خليني ساكتة ١٤٩ - تجديد البيعة لنبيه بري.. مليون سائح دافعين كإنهم رايحين على موناكو ليوصلوا على طهران التحتا!

اكتر حلقة بتعزب هي تبع اول الشهر او يمكن آخر الشهر، ما بعرف يعني هيدا الوقت اللي بتحتاج فيه الفواتير بالتعب بالمستحقات بالشعور بالعجز

لكل واحد سأل عن حلقة خاصة باعادة تجديد البيعة لنبيه بري.

فكرت فيها، بس شو كان الخاص بنهار التلاتا ٣١ ايار؟ ليطلع الواحد بحلقة خاصة؟

خلونا نحط النواب التغييريين على جنب هلق وهيدي الهمروجة اللي بترافق كل تحركاتهم، بتطلع عالجلسة لينطبق عليها المثل اللبناني متل الحمام المقطوعة ميته، بالتركيز على المشهد العام اللي شفناه الوجوه هي ذاته، المرشحين هني ذاتهم، والناخبين هني ذاتهم، واللعب من تحت الطاولة وفوقها هو ذاته..

يعين حتى نكت نبيه بري هني ذاتهم، ودبكة حرس المجلس ورصاص الابتهاج هني ذاتهم

الي ما بيعرف الدبكات احتفالا بانتخاب نبيه بري بعدها مستمرة ببعض القرى المناصرة لخط حركة المحرومين، حتى المحرومين بعدهم هني ذاتهم والحارمين هني ذاتهم.

النكتة الاكتر تعبيرا كانت ان شاء الله يكون رئيس المجلس الجديد احسن من اللي سبقه.

هيدي النكتة ما بعرف اذا لازم الواحد يضحك عليها او يبكي منها، حتى المشهد ككل بالمجلس اذا ما اختلط بالمشهد على السوشيل ميديا والتضارب بين مناصري الاحزاب بين بعض وبينهم وبين المدافعين عن نواب التغيير هيك دغري بتفوت بهيدي الدوامة اللولبية الامور، مين انتخب نبيه بري ونجحه من اول دورة ومين نجح الياس بو صعب من تاني دورة ومين الاكترية الفعلية والوهمية ومين الحابل ومين النابل والاهم من كل هيدا من الكذاب الاكبر ومين الاكتر وقاحة، هول عم يتنافس عليهم الصهر المعجزة ووليد بيك، انا شخصيا ما بقى عم لاقي مشكلة بالسياسيين قد المشكلة بجماهيرهم، يعني بتذكر اول سنة جامعة يوم اللي قلنا احد الدكاترة اللي بصدق انه فات لهون بالواسطة بكون صنّف حاله حمار.. طب واللي بصدق كل يوم نفس الكذبة شهر ورا شهر وسنة ورا سنة طب هيدا اللي هلقد عم يستغبيه شو بكون مصنفه؟

وصلت كمية احتقارنا لدرجة لا توصف، بالوجوه اللي ترشحت والوجوه اللي ربحت، وكانت الجلسة الاولى لمجلس مندار على الخيرة التوافقية خير دليل على ذلك.

من بعد ما رجع يطير الدولار من الفرحة بالاوضاع، وصلت فواتير الموتورات والانترنت والبنزين حدث ولا حرج، متوقع وصول مليون لبناني بالصيف على وطن النجوم، جايين يشوفوا النجوم بعز الضهر، المغتربين هني رافعة الوطن صوتوا معنا بييعتوا لنا دولارات وادوية بطلوا علينا من وقت لوقت وكتير منهم بيهتفوا بحياة الزعيم قبل ما يرجعوا على بلاد الحضارة تبعهم.. من هيك لمّا ترفعوا الاسعار احتفاء فيهم تذكروا انه في عيل ما عندهم مغتربين وانه في عيل ما الها عين تطلب من مغتربينها مساعدة.

وشو بخصوص حوت الميدل ايست، واسعار الاوتيلات والشاليهات واسعار الدخول على المسابح، صحيح واصلنا سواح بس بعدهم واصلين على بلد في صفر كهربا لان اللي صوت لهم جبران باسيل وتحالف معهم بالانتخابات ما خلوه على اكتر من ١٥ سنة يجيب الكهربا. اسعار التيكيتز بتخلي الي جاية يفكر حاله واصل ع موناكو. لحد ما يوصل وتستقبله ريحة تراب الوطن العافطة من اول ما يضهر من المطار ويفكر حاله بطهران التحتا بس يتأمل الصور على طريق المطار، هيدي الصور اللي تمنى وزير السياحة ازالتها، على امل ما يقرروه يزيلوه من الوزارة احتجاجا.

على الهامش رياض سلامة يمكن لازم يكون اسمه كبير المرابين او المقامرين لانه بعد ما بقى في شي يسرقه عم يلعبنا روليت كل الوقت ضربة بتطلع الدولار وضربة بتنزله والشعب كف بياخده يمين كف بياخده شمال، بيطلع الدولار بتحلق الاسعار بينزل الدولار بتحلق الاسعار.

قبل ما اختم يمكن صار لازم نخفف ازاناكس وادوية اعصاب الشعب بلكي نوزع قهوة ببلاش ليوعى شوي هالشعب، او يمكن صار تو لايت كان لازم هيدا الشي يصير قبل الانتخابات

ان شاء الله موت اذا عم كذب بس من المفترض نبلش بالاستشارات النيابية، هلق ما منعرف بما انه هيدي اخر صيفية لجبل بعبدا اذا بقرر يروح على مقره الصيفي ويعطل، هو والنواب ويخلوا الرئيس ميقاتي عم يصرف اعمال لانه على ما يبدو الوحيد اللي بيعرف يتصرف مع كبير اللصوص رياض سلامة.. خليني ساكتة

--