الاستشارات النيابية الملزمة
كتير معبر الالتزام بالدستور، كتير ملفت طريقة تضييع الوقت بطريقة شرعية، تكليف احمد النابلسي او عبدالرؤوف المنفلوطي او غالب الصلح بتشكيل الحكومة شو رح يفرق تحديدا؟
عملناها مش من كتير زمان اي واحد في شبهة عليه انه نظيف ومن برات لعبتكم وما داخل بمحصاصاتكم لا امل له بالتشكيل.. وما بظن قدرتوا تلاقوا مزهرية جديدة على شاكلة حسان اكبر انجازاتي لان هيك شخصيات تاريخية بتقطع مرة بالعمر.
على كل حال سمينا وهلق فتنا بمرحلة التأليف والتأليف بده استشارات والاستشارات بدها تدوير زوايا والزوايا مرتبطة بالصهر وطلبات الصهر اوامر.
ملفت تمسكه بالكهربا على فكرة، هو وحدة من اتنين او الحرامي دايما بيرجع على مكان السرقة او هو فخور بانجازاته هو وفريقه بملف الكهربا لدرجة ما قادر يشوف حدا تاني فيها.. بس ما تنسوا بعد ما قضي على الكهربا ونشف السدود لازم يسيطر على الغاز والنفط، يعني حقه الشرعي، انه معقول تتلزم الشركات وهو ما يطلع له لحسة اصبع؟
انا شخصيا مع حكومة من لون واحد، وهي حكومة الاكترية الحاكمة، لان ما لازم يبقى في porte chapeau يتعلق عليها الفشل، دايما يتحمل فريق آخر مسؤولية التعطيل وصار الوقت كل واحد رافض لشعار كلن يعني كلن يساهم بكشف المرتكبين.. وخلي كل فريق يحكم لحاله حتى يبين مين المسؤول عن الفشل او النجاح والحكومة اللي بتنجح بتستمر واللي بتفشل بتفل.. هلق الملفت انه ما بقى في فشل ينحكى عنه انه متل هيدي النكتة اللي عم تقول انه لبنان عايش ببحبوحة تامة بح كهربا، بح بنزين، بح دوا، بح خبز..
المشكلة مشكلة ثقة والثقة مع هيك سلطة مفقودة، طالما المحاصصات موجودة، المالية لأمل والطاقة لباسيل والدفاع للرئيس، مين بيعرف يمكن يعطوا وزارة العدل هالمرة لحزب الله ولا مرة اخدوها بعد، وبعدين علاقتهم بالعدل كتير قوية، خبرة تعطيل خبرة مخاصمة دولة خبرة ملفات حتى خبرة بالتعاطي مع المحاكم الدولية والعقوبات، هيك بدل ما يبقى العلاقة مع القضاء في مهب الاعلام بتصير داخل اروقة الوزارة، بتتحول بالمونى انه مصارين البطن بيتخانقوا وبعطلوا عمل اي قاضي بيحكم ضد المصلحة الخاصة للحزب الالهي.
ومثلا بلكي نرجع بو فاعور على وزارة الصحة كان عامل لنا جو كل يوم شمع احمر ومداهمات للمطاعم، وهيدي ايام البحبوحة تخايلوا هلق شو عم يطعمونا المطاعم.
وزير الاقتصاد معليه اتروكوا امين سلام بس لنبقى عم نتذكر انه عنا قوى امن وامن دولة وهيك حلو الواحد من وقت للتاني يشوف الشرعية على الارض.
بلكي نحط شي وزارة مسح أراضي وبحار، هيك يعني بس على عين الدول المجاورة يوم تحاول تحل موضوع مزارع شبعا يوم تحل موضوع حقل قانا - كاريش.
فينا كمان نستحدث وزارة التسامح هيدي متل تبعت دبي بس هيدي مخصصة للصلح بين اصحاب الشقق والمستأجرين اللي ما معهم فريش دولار، او المستشفيات والمرضى.
وكمان على عيار دبي فينا نعمل وزارة مش السعادة لان مستحيل تطبق عنا، فينا نسميها البحث عن السعادة.. هيدي مهمتها مش عن جد تبحث عن السعادة لانها اكيد مش موجودة.. بس متل ما بتعرفوا في كتير وجوه بارزة خسرت بالانتخابات النيابية ومش معقول نتركها بمهب الريح فهيك منوزرها.
على الهامش هي الخبصة كلها مش محرزة من هلق لكانوا فكفكوا العقد بكون خلصت ولاية جبل بعبدا وصار في بدل المشكلة ٢ مين الرئيس الجديد ومين رئيس حكومته والرئيس الجديد اي وزارات بحب ياخد، يمكن يجي رئيس بفضل يفتح وزارة جديدة مثلا هيك شي يكون بعين المدام. وبعدين يعني بشرفكم محرزة تعزبوه للرئيس الجديد؟ لكم شهر؟ وميثاقية وغير ميثاقية وحصص وتوزيع وزارات لشو هاللبكة
بعدين يعني هلق رجعتوا سميتوا ميقاتي وميقاتي رح يحكم ٤ اشهر
انه شو الها طعمة تشكيل وزارة جديدة، خلص بينما واثقين فيه هلقد يرجع يعوّم هيدي الوزارة متل ما هي ووفروا وقت تسلم وتسليم وتطبيل وتزمير مش عم بفهم حقيقة شو هي هالتجحيشة يعني؟ خلوا الحكومة على ما هي عليه لان يعني لبين ما تشكل وتكتب بيان وتاخد الثقة بكون سقطت مع انتهاء ولاية الرئيس على فكرة باقي على ولايات جبل بعبدا اقل من ١٣٠ يوم قلت بخبركم لاول مرة خبرية حلوة بهالحلقة.
ان شاء الله موت اذا عم كذب بس بروح رئيس جمهورية وبيجي رئيس جمهورية بطير رئيس حكومة وبيجي رئيس حكومة وأما رئيس مجلس النواب بيبقى الواحد الاحد نبيه بري... خليني ساكتة
