خليني ساكتة ١٥١ - حقل قانا ضحّك هوكشتاين.. بس المهم الاجماع اللبناني نال الرضا!

خليني ساكتة

تم النشر في 20 يونيو 2022


هوكشتاين smile said it all

ما بظن انه اسرائيل كانت رح تحلم بعدو افضل من هيك

اليوم اسرائيل عم تقول ١٠٠ عدو متل هالعدو، المهضوم بالموضوع انه ع شوي لو تركولها ترسيم الحدود البحرية الها ولآموس كانوا عطيونا اكتر

بس جبران باسيل طالع ربحان متل دايما وانه حط معادلة على الارض او الاصح بعرض البحر، حقل قانا مقابل حقل كاريش، هلق اهمل تفصيل صغير انه قانا حقل محتمل.. كيف يعني محتمل يعني محتمل يعني ممكن نلاقي فيه غاز ممكن لا.. بس جي بي اصلا بيشتغل على النوايا وعلى ال positive vibes انه بيتأمل بالخير ليلاقيه.. واذا طلع حقل قانا متل كل حسابات الصهر المعجزة يعني متل سد المسيلحة وخطط الكهربا ٢٤/٢٤ ما بعرف بكون العوض بسلامتنا.

على اي حال الاسرائيلي رح يبلش استخراج غاز تحت عيون السلطة اللي حطت هدف واهي انتصار الهي جديد يتمثل بحقل قانا وبماركة ضحكة هوكشتاين، قال هوكشتاين مبسوط انه السلطة موحدة على رأي وحيا الاجماع اللبناني للمرة الاولى والاجماع اللبناني مبسوط انه هوكشتاين مبسوط والشعب فايت بالحيط.

ملفتة ابتسامة هوكشتاين الساخرة من رأيي باسيل هيك بتحسه عم يقول هيدا الحكي بيضحك فيه على العونية بس عنا نحن ما بيمرق.. بتفهم كل منتقدي التطبيع المقنع واستقبال آموس هوكشتاين بس انا شخصيا انبسطت فيه لان نحن بحاجة لحدا يقول الامور متل ما هي ببساطة حط النقط على ال-روف ومنقدر نطلع وننزل بالحكي لما بعد بعد ترسيم الحدود بس هو اختصر المشهد بالتالي

- دولتكم (اي لبنان) معها خبر من سنة بتاريخ وصول السفينة لكاريش وما عملت شي

- دولتكم (لبنان) معها خبر من ١٠ سنين بإنه اسرائيل الها كاريش وما فتحت تمها

- دولتكم (لبنان) دولة ما عندها شي تثبت حقكم فيه، وملتهية بمحاصصاتها.. يعني حتى جنرالات العدو الاسرائيلي الغاشم تعاطفوا معنا قال سلطتنا ملتهية بنفسها ومحاصصاتها.

وهيك لما تطلع تحليلات بإنه اسرائيل ما رح ترتدع بلا حرب وبإننا جاهزين نحارب خلينا كلنا سوا نتذكر مين اللي غض النظر لسنوات وسنوات عن اللي عم تعمله اسرائيل، فبكل بساطة خليكم ورا قرار الدولة لان الدولة هي قررت حدودها وما لزوم نفوت بمعمعة ام علوشي ضربت ام حمودي بالملاقط لان حمودي ضرب علوشي.

وعلى فكرة بلش تصدير الحشيشة الاسرائيلية للاستخدام الطبي، بتعرفوا مين عنده اكبر واهم نبتة بهيدا المجال اي نحن ذاتنا هيدي اللي الدولة صار لها سنين وما عرفت تستثمرها، يللا متلها مع النفط والغاز منخبز بالافراح.

،كمان قال بدهم نبيه بري يعمل fessee للمخزومي لانه حضر مؤتمر في واحد اسرائيلي وبالتالي كان عم يطبٌع على أساس إموس هوكشتاين اللي تشتشتوا وحملتوه على كفوف الراحة خلقان بالبسطة التحتا ونفوسه بتغرين وامه من عيتا الشعب.

