خلصت الانتخابات وطلعت النتائج الرسمية
ورجع كل شي لمحله، الدولار ع طلوع، الخبز ع انقطاع، البنزين على تقطير، والكهربا على اختفاء.
وحدهم النواب التغييرين الجدد، وسيرتهم وصورهم وسي فياتهم وكمان مقابلاتهم، عم بتبث نوع من الابتسامة على يومياتنا، نوع من النفس اللي عم نتنفسه ونحن عم نفكر ببكرا افضل.. آه واي في النكت على ميشال الياس المر عم بتضحكنا كتير.
بالعربي الفصحى بقولوا غداة الانتخابات يعني تاني يوم، وفعلا من تاني يوم رجع الدولاب لمحل ما كان قبل الانتخابات بكم يوم، وللمرة الاولى بتاريخ الانتخابات بلبنان ببلش تحقيق الوعود بهالسرعة، الوعود بارتفاع الدولار وسعر الخبز والانترنت، بكل امانة عم لاقي مشكلة بالمفردات انه ما بقى اقدر استعمل كلمة وصلنا عالانهيار، ولا الانهيار، لان هيدي مرحلة قطعناها طب هلق نحن بما بعد الانهيار او ما بعد بعده. طب قديه صعب الواحد يتمسك بايجابية وصول قوة تغيرية على البرلمان والتركيز على ما يمكن اعادة بناؤه بظل كل هيدي السلبية اليومية المحيطة فينا؟
يبدو بس نحن مناصري الوافدين الجدد على المجلس اكتر عالم حاسين بالسخن، وبدنا العجلة تتحرك بأسرع وقت ممكن، بالوقت اللي رجعت العالم بالدور يوم ع طابور الخبر ويوم على طابور البنزين. لان مناصري احزاب السلطة وما اكثرهم مشغولين بالاكثرية، واذا ١٩ اكتر من ١٧ او ٦٨ اقل من ٦٠.. على فكرة نهج هيدي السلطة ما بتغير لا قبل الانتخابات ولا خلال الانتخابات ولا بعد الانتخابات حتى ولو تغيرت المفردات والاستراتيجية المستخدمة.
الاسئلة الاساسية معروفة، مين رح ينتخب نبيه بري؟ بالدستور اللبناني ما في نص بقول رئيس مجلس النواب لازم يكون شيعي بس بالعرف اللبناني لازم يكون رئيس مجلس النواب نبيه بري.. بس ببرلمان ٢٠٢٢ الاستيذ يمكن ياخد اقل كمية اصوات بحياته المهنية، السؤال بيترشح؟ او بنزلوا واحد من الصقور بوجه حتى يقول الكل الكحل ولا محمد رعد او جميل السيد؟
هون بيطلع الصوت اللي بقول الاستيذ بده يقترح عناية عزالدين، وهيدي بتكون ضربة معلم نظيرة لنانسي بلوسي، وهيك بيلتهي العالم الغربي كله بديموقراطيتنا واول امرأة في العالم العربي رئيسة لمجلس النواب ودقي يا موسيقى.
الاستحقاقات اللي فاتين عليها اهم من الارقام، بس حقيقة عبالي اعرف شو شعور العالم اللي انتخبت هيدي السلطة هي وواقفة بطوابير ما بعد الانتخابات وبعده الحبر اللي انتخبوه فيه ما راح عن اصابعهم؟
بقدر افهم كتير اشيا بهالانتخابات بس انه يربح ٣ وزارء طاقة سابقين والشعب على وسع مساحة البلد عايش بأقل من ساعة كهربا باليوم؟ طب اللي انتخبوا الشمعة واللمبة والشمعدان شو حسوا؟ حقيقة كيف يعني؟ يمكن هني اشرف ناس على وج الارض بس ياجماعة ما فشلوا بادارة ملف الكهربا؟ طب اذا شعب بإمه وبيه ما بيعرف انه عنده سلطة على النواب وصندوق الانتخابات هو للعقاب كيف بدنا نبني بلد؟
على الهامش المرشد الاعلى المحلي طلع لنا هالمرة بالجزرة، نبرة هادية، رايقة، شلح اسطوانة التخوين وحط اسطوانة الوحدة الوطنية والشراكة،
بس مش هين كمان من بعد هالعمر، انه عيب استخدام شعار شيعة شيعة، وما بليق بالطايفة وكمان الرصاص من بعد شو سماحتك؟
صح كان ضابب العصا بي ما نسي يرسم الحدود، حطوا السلاح على جنب وخلونا نحكي بالشراكة، وبلا اكتريات واقليات، المهم انه اساس الشراكة بمفهوم السيد انه اللي الكم الكم واله واللي اله اله لحاله، بهيك ربح او خسر هو خطه ما بهم، المهم النتيجة انه بياخد اللي بده اياه او على الدنيا السلام.
ان شاء الله موت اذا عم كذب، صحيح الاكترية الساحقة من المقترعين انتخبت السلطة، بس الخرق اللي عملته قوى التغيير خلخل الموازين، وعم يفرجي كل يوم العالم انه كان عندهم خيار هالمرة، بيكفي مقارنة الوجوه وخلفيات اللي سقطوا بالانتخابات بالوجوه الجديدة ليعرف اللي رجع انتخب احزاب السلطة انه بخنوعه وخضوعه وتفضيله يبقى تحت خط الذل، روّح على حاله علينا فرصة حقيقية ببناء وطن.. خليني ساكتة
