لحظة بس لركز لان ضروري انتبه كتير منيح المرحلة سوبر حساسة
اوكي خلص مشي الحال هيدي عين عالدولار والعين التانية على المنطقة
لان الترقب سيد الموقف، مننفجر من جوا منطرطش عالمنطقة؟ او المنطقة بتنفجر من برا وبطرطش علينا؟
انا بحيي الـ multitask اللي بيتمتع فيها المرشد الاعلى المحلي وحزبه، ملحق عم يهني العراق، ويهدد الاسرائيلي، ومع هيدا بده يلعبنا بالداخل يوم الجزرة ويوم بالعصا.. وعنده حلفاء يعني الواحد ما بيتمناهم لاعداؤه.
هلق النكتة الموسمية انه نحن ناطرين التنقيب عن النفط اللي هو مرتبط اصلا بحربنا مع اسرائيل اللي هي مرتبطة بأهمية وجود السلاح اللي بده يحمينا، هيدا السلاح اللي نحن ما بدنا اياها. مين نحن يمكن نكون ١٠ اشخاص ويمكن نكون الاكترية مش مهم المهم انه نحن اشخاص بدنا نبني بلد قائم على مقومات حقيقية مش على كذبة وراها كذبة وبيتبعها كذبة. سؤال مثلا ليه ما منبلش بالتنقيب من المواقع الداخلية، لحد ما تنحل قضية المواقع الخلافية؟ لان ببساطة ما فينا، لاننا بلد بطريقه للخروج التام عن المجتمع الدولي، وهيدا مش لإننا ممانعة، لا لإننا محكومين من قرطة نصابين فاشلين وحرامية، القوا نظرة على ايران وفنزويلا وقبلها العراق ما هني من اكبر منتجي النفط؟ شو وضعهم تحديدا؟ طالما البلاد فاشلة او عليها عقوبات طالما الكذبات بإمكانية التعويم كذبة. ليه الاميركان بدهم يقرروا؟ لانهم الاقوى عالميا حتى الساعة على القليلة.. تماما متل ما المرشد الاعلى المحلي متحكم برقابنا وقراراتنا الدولية لانه الاقوى على الساحة الداخلية باجندته الايرانية.
خليني ارجع للداخل واحكي حكي على قدي، لان امي بتخاف عليي، وهلق بدها تقل لي يا امي شو بدك فيهم؟ وانا بدي قل لها شو بعد عنا نخسره؟ وجدال ببلش ما بيخلص الا بدموع عائلية.
بالشأن الداخلي، قال باسيل عم يعطي اشارات انه ما عنده مشكلة يجي سليمان فرنجية رئيس، والعكس صحيح، عن جد حلو ترباية المرشد الاعلى المحلي عم تعطي ثمارها، اكيد النط من رئاسة المجلس على رئاسة الجمهورية مش تفصيل، لان اصلا الكل بيعرف انه نحن هلق فايتين على استحقاقات من رئاسة المجلس على رئاسة الحكومة فرئاسة الجمهورية، والحاكم الاساسي بالمفاصل الـ ٣ هو واحد.. اين يقع حزب الله ودوره الداخلي والاقليمي، فينا نعمل حالنا مش منتبهين ونعتبر الموضوع تفصيل ونركز على الوضع الاقتصادي المزري بس كمان رح نوصل لنفس النتيجة.
الاهم من كل هيدا كلنا رجعنا ورا السوشيل ميديا وقسم عم يدعي لتحركات وقسم عم يسأل وينه الشارع والقسم الاكبر ناطر عم يبعت رياكشينز، بس السؤال هون بروح لناخبي الاحزاب اللي شكلوا اكتر من ٨٠٪ من المقترعين اللي رجعوا انتخبوهم هني ذاتهم.. مبروك عليكم ثقافة التخوين، والتعطيل وشد الحبل.. لا الدولار نزل ولا الكهربا اجت ولا السلاح تأثر والاهم من كل هيدا ما عرفنا الاكترية مع مين طلعت او شو رح يأثر انها تكون من الاورانج او مع التانيين، طالما سعر ربطة الخبز وسعر الدولار وحد اللبنانيين.. وحدهم وزراء الكهربا السابقين والمطلوبين بانفجار المرفأ فرق وضعهم على الانتخابات لانهم كرسوا الحصانات النيابية بوجه المحاسبة والتحقيق.
