خليني ساكتة ١٤٤ - حلقة ما فيها ولا كلمة عن جبران باسيل عن لساني!

خليني ساكتة

تم النشر في 2 مايو 2022


 بقينا نقول اللبناني عنده ازمة هوية، لحد ما صار عنده ازمة باسبور. للحقيقة ازمة الباسبور ازمة نوعية، بتختلف لحد كبير عن ازمة الخبز والبنزين والكهربا، لان الباسبور مرتبط بالسفر والسفر مرتبط بالافق والافق بهيدا البلد معدوم.

ازمة الباسبور كتير معبرة، بتختصر واقع بلد، ما في باسبورات لان الدولة مفلسة، وما في باسبورات لان ما في دولار، وما في باسبورات لان ما في ادارة ولا تخطيط، لان البلد مندار على قاعدة ماشي والرب راعيه.

ازمة الباسبور على فكرة من باب الحفاظ عالثروة الثومية للي بتتمثل بالادمغة البشرية، يعني خلص البلد صار عنده اكتفاء ذاتي من اللي هاجروا ورجعوا رجع لهم رياض سلامة بكامل خبراته، ورجع حسين الحج حسن، يعني كمان رأفة بدول العالم، ما معقول هيك يبقى اللبناني عم يهاجر يقطف الفرص ويعبي مصاري ويرجع على البلد متخم بالاموال، بعدين لوين ممكن يوصل اللبناني بالخارج ما خلص وصلنا لل apogee من الاختراعات يعني اذا

synthese etude de nouveau lipopupide hemocompatible amphipathique

مسجل باسم لبناني شو بعد بدنا نعمل نحكم العالم؟

بس انا كل خوفي انه هالمسؤولين ما يحسوا فينا هالمرة، لان تتذكروا لما شانتال وقفت بالصف معنا لتسحب ال ٢٠٠$؟ اي ازمة الباسبور ما رح تأثر عليها وعلى اولادها لان معها الباسبور الفرنسي.. بس هيدا ما بيمنع انه جبل بعبدا بعد كم سنة يخبر بمذكراته مثلا عن الانجاز اللي عمله للحفاظ على الادمغة من الهجرة.

بس نقول كلن يعني كلن بتزعلوا، طب يعني قطاع واحد يكون ماشي حطوا على عينا انه شي واحد ماشي بالبلد وحتى الهجرة عورضتوا بطريقها، اذا رحتوا عالبحر بتنشفوه.

على الهامش جبل بعبدا راح شقى عمره بالمصارف متله متلنا، بس الفرق بينا وبينه انه نحن طالع بإيدنا نعمل شي لاننا بموقع مسؤولية بس هو المعتر شو طالع بإيده غير انه ينق، ويطالب مع اهالي الموقوفين بقضية المرفأ بضرورة استكمال التحقيق، منيح اللي في موقوفين بقضية المرفأ وعلى رأسهم بدري ضاهر ليبقى مذكر رئيس الجمهورية انه في كارثة وطنية صارت بعهده بعدهم ضحاياها ما اخدوا حقهم.

بس نحن وطن بيعرف يستثمر بكل شي وبما انه ما عنده الا مصايب، وطن حربوق، متل ما ركض ليطلب المساعدات بتفجير المرفأ تماما متل اول ما اول ما حلت كارثة غرق مركب طرابلس ركض العهد القوي ليخوف المجتمع الدولي من الهجرة غير الشرعية وانه ما بقى قادر يسيطر على النازحين السوريين، ادفعوا او شوفوا شو بدكم تعملوا.

عنا كل مقومات اننا نكون نموذج فاعل بالمجتمع الدولي، هجرة غير شرعية، تهريب، كابتاغون، بلد تصدير بامتياز.

صورتنا بدول العالم لا غبار عليها، شوفوا مثلا رايحين نعمل انتخابات مغتربين منظمة تنظيم لدرجة حتى انتو بالمسرحية ما قدرتوا تحملوها فقررتوا تعملوا twist قال من باب الحرص دعيته لجلسة طرح ثقة بالوزير.

كيف بده يلحق الواحد على وقاحتكم ما بقى عم اعرف، حقيقة صار اذا بس قطعت المشاكل ورا بعد براسه للواحد ممكن ينفجر، طب بدكم تبقوا بالحكم ليه؟ يعني نحن هلق اذا كلنا انزلنا انتخبناكم وبايعناكم كلكن يعني كلكن شو بتعملوا؟ لا ماضيكم ولا حاضركم ولا خطابكم اللي على اساسه بدكم العالم تنتخبكم مقبول. طب اذا كل واحد حافظ على مقاعده او واحد اخد اكتر من التاني بشوي ما رح تكملوا بالنهج التدميري وكل واحد يحط الحق عالتاني، طب نقطة الانطلاق معكم وين؟

فمن باب تغيير الجو اليوم عبالي احكي عن شباب بعمر الورد تيمور بيك مركز كتير على الانتخابات مش متل اداؤه بالبرلمان عم يدير الانتخابات بتفاصيل تفاصيلها ما عم يترك شي للصدف لدرجة قريه كلمة عريف الحفل بدل كلمته (تيمور)

بس نازل اللي اذكى منه اللي فاهمها من الآخر، هيدا اذا وصل ليكسر كل الارقام القياسية بالمجلس النيابي بالانجازات، لدرجة يمكن الشعب يعمل مظاهرات لياخد رئاسة المجلس من الشيعة بس ليحطوه محل رئيس المجلس قد ما حكيو بعبي الراس (ميشال الياس المر)

على الهامش المرشد الاعلى المحلي باطلالته الاخيرة ركز على الشق الاقليمي من شخصيته وهو تحرير القدس، هلق بعت رسالة من كلمتين مختصرتين للداخل بلا ما يسميه "ما رح تسمعوا اننا رح نحتفظ بحق الرد"، هيدي بس للتذكير مين الامر الناهي بالبلد على ابواب الانتخابات، قال اللي نحن متل اللي الله عاطينا مفكرينها رح تقدم او تأخر

للي ناطرني ما رح جيب سيرة الصهر المعجزة، وعلق على افطاراته وخطاباته الانتخابية وزيارته لعكار ما ينطر لان من باب تغير الجو ما بدي جيب سيرته رح استعين بصديق يقول اللي بقلبي (رياض قبيسي )

قبل ما اختم نحن شعب ما قادر يحصل على باسبور بالكاد بينقله من غرفة النوم عالمطبخ بلا فيزا، محاصر بالداخل من السلطة، ورهينة لمشروع ايراني مفروض عليه بقوة السلاح.. هيدا هو الاختصار الحقيقي لمعنى العدو من امامكم والبحر من ورائكم.

هيدا البحر اللي غرق فيه اهالي طرابلس الاسبوع الماضي، بكارثة بلشت تبرد ليه تحديداً؟ لان ما حدا بيتحاسب لا المقصر بتحاسب ولا المهرب بيتحاسب ولا المسبب بغرق المركب رح يتحاسب.

البحر ما كان بده باسبور، بس البحر غدار والمسؤولين عن الحادث غدارين اكتر منه. ما رح قول بدنا حق اهالي طرابلس، لان الشعارات بطلت تنفع، وما في حل، يمكن يكون الامل الوحيد هو انه الشعب يرقصكم بصناديق الاقتراع متل ما عم ترقصوله اولاده بالتوابيت... خليني ساكتة