خليني ساكتة ١٤٦ - سقّطنا ارسلان ووهاب وفيصل كرامي ومروان خير الدين… وصار عنا كتلة للتغيير!

كان عبالي بلش باعلان النصر، بس تذكرت انه عنا بالطايفة اعلان اي نصر محصور بشخص واحد،

بعدين كنت ناوية رد على صديقتي واسمع الكلمة بإني اطلع بحلقة تركز عالايجابيات وما حركش بوكر الدبابير قال لانهم مزعوجين بلا ما تفتحي العيون عليك، بس ما طلع بإيدي لقيت حالي مضطرة شد حالي شوي وما اتفاءل كتير، لان متل ما بتعرفوا الحج محمد رعد والحج حسن فضل الله مش عاجبتهم النتائج.. وطالما هني مش عاجبتهم النتايج يعني نحن قدرنا نعمل شي مهم، بس هني ما هاين عليهم حدا يربح من دون موافقتهم، ما ياخد على خاطركم منهم هني بدهم كرمال المصلحة العامة، واحد بده يحمينا من شر افكارنا وطموحاتنا، والتاني يمكن ما طالع معه يبنينا بهاي المرحلة فبده يسقينا.

بس كمان ما رح اعطيهم شرف انهم يسرقوا فرحتنا، هيدي الفرحة اللي على قد كتلتنا، اي صار عنا نحن كتلة، كتلة التغييريين، الفرحة لاننا اثبتنا انه كلمتنا فوق الكسر، انه عزمنا فوق القمع.

وينهم الثوار؟

كانوا عم يصوتوا

شو عملت الثورة؟

الثورة وصلت كتلة نيابية.

ليه ما بينزلوا ع بيوتهم

نزلنا على مجلسهم لنرجع نرجعه للشعب لانه هيدا مجلس الشعب.

عدد المقاعد مش مهم رح يبقى عم يتأرجح لكم يوم. المهم انه ممثلين حقيقيين عن نبض الشارع خرقوا اولا غطرستكم وعجرفتكم ووصلوا على المجلس. لا قانونكم الانتخابي المشوه، ولا حواصلكم الملغومة، ولا حتى صناديقكم المعلبة قدرت توقف بوجهم، ولا مئات المخالفات ومحاولات التزوير قدرت توقف بوج حقيقة انه الشعب اختار اشخاص من خارج اصطفافات السلطة.

لأول مرة انخرقت السلطة بعقر دارها، صحيح ارقام السلطة واحزابها كبيرة وكتلها ما كتير تأثرت، ولكن حقيقة يكفينا شرف القول اننا حاسبنا، وربحنا، اسقطنا ايلي الفرزلي واسعد حردان وطلال ارسلان ووئام وهاب وزياد اسود وادي معلوف وهادي حبيش ومصطفى علوش وكمان مروان خيرالدين..

خرق لائحة الثنائي الشيعي بالجنوب التالتة، اول خرق من نوعه على الاقل من ٣٦ سنة، ما رح فوت بفارق عدد الاصوات، لان ببساطة انا برأيي كل صوت اخدته لوائح التغيير بأي منطقة من المناطق بينضرب ب ١٠ بالقليلة لو في عدل، لان ببساطة اللي اقترعوا لهيدي اللوائح تحدوا الطائفة وتحدوا الزعيم وتحدوا قتل الأمل وزرع اليأس.

نتائج، بتعطي نَفس، وهون عم احكي بس عن لوائح التغيير، انه بالرغم من كل شي خرق اشخاص بيشبهونا بيشبهوا مزاجنا بيشبهوا طريقنا بالحوار وبالرؤية للبلد.

هلق بالسياسة للاسف طلعوا كلهم ربحانين قدام جماهيرهم، والقوات زادت شعبيتهم وحطه على عينه للصهر المعجزة، اللي انتصر على الكواكب والمجرات واسرائيل وداعش واميركا وما بينهم، واكيد عم يطمحوا لكتلة بأكترية نيابية تقلب كل المشهد السياسي لصالحهم، للأسف يعني بعد هالعمر كله بعده المجلس مقسوم بين اقطاب السلطة هني ذاتهم، بس بدي ابقى مبسوطة بإنه صار في كتلة للمستقلين اللي حقيقة عنا امل كبير فيهم حتى يثبت العكس.