على الهامش في حملة بشعة كتير ضد النواب الجدد، اللي هني يعني بكل صراحة بشر، بعدهم ما بلشوا بشغلهم، يعني بعد ما حدا عرف خيرهم من شرهم، واي هني بيمشوا على اجريهم وبياكلوا متلنا متلهم، وبيشتروا اغراض وعندهم عيل، اولا بدكم تعرفوا شي محدد هول النواب مش مسؤولين عن الوضع اللي وصلونا عليه حكامكم، هني مسؤولين عن شغلهم وعليهمم يحاولوا يشتغلوا، بس لما تكون انت مناصر لتيار كان صاحب اكبر كتلة نيابية وبضهروا رئيس جمهورية وترسانة اسلحة، ومن اهم انجازاته انه ما خلوه، ما كتير بيطلع لك تنطر النواب الجدد شو رح يطلع منهم.. تماما لما تكون متحدر من جماهير الثنائي الشيعي تبع حقك رصاصة ما فيك فجأة تصير تعتبر انه هول النواب مهمتهم لحالهم صفر خوف وانه يحملوا كفنهم على ايدهم ويمشوا.. ولما سيادتك بتتعرض لحسابات الربح والخسارة والـcompromises ما فيك تعتبر انه هول النواب بالذات ما فيهم ياخدوا وقتهم ليفكروا بمواقفهم.. بالنتيجة احسن شي فيهم انهم عم يكشفوا مستوى استغباء العالم لوين ممكن يوصل بس للوقوف بوجهم، وتكفيريهم بقضايا اجتماعية متل الزواج المدني، بكل الحالات لا حملات التشويه الها طعمة ولا حملات الدفاع عنهم الها طعمة، حقيقة هني ونحن لازم يكون عنا شغل كتير اهم نعمله.
قبل ما اختم جبل بعبدا وقع مرسوم تشكيل المجلس الوطني لمراقبة الاسعار، هيدا انجاز يحسب للعهد القوي انه شكل مجلس لاول مرة بعد ما كان أنشئ بالـ ١٩٧٤، طب مثلا ما كان ممكن استحداث شي بالـ ٢٠٢٢، لا هو بس الكل بحب الاشيا الـ vintage بعتقد وكمان الارجح في كم واحد بعد ما توظفوا من القرايب والاصحاب قال بلحق قبل ما يخلص العهد، وهيدا المجلس قد ما مآمن فيه الصهر المعجزة دغري حمله مهمة تاخد من قدرات كبير اللصوص رياض سلامة وتوقيفه عند حده بالتلاعب بالدولار، يمكن من هيك تأجل الاستماع لرياض سلامة لبعد ٦ اشهر، ليكون قضي على آخر دولار من اموال المودعين، بس ما تحطوا بكرا الحق ع جبران التويت بتشهد انه عمل اللي عليه، وخبر المجلس الجديد. ومن ملامح العهد القوي كمان تم الغاء ربطة الخبز الكبيرة من التداول، ورفع سعر الخبز مستمر، تماما متل المحروقات والدولار ما اله سقف، the elephant in the room معروف وما خافي على حدا، اولا نلاقي حل لموضوع السلاح ومن ثم العمل على مكافحة الفساد واعادة بناء الدولة..
صارت وجوهكم على التلفزيونات وصوركم بالشوارع بكل أمانة بتلعي النفس.
ان شاء الله موت اذا عم كذب بس الامور فلتت من ايديكم انتو السلطة الحاكمة بشقيها السيادي والممانع، ويمكن صار لازم كل واحد فيكم يتواضع شوي، ويعترف بفشله، وبدل ما تتمسكوا بحصصكم بالحكومة اللي بدها تجي وتخربوا اللي باقي، لازم حقيقة تلاقوا حل out of the box، ويمكن صار الاكثر جدوى بوضعنا الحالي اعلان بالبلد a failure state ونطالب الامم المتحدة تجي تحكمه وتعيد ترميم ما امكن او تنقذ ما يمكن انقاذه .. خليني ساكتة
