشحين هيدا كله وبعد ممكن نسف الانتخابات عن بكرة ابيها بأي لحظة .. خليني ساكتة
