اهلا بالهطلة، اهلا
اهلا فيكم
اهلا باولادكم
اهلا بدولاراتكم
اهلا بأهلكم
بيتكم ومطرحكم
ما بدنا نحكي سياسة ونكد الدنيا صيف وبدنا ناخد هيك نفس شوي، انه هني ما بيرحمونا فبدنا نرحم حالنا منعيد
اهلا بالهطلة، اهلا
اهلا فيكم
اهلا باولادكم
اهلا بدولاراتكم
اهلا بأهلكم
بيتكم ومطرحكم
طريق المطار نضفناها كرمالكم، خففنا الصور الحزبية ذات الدلالات والامتدادات الاقليمية كرامة عينيكم، يعني بضل بيطلع صورة من هون صورة صورة من هونيك بس ما تكون عينكم ضيقة، نحن من يوم اللي انتشرت الاعلانات المرحبة فيكم بصراحة صرنا نحب نمرق من طريق المطار، انه هيك منتخايل هيدا الترحيب كمان النا، انه انا بس اقرا اهلا بهالطلة، من دون شعور بمد راسي وبطلع على المراية، بحس هيك بنفحة غزل بابتسامة داخلية بالنتيجة مش هينة تكون لبناني.
باخدها شخصية، بقول بلكي وزارة السياحة حبيت تكافئني لاني i survived هالعمر كله، وكمان i survived طوابير البنزين والخبز وهلق عم حاول اندمج مع طوابير النايت كلوبز والبحور.. مش هينة انك تكون لبناني
اهلا بهالطلة، بهمتكم معتمدين يبقى سعر الدولار مسيطر عليه ما يهوش، لان انتو بتضخوا دولارات بالسوق السودا والحاكم بيشفطها بيرجع ببيعها عالمنصة، هلق اذا بتحبوا فينا نعطيكم كم tip ترجعوا فيها جزء من مصرياتكم، هيدي على طريقة الحريقة اللبنانية، بيكفي يكون عندك حساب باللبناني بالبنك، بتصرف عالسوق السودا، بتروح بتحط المصاري بالحساب، وبتشتري فيهم دولار عالمنصة بترجع بتبعهم عالسوق السودا.
من حقكم علينا، لان فضلكم سابق انه ننبهكم على كم شغلة، اول شي هيدي صرنا قايلينا كتير بس ما في ضرر من الاعادة، جيبوا ادويتكم وادوية اولادكم معكم، وبس تفلوا تبرعوا بالباقي للعالم اللي ممكن تعتازها، منعتذر منكم انه بدكم تنتبهوا شوي كتير على حالكم، لان متل ما بتعرفوا في كورونا وجدري القرود بكل بلاد العالم، بس نحن عنا special edition من الامراض عم نعيد احياء امراض خلصت من حسابات البشرية متل hepatite A او الريقان والروتا... موضوع التسمم هيدا شبه محسوم ممكن من المي او الخضرا او الدجاج بس مش لانها ملوثة او مضروبة من انقطاع الكهربا وهيك، لا بس انتم معتدكم معيرة على rating اجنبي انه بيختلف موضوع ال expiry date وهيك من بلد لبلد متل التوقيت.. ومنعتذر مسبقا لان اذا اعتزتوا لا سمح الله مستشفى، المستشفى بتستقبلكم بالفريش دولار بس الاكل جوا عال ١٥٠٠ مش تطلعوا تحطوا bad review او شي.
هلق المطاعم والمؤسسات السياحية قايمة بواجبكم على ابعد حد، لدرجة اسعارها متل اللي عم يضب الشتوي وينزل الصيفي، يعني من اول ما عرفوا انكم واصلين، شبقوا الاسعار ابرة كورتيزون لمتنا نحن المقيمين على بيوتنا ليبقى لكم محل تنزلوا محلنا.