مرحلة جديدة صارت فيها الاصوات اللي رح ترفض التصويت برفع الايدي بلا عد اكبر، واللي رح ترفض الهرطقات الدستورية اكبر، لانها رح تكون مؤتمنة من قبل الشعب وعندها اعتبار لهيدا الامر لانها بتعرف انها بعد ٤ سنين رح تتحاسب، ويمكن هيدا الشي يسبب عدوى ايجابية وينعكس ايجابا داخل المجلس.

على الهامش ٤٠٪ بس من شعب انقتل وانسرق وانه انهبت امواله نزلوا على التصويت، ٦٠٪ اعتبروا حالهم غير معنيين، او قاطعوا هيدا رقم مخيف من شعب كانت هيدي الانتخابات بالنسبة اله الامل شبه الوحيد، بس كمان في مجموعة كبيرة من هول ما لقيوا باللوائح التغيرية مين بمثلهم ولكن رفضوا انهم ينخبوهم هني ذاتهم، وفي كتير كان عندهم تحفظات على حلفاء احزابهم السياسية وبما انه هيدا القانون بيمنع التشطيب فضلوا انهم ما ينتخبوا بالمرة، يعني الكارما ادت لانكم توقعوا الى حد ما بشر قانونكم الانتخابي.

حفاظ الكتل النيابية تبع السلطة على كتلها كمان امر مخيف.. الانحدار اللي وصل سعد الحريري جمهوره اله كمان مخيف، هيدي الصبيانية بالتصرف، يعني هالزلمة لا عرف يشتغل سياسة ولا عرف يعتزل السياسة.. انه في عالم انتخبت وساهمت بتوصيل ميشال الياس المر على البرلمان شي مخيف.. انه في عالم صوتت للمبة لبنان ندى البستاني شي مخيف.. شي مخيف انه بعد في عالم هلقد مآمنة بالاحزاب السياسية وهلقد ما بتعرف انه هالصندوق كان املها بإنها تاخد حقها وتحاسب اللي حول حياتها للجحيم.. قديه في عالم بعدها بتسترخص حالها وحقها ووحق اولادها ..

على الهامش، آمال جي بي بالرئاسة تقلصت كتير، وصراحة الاحد بالليل لوالي قلبي، قلت منيح انه لابس اورانج طلع assortie مع العبوق تبع وجه. القوات خرقوا التيار بجزين والمردة خرقوا القوات ببشري باختصار بالنسبة النا اضرب الظالمين بالظالمين واخرجنا منهم سالمين، اهم ما بمقاعدنا اننا وصلنا على المجلس بكامل استقلالنا بكامل حريتنا بكامل ضميرنا، ولا منة من حدا بالسلطة علينا.

قبل ما اختم هيدي المنظومة ما بتستسلم ورح تحاول تقلب وجود التغييرين لاعطاء شرعية لمجلسها وارتكاباته، ليتحولوا شهود زور وامتصاص لغضب الشارع، ومن هيك لازم نكون كتير واعيين لكل المطبات اللي ممكن ننجر عليها ما بدنا ننسى انه هيدي خطوة كتير كتير صغيرة على طريق بناء بلد، والمعركة بعدها ما بلشت ببلد ما فيه ادنى مقومات العيش، واقف ناطر على مقصلة الاعدام الدولية، الدولار بلش يطير من الفرح اول ما تسكرت صناديق الاقتراع.

ان شاء الله موت اذا عم كذب بس ح يبقى هيدا الانتصار الحقيقي، واهم بكتير من كل انتصاراتكم الالهية منها والبشرية الطائفية لحقوق المسيحيين، ولحماية المسلمين.. منعرف فايتين على مرحلة فيها الكتير من الشراسة، فيها الكتير من التعطيل، فيها الكتير من المعارك، فيها استشاس من السلطة والشرخ من فوق الطاولة رح يكبر، ورح يكون العند سيد الموقف، بس الاهم من كل هيدا انه وصولوا التغييرين رغم كل جبروت هيدي السلطة.. ونحن نفسنا طويل لان هدفنا هو بناء بلد حقيقي وهون تحديدا بجوز القول كما وعدناكم بالنصر دوماً نعدكم بالنصر مجددا.. خليني ساكتة