الصيفية مستمرة
والمود بالترفع عن التفاصيل مستمر
ولانه الصيف يعني سياحة ومغتربين وعطلة وبرونزاج ما في احلى من انه الواحد يضوي على المعالم الرئيسية بالبلد، هيدي المعالم اللي بتعطي قيمة للوطن.
وبتعرفوا كتير منيح انه اللي بميز النظام اللبناني عن غيره من الانظمة مجموعة من ال nuancessettes ما بتتلاقى وين ما كان
مثلا قوة لبنان بضعفه، شوفوا هالعبادة شو معبرة، قديه بتحوي من الصور الشعرية رغم انها عبارة نثرية، وبعتقد انه لما وصل اقوى عهد بتاريخ لبنان على الحكم لعبها بشكل كتير مدروس كيف يثبِّت القول بالفعل، يعني هو وأقوى زلمة قاعد ببعبدا شامخ، وبضهروا اقوى تكتل برئاسة أقوى صهر، وبحماية أقوى سلاح، وبمعارضة أقوى جمهورية.. ضعف لبنان صارت تضعف القوة الشرائية عند الشعب ويقوى لبنان، تضعف القوة الاستشفائية عند الشعب ويقوى لبنان، تضعف القوة الاقتصادية بالبلد بس يقوى لبنان، تضعف القوة الامنية بالبلد ويقوى لبنان، تضعف القوة السياحية بالبلد ويقوى لبنان
٦و٦ مكرر في أحلى من وقع هيك رقم بعد بدهم ٦ ليلبق الرقم اكتر على جهنم، انه معقول مثلا نكون بجهنم بس تابعين رقم تاني؟
الميثاقية قديه حلوة الميثاقية، القاف والثا فيها بتذكر بالقيثارة تتذكروا هيك بكتب القراءة شو كان الها قيمة القيثارة بس يحكوا عن الالات الموسيقية، هيك نفحة تبلسم النصوص الجافة، وهيدي الميثاقية في احلى منها هيك بتنسحب وبترجع وبتطلع من العب للجيبة يوم بتخدم مصلحة هيدا الفريق ويوم بتخدم مصلحة الفريق التاني
في عندكم مثلا اصغر من ان يقسم واكبر من ان يبلع، قديشها هالعبارة جامعة فيها بتشوف الصليب عم يعانق المأذنة، والشعب عم يقطر عالدبكة قبل ما يرجع ينتبه انه حقوق المسيحيين بخطر ويصير يطالب بالبصلة وتقشيرتها، هيك بقوم بينتبه ابن المذهب التاني انه كل عمره محروم ابن محروم وهلق صار لازم يعوض عن حرمانه بحرمان الاخرين.
قديه حلو التوزيع الطائفي بالبلد على الرؤوساء التلاتة، وعلى النواب والوزراء، انه بتتخايلوا مثلا لبنان بلا طوائف، وانه هيدي المناصب كلها موزعة على اساس الكفاءة؟ طب شو الكفاءة مثلا بعلي حسن خليل؟ خود عندك ندى البستاني؟ طب مثلا شو كفاءة عدنان الطرابلسي؟ او مثلا جيمي جبور؟ انه عم قول اي اسامي بس حقيقة انه هول كلهم شو منعرف عنهم غير انهم بينتموا لزعماء طوائف قرروا انه هول الاشخاص اكتر القادرين على تمثيل الطايفة وابنائها وهيك طايفة علينا من كل المحلات.
في احلى من التلت المعطل؟ نحن التلت عنا بالثقافة يعني خدو العرق متلت بلدي اصيل، منشربه تلتين بتلت.. هيدي الامور بتربى معنا بتتغلغل بيومياتنا.. كم حكومة شفناها تعطل تشكيلها لاشهر طويلة كرمال هيدا التلت؟
تدوير الزوايا فخر السياسة اللبنانية هيدي القطبة المخفية اللي عبرها بسرق السلطة وبتنهب ومرات بتقتل وما حدا بحاسبها لان هيدي الزوايا قد ما بتدور بتضل تزحط وبصير كل مسؤول عم يتزحلق على الزوايا وواقف من الديك على طائفته صياح.. هيدي الزوايا من اهم مهام تدويرها هو الحفاظ على الديموقراطية التوافقية هيدي الدميوقراطية اللي بتخللها عبارات زواج ماروني وزواج متعة والمصلحة العامة، هلق الديموقراطية التوافقية معناها الحقيقي السرقة والنهب والتفريط بثروات البلد بالتكافل والتضامن وتوزيع الحصص بشكل متساوي او نسبي من كل شي بتوقع ايدهم عليه وصولا لاخر نقطة من دم الشعب.
على الهامش في عنا "الشراكة الوطنية" و"الوحدة الوطنية" و"المصلحة الوطنية" و"كلنا للوطن" و"الإرادة الوطنية الجامعة"، هيدي الوطنية الفايضة بكل اسم حكومة بالشعارات الانتخابات النيابية بالمقابلات التلفزيونية لا تلبث ان تختفي متل الحبر السري عند اي استحقاق حقيقي متل سرقة اموال المودعين، نهب المال العام، ترسيم الحدود البرية او البحرية، التفريط بثروات البلد.
ان شاء الله موت اذا عم كذب بس بعد في اهم وحدة ثلاثية الجيش الشعب والمقاومة هيدي الثلاثية اللي من يوم ما فاتت على البيانات الحكومية وصارت خطوط الدولة الحقيقية تختفي زيح ورا زيح، وبلشت المحاصصات على قاعدة بغطي فسادك بتغطي لي استقوائي... خليني ساكتة