عجقة السير هيدي كرمال قيمتكم، بليز ما تمتعضوا منها، يعني نحن قلنا انتو سافقين مشوار من آخر الدنيا بالقليلة نعطيكم شعور انه البلد مزدهر وماشي، بالحركة بركة، بعدين بكل فيلم لازم يكون في كومبارس ما بهش ولا بنش بس بغذي المشهد، اي اعتبرونا هيدا الكومبارس، يعني انتو بتفوتوا بتعملوا شوبينغ ونحن منعمل شوفينغ.. انتو بتقيسوا وبتشتروا ونحن حولكم منعمل جو لما تزهقوا. وعلى فكرة ما تحملوا هم الدولار، اذا شي محل ما قبل ياخد دولار، في صرافين بقلب المولات بتلفون واحد بيحضروا بين ايديكم بصرفوا لكم، هيدا متل مرة كنت عالبحر بقطر كان في اشخاص مسؤولين يبرموا حولنا يمسحوا لنا ال lunettes لانه ايدينا بكونوا زيت نحن وعم نتشمس، اي نفس الشي يعني هول الصرافين لخدمة ٥ نجوم، سعرهم اقل شي الف ليرة من برا بس انه بوفروا عليكم مشوار عند الصراف.
رح اعطيكم هيك tip انا شخصيا بستعملها لسلي ابنتي بالسيارة وهيدي كتير رح تنفع مع اولادكم خصوصي انهم جايين هيك من بلدان ملونة ومنمقة، قولوا لهم انكم بـ adventure وكل الطرقات 4D هيك بس تنزلوا بالجور او تشموا روائح المطامر ما بحسوا بشي بشع بالعكس بصيروا يضحكوا، واذا لا سمح الله فجأة صار في اطلاق نار او قطع طرقات وحرق دواليب كمان هيدا جزء من ال adventure، واذا رجعت اجتاحتنا الزبالة فجأة بتقدروا تلعبوهم لعبة I spot with my little eyes، ومثلا بتقولوا لهم على كل مكب زبالة كبير بعطيكم ٥ الاف وانتو بتعطوني الف على كل مكب صغير وهيك بتصير الرحلة بالسيارة مسلية جدا، وكمان بتقدروا مثلا تاخدوهم بدل مدينة الاشباح على نفق فينيسيا او تونيل شكا او تونيل خلدة.. واذا واحدة من الاولاد بزيدها بالنق عالكهربا بتاخدوه على نفق سليم سلام هونيك بحرّم يطلب يشوف الضو اول ما يتعرض لصدمة الانارة.
على الهامش المنقوشة هيدي غليت كرمال قيمتكم يعني صحيح لبنانيي الداخل صاروا عم يشتهوها بس هي حقيقة غليت كرمالكم، لان منعرف نحن قديه بتتعذبوا لتاكلوا مناقيش بدول الاغتراب.
انا كل شي بتلاقوه over rated اكسسوارات تياب هيدا handmade كيف بعرف لان هيدي هي ال trendmark الجديدة للشطارة اللبنانية لما نقول غير كلمة، هلق ممكن مثلا تلاقوا قنينة مي بمطعم hand made او مثلا موتور الكهربا او سيتيرن المي لان اصلا وصولكم من المطار على الحي او البناية وحكيكم مع اولادكم بلغات العالم اللي جايين منه هيدا دغري دغري بيطلب تنزيل البضاعة ال hand made
قبل ما اختم معليه اذا فيكم تراعوا لنا مشاعرنا وما تضايقوا من قطع الكهربا او الشوب او الغلا او العجقة، مش انه شي بس اذا تضايقتوا رح نتضايق معكم، وانه انتو جيتوا ونحن ما عملنا من قيمتكم متل ما لازم، وكمان رح تحسسونا انه البشر الطبعيين مش هيك بعيشوا وهيا كتير خطر على صحتنا النفسية
ان شاء الله موت اذا عم كذب بس كل هيدا ما هو شي لان عن جد رح تتسلوا وتنبسطوا اكتر شي بنق العالم اللي رح يروحوا معكم وين ما تروحوا بس كل الوقت عم يخبروكم عن قديه الخنقة قوية علينا نحن لبنانيي الداخل.. خليني ساكتة
