خليني ساكتة ١٥٠ - غاز كاريش ضايع بين الخطوط.. والعدالة ضايعة بين المطلوبين!

هيك هيك اسرائيل عم تنقل خلوها تكمل هالمنطقة وتعطينا حصتنا بعتقد انها اضمن منكم كسلطة مؤتمنة هالبلد لان الموضوع الها رح يكون تجارة مثلا تلتين بتلت ٦٠ ب ٤٠ ٤٩ ب ٥١ بس بالقليلة رح اعطي البلد خصته مش متلكم رح تسرقوا كل شي وتتركونا مزلطين

متل عملتوا بمليارات الكهربا

والمساعدات الدولية وع شوي إسعاف ما عنا

يعني وعينا عالدنيا قال اسرائيل طمعانة بارضنا لان فيها مي وانها محتلة الارض كرمال الليطاني بعد كم سنة من الحروب انسحبت اسرائيل لان العين قاومت المخرز وبس فضينا نطلع على ميتنا بعد ما طلع منها راجح طلعت من اكتر المياه بالعالم ملوثة

قلنالكم لازم الليطاني يتنضف رحتوا جبتوا عروض كإننا عم نضف نهر المسيسيبي

عادة الرشوى او العمولة من الشركات اللي عم تربح المناقصات بتكون مثلا ١٪؜ من قيمة العقد ١٠ يا عمي ٢٠٪؜ الا بلبنان بيحسبوا الرشوى ع شوي اكتر من ٥١٪؜ من قيمة العقد

اسرائيل عدو وغاشم ومعتدي وشرير و mechant و naughty اوكي وين الجديد بالموضوع بس في حدا يقل لي ليه اسرائيل قدرت تنقب وتخلص وصارت بمرحلة الانتاج وعلى فكرة بمياه فلسطينية بحتة يعني ما خص لبنان فيها وبعدها اسرائيل ما تعتدت على المناطق المتنازع عليها بعدها عم تشتغل ضمن الخط الموافق عليه بالتكافل والتضامن من جبل بعبدا وحامل الامانة اللي مكلفين من المرشد الاعلى المحلي المفاوضة بهيدا الموضوع. يعني لولا السوشيل ميديا ووجعة الراي والزهق اللي ضارب الشعب اللي بيفهم بكل شي يوم خبير حدود ويوم خبير دولار ويوم محلل سياسي كانت دخلت السفينة ع كاريش واشتغلت وخلصت شغلها وضهرت متل الشعرة من العجين، بس شعب متعب ما بحب يخلي الواحد مرتاح متله متل الاعلام اللي كشف قصة الفاخوري هيدا الشعب عم يحرجنا مع العدو ويضطرنا تاخد موقف كرمال ستاتس ع فايسبوك.

في اجماع وطني انه المتقاعص بامضاء المرسوم ٦٣٤٤ هو جبل بعبدا الرئيس العماد ميشال عون وانه عملها كرامة لعيون صهره المعجزة على امل انه يرفعوا الاميركان العقوبات عن صهره مقابيل الحدود البحرية، طلع باميركا في مؤسسات واللي برسِّم حدود ما بيتدخل بعمل اللي بكافح الفساد، ولتزيد الطينة بلة تحركت دعوى لارا سماحة وصار الصهر المعجزة مطلوب بقضية بلطجة وخطف واحتجاز.

يعني كنتو بالاول هيك قرطة نصابين على مجرمين بالداخل بتسرقوا اموالنا بتنهبوا وبتقتلوا بالمفرق بتفجروا بالجملة بس يعني كان الموضوع أهلية بمحلية ما كتير العالم منتبه لنا، هلق صارنا ع لسان المؤسسات الاعلامية العالمية شي حاكم مصرف لبنان مطلوب عالميا بتبييض الاموال، شي مطلوب من محكمة العدل الدولية بقتل رئيس وزراء، شي كارلوس غصن مطلوب دولي بالتهرب من الضرائب، شي مهربي كابتاغون وحشيشة الكيف وهلق خطف واحتجاز لابرز المرشحين على رئاسة الجمهورية، لازم نحطوا رئيس على فكرة يعني ع شوي رح يكون اسهل تسييج البلد وقلبوا سجن دولي من تسليمهم كلهم.

على الهامش انتخابات اللجان النيابية تمت الاكتر تعبيرا غير لجنة المال اللي اعادت نفس الوجوه تكريما على نجاحهم لادارة الازمات بخرق طفيف لابراهيم منيمنة.. ضروري نركز على لجنة الادارة و العدل محل ما خسروا محامين الانتخابات لصالح علي حسن خليل وغازي زعيتر الهاربين من العدالة بقضية المرفأ.. وامل واحد محتار مين صوت لهم يمكن اذا متطلع بعدد الاصوات بتبين التكتلات بوضوح وبيطلع بالصدفة البحتة انه نواب تيار النا خلونا جايبين قد نواب تيار اللي ما خلوهم بالزبط

و الهارب من العدالة هو اكتر الخبرا بكيفية حماية الهاربين من العدالة خدوا مثلا النائب غازي زعيتر وابن العيلة ابو سلة، الجيش ليقبض على تاجر مخدرات فات بحرب استنزاف وعلت حناجر النساء تولول على فكرة هول النساء لخصوا الحالة لما اشاروا من حيث لا يدرين انه اللي حامي تجار المخدرات هني ذاتهم اللي اعيد انتخابهم النساء ذكروهم انهم ما انتخبوهم ببلاش والسعر معروف

قبل ما اختم التزامن بين انغماس الجيش بحربه على ابو سلة واعلان حزب الله استعداده لاي شي بما فيه القوة اذا اقرت الدولة انه في عمل عدائي من السفينة اليونانية بكاريش مشهد سريالي وانقسام السوشيل ميدياويين بين مطالب لحزب الله بالتدخل وبين ساخر من حزب الله بإنه داير اللعبة وموافق ضمنا على التحركات الاسرائيلية بعد أسوأ

وكل يوم بعد يوم عم يبين انه الفساد ناخر البلد بكل تفاصيله وانه السلاح غب الطلب يوم حماية للفساد والخروج عن القانون ويوم بعبع للداخل ويوم تالت عثرة بوجه بناء دولة حقيقية

ان شا الله موت اذا عم كذب بس نهبتوا الداخل وفشلكم وقلة تدبيركم وحساباتكم الشخصية رح تروح آخر امل النا بالغاز بعدكم بتعطلوا وبتتحاصصوا وعندكم استعداد تلعبوها عليّي وعلى اعدائي والاعداء هون هني شركائكم بالمحصاصات او باخد شقفة من الكايك او بعد حماري ما ينبت حشيش .. خليني ساكتة