١٤٥ حلقة
١٤٥ اسبوع
آلاف الكلمات
آلاف الدعوات
وكتير كتير من الدموع، حتى الابتسامات والضحكات كانت مجبولة بدموع، مرات دموع ناشفة اصعب بكتير من الدموع اللي بتكرج
١٤٥ اسبوع قبل الانتخابات
قبل الثورة وخلال الثورة وبعد الثورة
١٤٥ اسبوع قبل الانتخابات
قبل انفجار بيروت وخلال انفجار بيروت وبعد انفجار بيروت
وهيدي الحلقة الاخيرة قبل الانتخابات
وهي عم تتسجل خلال انتخابات المغتربين وعم تنشر بعد انتخابات المغتربين
بهيدي الحلقة سمحت لحالي حول الحلقة لشخصية، لإني اولا وأخيرا مواطنة لبنانية عاملة بمجال صحافي، ام، بنت لإم، وبي مات خلال الحرب، إخت، وزوجة.. يعني انا بمثل كتير من العالم اللي بتشبهني، انا وبكل أمانة ما بعرف اذا اللي رح انتخبهم على قد طموحاتي كمواطنة، بس الاكيدة منه اني ضد السلطة الحاكمة، ورح صوت ضدهم كلكن يعني كلكن
- لإنكم حكمتونا قبل الحرب وخلال الحرب وبعد الحرب صوتي مش الكم
- لإن لوائحكم مترأسها او داعمها زعيم من زعماء الحرب صوتي مش الكم
- لإن قتلتونا ببيوتنا ومنعتوا محاكمة القتلة صوتي مش الكم
- لإنكم اعتديتوا على المتظاهرين بالرصاص الحي صوتي مش الكم
- لإن كل واحد فيكم محكوم من بلد صوتي مش الكم
- لإن كل واحد فيكم مصلحته الشخصية بتفوق على مصلحة البلد صوتي مش الكم
- لإن سلطتكم نابعة من منطلق طائفي ولا مرة كان خطابكم جامع صوتي مش الكم
- لإن بتتناحروا بالعلن وبتتفقوا بالسر على سرقتنا صوتي مش الكم
- لإن سرقتوا تعب امي وقتلتوا بيي صوتي مش الكم
- لإن ما شايفة مستقبل لابنتي بهيدا البلد صوتي مش الكم
- لإن حاسة حالي مضطرة اتهجر مش هاجر صوتي مش الكم
- لإنكم اخدين البلد شركة مساهمة انته واولادكم صوتي مش الكم
- لإن الديموقراطية التوافقية بدعة لتكرس زعامتكم صوتي مش الكم
- لإن السلاح غير الشرعي حاكمكم وحاكمني صوتي مش الكم
- لإن حولتوا البلد من قطعة سما لمزبلة صوتي مش الكم
- لإن حياتنا مهددة يوميا بالرصاص الطايش صوتي مش الكم
- لإن في عالم عم تموت من الوجع لان ما في ادوية وغيرها على ابواب المستشفيات صوتي مش الكم
- لإن لوائحكم عليها الحرامي والنصاب والمجرم صوتي مش الكم
- لإن سلاحكم حامي الحرامي والفاسد والقاتل صوتي مش الكم
- لإن بال ٢٠٢٢ بدل ما يوصل البلد لصفر نفايات وصل لصفر كهربا صوتي مش الكم
- لإنكم عم تخلوا اصحاب الموتورات يتحكموا برقابنا صوتي مش الكم
- لإنكم نهبتوا اموالنا وتعبنا ومنعتوا المحاكمة عن المتركبين صوتي مش الكم
- لإن اذا منعطيكم فرصة بعد رح تمصوا دمنا لان ما بقى في شي تاني صوتي مش الكم
- لإنكم دايرين البلد بلا خطة اقتصادية او اجتماعية او سياسية صوتي مش الكم
- لإنكم دايما بتلاقوا ارضية مشتركة تلتقوا عليها ضد مصلحة المواطن صوتي مش الكم
- لانكم ضد قانون مدني اختياري للاحوال الشخصية صوتي مش الكم
- لإن في ناس غرقت هي وعم تجرب تهرب منكم صوتي مش الكم
- لإن بتقتلوا القتيل وبتمشوا بجنازته صوتي مش الكم
- لان حكمكم الفاشل بسبب بانهيار البلد وبتخترعوا حصار تعلقوا عليه فشلكم صوتي مش الكم
- لان كذبكم ونصبكم ونهبكم افلس البلد وبتحطوا الحق على المؤامرة صوتي مش الكم
- لإننا رهينة اجنداتكم السياسية الخارجية صوتي مس الكم
- لان مانعينا نعيش ونخطط ونكبر ونربي اولادنا ونموت موتة طبيعية صوتي مش الكم
- لأن قضيتوا على الاتحاد العمالي العام والنقابات العمالية وحولتوهم جزء من فسادكم #صوتي_مش_الكم