روحوا متل ما بقولوا cut the loss واعملوا شي اتفاق بالقليلة تضمنوا جزء من الحق لان يا شاطرين متل ما شايفين رح تستخرج اسرائيل الغاز وتودي جزء منه لمصر اللي رح تبيعكم اياه عبر سوريا وتدفعكم حقه بمباركة اميركية، لان المخرز هالمرة عم ينقب لأوروبا مش لاسرائيل وبالتالي اي امتعاض غير مدروس رح يفتح علينا نار جهنم.

بالشأن الداخلي البنزين الى الدولار، بعتقد بصير وقعه اخف على النفسية، يعني حقيقة تعباية السيارة بمليون و٧٠٠ الف هيك بتحسها خنقة انت وعم تعد ١٠٠ بعد ١٠٠ وهيدي عم نحكي عن سيارة صغيرة كورية وانجأ.. مش تفكروا شي ميرسيدس c500 موديل ال ٢٠٢٢ متل اللي اجتها هدية لنجمة لبنان الساطعة على عيد ميلادها.

كبير اللصوص قال عم يخير اللبنانيين بين البنزين او المهربا انه شو بدنا اياه ندعم، وكإنه مش عارفين انه عاجلا ام آجلا كله رح يتدهور هلق مثلا ابنتي اللي عمرها ١٠ قال هي بدها كهربا لان بتتحمل تقعد بالبيت كل النهار بس ما فيها تعيش بلا تلفون وبالشوب.

انا شخصياً اختربت كل الاحاسيس المرتبطة بالكهرباء

انقطاعها تقنينها مجيتها وصولا للاحاسيس المتداخلة بكهربة الموتور مجيتها انقطاعها وتقنينها

تعايشت مع غياب الكهربا باوقات مختلفة من النهار والليل بايام مختلفة بالاسبوع بفصول مختلفة بالسنة

بس هيدا الاسبوع فات على حياتي نوع مختلف من غياب الكهربا

احترقت لمبة البراد

اي هيدي اللمبة اللي بتدوخنا من نحن وصغار مين بضويها هيك بتعشعش كاشفة عن اطايب وملذات بالبراد احترقت

لعبت الكهربا ما احترق البراد احترقت اللمبة، صرت كل ما افتح البراد حس الاكل عم بقل لي صرنا متل بعض

على الهامش وزير الاشغال مضي قرار تاريخي، وكتير مهم، وهو انه من الضروري ضمان الوصول على الشواطئ العامة للعالم اللي ما بدها تستخدم المسابح.. ما بعرف هلق هيدا القرار تحديدا كيف بيطبق ومين بطبقه، خصوصي انه المتعديين على الشواطئ اكيد مش انا وبنت الجيران ومعروفة الشواطئ كيف مقسمة مذهبيا وطائفيا وسياسيا، من البترون

شمالا حتى الناقورة جنوبا، بعتقد بكرا بيعقد جي بي اجتماع قمة مع الست رندا ليشوفوا كيف بدهم يحافظوا على مصالحهم.

قبل ما اختم بلش التحضير للاستشارات النيابية الملزمة، وطالعين النواب يسموا بس بلا تدخين بعد ما شالت شرطة المجلي المنافض، وقال نجيب ميقاتي الاكثر حظاً خصوصي عند امل وحزب الله، عن جد الثنائي اوفيا على فكرة، يعني لو الحريري سمع كلمة المرشد الاعلى المحلي وما استقال بعد تظاهرات ١٧ تشرين كان بعده لهلق متربع على عرش الحكومة بكامل فشله.

ان شاء الله موت اذا عم كذب بس كتير كان ملفت تقديم العرض اللبناني لهوكشتاين او هوكستين لان كل واحد بالاعلام بحب يسميه شي، ومرات بسموه الاسمين بنفس الجملة، كان ملفت تقديم العرض بهالاهمية بطريقة شفهية، ما فهمت انه ما في حبر بالprinter، متل ما هو ما في باسبورات ولا اخراجات قيد ولا طوابع؟ طب كنتو ابعتوه ايمايل، حطوه على يو اس بي.. انه اي شي يتأرشف ويكون اله صفة اكتر رسمية من كلمتكم اللي هي متلها متل قلتها.. خليني ساكتة