خليني ساكتة ١٥٥ - المرشد الاعلى المحلي ما ممكن يعرض الصيفية للخطر.. نفط لبنان مغتربينه!

خلونا بمود الصيف وانه هيك شوي نبعد عن التفاصيل اليومية وشو اكل نائب التغيير وشو قال نائب التعتيير ووين نام نائب التمييل

الدنيا صيفية والبيوت قلبت سونا، الحرارة اللي عم تحسوا فيها مش بسبب غياب الكهربا وغلاء الموتورات ومحاولات التوفير المتكررة اللي حولت ال AC من بعد المايكرووايف لديكور.. هيدي حرارة الايمان بالبلد، وطنك منه شقة مفروشة تتركه وتفل لان ما فيه شي ماشي.

وطنك ارض وعرض بتتشبث فيهم بتساعد الامن العام على الاحساس بإنه it's ok انه ما في باسبورات الا بالقطارة، لان نحن مش بحاجة لباسبورات، نحن بدنا نبقى مزروعي هون متل الارز الشامخ من هلق ليرجع يتعمر لبنان.

تعوا نحكي عن الاجيال مثلا شي مرة خطر ببالكم تقعدوا تاخدوا الاجيال اللي هلق على قيد الحياة، وترسموا الخريطة الطبيعية تاريخ - حاضر ومستقبل؟

اذا على سبيل المثال لا الحصر، اخدنا امي كتارخ وانا كحاضر وابنتي كمستقبل، كلنا محكومين من نفس القرطة المجرمة الفاسدة والفاشلة، آباء حكمت اهلنا، وهني عم يحكمونا، واولادهم اللي ما لحقنا لالنا رح يلحق اولادنا.. يعني تاريخنا وحاضرنا ومستقبلنا مرتبطين بنفس المجموعة الحاكمة عبر السنين.

شوف الفرق بينا وبين اي واحد مهاجر، هو بيشقى وبيتعب وبيدفع ضرايب وآخر شي بيتقاعد، نحن اهلنا شقيوا وتعبوا وجمعوا شوية مصاري آخر شي سرقهم رياض سلامة والاربعين حرامي اللي حاكمين البلد من سياسيين ومصرفيين شقى عمرهم فلاقوا حالهم مضطرين يكملوا شغل، هيدا الشغل اللي بطل موجود حتى لاولادهم يعني نحن.

نحن بما نمثله من حاضر، موبوء بكل أنواع المشاكل المتراكمة عبر التاريخ وصولا لعنا، لقينا حالنا بلا شغل، واللي عم يشتغل بيدفع كل شي عالدولار بس بيقبض عاللبناني بأفضل الحالات عالمنصة، او بده يلاقي شركة بتدفع دولار، واللي عم تدفع دولار قلّصت المعاشات، لان على ما يبدو اسعار سوق السودا اوضح بدول الخليج من الداخل اللبناني، يعني صرنا ببساطة نعامل كيد عاملة رخيصة، وعارفين انه شو رماك عالمر اللي امر منه، يعني بدنا نشتغل نحن ومبسوطين انه بالقليلة ملاقيين شغل، على أمل نثبت حالنا ونثبت للي مشغلنا اننا منستاهل المعاش الحقيقي اللي بعيشنا بكرامة، لنعيش ونعيش اولادنا.

هيدي الكرامة بالذات هي غير اللي بتجي مرتبطة بالعز، لان هيديك الها تعونيات خاصة متل السجاد وما يعادله، هيدي الكرامة كمان مساقبة منتبهة انه الرزقة اللي بتخلق مع الولد مش لاحظة مثلا سعر بعض اللقاحات اللي صار يتسعروا بالدولار، ولا فحصيات الحكماء الاختصاصيين، ولا مثلا قسط المدرسة اللي نهينا السنة على شي وموعدين بالمصايب على السنة الجديدة.

هون منوصل لاولادنا هول تحديداً مش متل اولاد الزعماء، هوليك تاريخهم كان مأمن، وحاضرهم مأمن ومستقبلهم مأمن، اولا واخيرا مرتاحين على وضعهم ووضع اهلهم انه ما رح يتحاكموا ولا يندق بأموالهم، طالما هو ذاته الحاكم والمدعي العام والقاضي كلهم واحد، غالبتهم معهم باسبورات اجنبية واللي ما معه باسبور معه مصاري يسافر، اموال اهلهم ناطرينهم بالخارج، في احلى منها هيك يعني بسافر الواحد منهم بس ب handbag بيوصل لهونيك ببلش حياته بعيد من وجع الراس اللبناني، وبيرجع بعد عمر بيجي ليحكم اولادنا. هول الاولاد اللي قسم كتير كبير منهم صار معرض لسوء تغذية، ولامراض كانت اختفت بكل بلاد العالم بسيب عدم متابعة حملات التلقيح، هيدا المستقبل اللي الاطفال بتحكي فيه كل الوقت بالمصاري، لان انسحب منها الامان الاجتماعي والاقتصادي.

على الهامش اللي بيطلع بالشباب والصبايا، بحس بانعدام الافق، اذا بدنا نحط على جنب احصاءات عدد الذكور بالنسبة للاناث واللي هو في خلل كتير كبير، في مشكلة كيف بدهم يقدروا يحطوا اسس لمستقبلهم، لما بطل في اهل يقدروا يساعدوهم ولا اشغال ثابتة او وافية يقدروا يأمنوا من خلالها الحد الادنى لبناء حيز خاص فيهم.

ان شاء الله موت اذا عم كذب بس كيف ما برمتها بتطلع الهجرة لمن استطاع اليها سبيلا هي الحل الامثل، لان هيدا البلد صاير متل مريض السرطان الميؤوس من حالته وعم بنازع بأيامه الاخيرة الكل عارف انه رح يموت بس كمان الكل متعلق بقشة او بأمل او بوهم يمكن يمد له بحياته.. خليني ساكتة