- لأن قانونكم الانتخابي مشوه وطائفي #صوتي_مش_الكم
- لأن قضيتوا على الجامعة اللبنانية وفتحتوا جامعتكم الخاصة دكاكين تمصوا فيها دم العالم #صوتي_مش_الكم
- لأن الناس عم تربي اولادها بتبويس الايادي وبعدين بتنشرها على أبواب السفارات #صوتي_مش_الكم
- لأن حولتونا شعب شحاد من مؤتمر دولي لمؤتمر دولي وبالاخر المصاري بتصب بجيابكم #صوتي_مش_الكم
- لأن في ١٧ الف مفقود على امتداد الوطن #صوتي_مش_الكم
- لأن نسبة السرطان هي من الأعلى بالعالم #صوتي_مش_الكم
- لان ٦و٦ مكرر هو دستوركم #صوتي_مش_الكم
- لأن الباسبور اللبناني اذا وجد ما بخولني فوت على دول العالم المتحضر من دون فيزا #صوتي_مش_الكم
- لأن مواقفكم المستهترة بتخلي مستقبلي باي بلد من بلاد العالم على كف عفريت #صوتي_مش_الكم
- لأن بحس بالذل على أبواب السفارات #صوتي_مش_الكم
- لأن تطبيقكم لأي قانون مرتبط بمدى استفادتكم منه #صوتي_مش_الكم
- لأن ابنتي اذا تزوجت من غير لبناني ما بتقدر تعطي اولادها الجنسية #صوتي_مش_الكم
- لأن ابنتي اذا تطلقت بده يحترق قلبها على اولادها بسبب سن الحضانة #صوتي_مش_الكم
- لأن البلد ماشي على قاعدة انا بغطي استزلامك وانت غطي فسادي #صوتي_مش_الكم
- لأن حقوق المرأة تفصيل وبيت الطاعة والنفقة بعدها بإيد رجال الدين واحكامهم الطائفية #صوتي_مش_الكم
- لأن بتتناحروا وببتخانقوا وبتجيشوا الشارع لحد ما ينزل دم وبعدين بتتفقوا #صوتي_مش_الكم
لأن بتشتروا أصوات #صوتي_مش_الكم
- لأن كل واحد فيكم بيطرح حاله حامي طائفته وما حدا هامه البلد كبلد #صوتي_مش_الكم
- لأن كل واحد فاتح على حسابه بلد #صوتي_مش_الكم
- لأن الدولة العلمانية مش ضمن خطتكم #صوتي_مش_الكم
- لأن بتخترعوا تسميات لتريحوا ضمائركم المش موجودة وبصير المغترب اللي هربان من قرفكم اسمه منتشر #صوتي_مش_الكم
- لأن النفط المفترض بالبحر مزراب جديد لفسادكم #صوتي_مش_الكم
- لأن السلاح مش حصري بايد الدولة #صوتي_مش_الكم
- لأن بيوتكم محصنة بمربعات أمنية بتكلفنا أعصابنا وعجقة سير ولما بتضهر مواكبكم ما عندكم مشكلة تمشوا علينا وما تشوفونا #صوتي_مش_الكم
- لأن المجارير بتصب بالبحر وبتسقي فيها الخضرة اللي اولادنا بياكلوها #صوتي_مش_الكم
- لأن مش قادرين تتفقوا على كتاب تاريخ موحد #صوتي_مش_الكم
- لأن شهيدكم شهيد وشهيد غيركم قتيل وعمره ما يرجع #صوتي_مش_الكم
- لأن معيشين العالم برعب عودة الحرب بأي ساعة #صوتي_مش_الكم
- لأن لبنان بمركز معزز من لائحة الدول الاكثر فسادا #صوتي_مش_الكم
لان اذا بدي عد كل الاسباب اللي ليه صوتي مش الكم بدي فيلم وثائقي مش حلقة وحدة صوتي مش الكم، وما في حل الا ابقى عم احكي لآخر ثانية
لان حقنا وحق اولادنا نحن اللي عايشين بالداخل نكون عايشين ومعيشين اولادنا بالحد الادنى من الكرامة الحقيقية..
ان شاء الله موت اذا عم كذب بس مقاطعة الانتخابات او التصويت بورقة بيضا هي صوت لصالح السلطة، صح لوائح التغيير يمكن مش على قد طموحاتنا بالتغيير الشامل، بس قانون انتخابي مشوه ما بيقدر ينتج عنه افضل من هيك، تذكروا طائفتكم منها بخطر ولا حدا مستهدفها.. تذكروا زعيم طائفتكم هو هجركم وهجر اولادكم وذلكم وذل اولادكم و #صوت_ضده، خلونا نعتبر هيدي الانتخابات مرحلة انتقالية، عم ندق فيها مسمار بنعش هيدي السلطة اللي متحكمة فينا متل الاخطبوط بإيدي متعددة من الفساد للاجرام للسرقة وبراس واحد حامي وحاكم الكل بالسلاح.. خليني ساكتة
