بكون الواحد ناوي ياخد اسبوع عطلة
وعم يحاول يفكر على رواق شوي
بتطلع رندلى جبور بتخلخل كل المشهد، هيك بتصفقك دعوى بتبطل عارف حالك انت وين، انت مين؟ انت شو المفروض هلق اعمل؟ تضرب حالك للتأكد انك عم تسمع صح؟ تنتف شعرك لانك عم تسمع اللي عم تسمعه؟ تقدم استقالتك من الكوكب لانك عم تتنفس انت والعونيين نفس الهوا؟ او ببساطة تحضر العلم وتروح توقف من هلق على طريق بعبدا الرابية تنطر ساعة الصفر وتدبك بالشارع من الفرح بإنه ترك القصر ورجع لحجمه؟
العونيين حالة يجب من دون ادنى شك ان تُدرَّس، ما معقول اليوم يكون في هيك شي بالكوكب وما يُصار لتحليلهم بشكل علمي تستفيد منها الكرة الارضية، ممكن الدراسات تحمل عنوان "حالة الانكار المستدام"، او مثلا "كيف تقنع نفسك بأن زعيمك الفاشل اهم ما انتجه التاريخ؟"
يعني كل ما اسمع عوني عم يحكي عن عون بصير اتخايل نابليون، اتخايل قدموس، اتخايل نبوخذنصر.. لحد ما انفض راسي وارجع على ارض الواقع واتذكره تحديدا مين هو. لا ومصدقة حالهاانه اعاد الهيبة لرئاسة الجمهورية نسيت انه يمكن الوحيد اللي طلب مقابلة الرئيس بكل عهده هني رؤوساء الحكومة المكلفين والمستقلين ويمكن لو ما كانوا مضطرين ما حدا راح، حتى من بعد ما فل سعد الحريري اضطروا يعملوا تكريم صاحبة مطعم ويستقبلوا ملكة الجمال بس ليسلوه ليبقى عم يطلع اسمه بالاعلام.
شهر آب عم يخلص، ورح تزحف امواج حركة المحرومين للاستماع لخريطة الطريق اللي بده يرسمها الرئيس بري بخطابه، هلق الاسبوع الماضي كان رسم لنا المرشد الاعلى المحلي خريطة طريق بذكرى عاشورا، وفي خريطة طريق جاهزة عند الصهر المعجزة، والخط السيادي الاستقلالي عنده خريطة طريق، يعني بالحد الادنى عنا ٦ - ٧. خطط طريق، بس لسبب من الاسباب الطريق مش واضحة هيك مضيعينها.. وحدهم النواب التغييريين بعدهم بالوثيقة، وهيدا مش انتقاص من اهمية اللي عم يجربوا يعملوه بس هيدا تحديدا وضعنا قدامنا ديناصور، وحش، غول جاية بخريطة طريقه يجرفنا ونحن حاملين الوردة بإيدنا عم نقل له روق روق شوي ما تاكلنا ومنتظرين منه يسمع الكلمة.
من بعدها جاية ايلول، الانظار متوجهة على الحدود البحرية والبرية، وعم يقيسه حرارة الجبهة والتصعيد الكلامي وشو بده يصير، ويمن بده ينقب ومين رح يبلش يبيع الغاز؟ على فكرة الطريقة وحدة نحن مستعملها مع الداخل والخارج تحميل مسؤوليات الفشل بادارة البلد والملفات، بس هيدا مع العدو الاسرائيلي الغاشم منصنفه حرب اعلامية مش خرط مواقف، وبالداخل منصنفه شحن سياسي ضروري لمواكبة الاستحقاقات.
ومن بعد ايلول، تشرين الاول، شهر الفرج الاتي، الاولاد بالمدرسة، الشوب بخف، والرئيس بفل.
السيناريوهات المطروحة الفراغ، او استعصاء عون بالقصر الجمهوري هو وفريقه والنكتة الاكبر انه ما بسلم البلد لحكومة مستقيلة، ويمكن يشكل حكومة انتقالية برئاسة جبران باسيل ليخلي البلد بأيدي أمينة.
يعني من ٣٣ سنة، طلعت الصرخة بيترك عون القصر او ما بيتركه؟ وكان اسم جعجع من المتصديين لبقاء عون بالقصر، واليوم رجعنا لنفس السؤال ولنفس الاسماء، اللبنانيين ككل لازم تندرس حالتهم كيف بعدهم لهلق معلقين بنفس الاشخاص بالتاريخ الدموي للحاضر الجهنمي اللي عايشينه، يمكن بالاخر نطلع زيادة عالبشرية وعم نستهلك اوكسيجين عالفاضي، لان ما في مبرر علمي بقول انه من الطبيعي يكون في شعب كامل قابل يعيش بهالخنوع، لا ومش اي شي انه شعب ما قاري حدا، معتبر حاله الله خلقه وكسر القالب، بس انه هيدا الشعب لقي انه من الحرام يوظف ذكاه متل دول العالم هول تبع الاختراعات والتكنولوجيا والصناعة والتجارة، قرر يفتح خط لحاله هو النصب، وهيدا الخط متل خط الاستواء عنده امتداد ببلش بالنصب بيمرق بالاحتيال وبيوصل على تأليه زعماء حرب حتى بتفكيرهم منهم بحاجة لاسلحة لتدمير البلد، بيكفي وجودهم بمواقع القرار حتى ما يقوم للبلد قيامة.
وكمان منمتاز نحن كشعب انه زعمائنا بنقوا اكتر منا، يعني مش بس حاطينهم زعماء علينا الا وكمان بدنا نتحمل نقهم، كل واحد بيطلع بعيط علينا بطريقة، كتير مرات بصير اتلفت حولي بالبيت هني وعم يدعونا للوقوف بوجه الفساد، والمؤامرة، واننا ما نقبل بالذل وبتعطيل القضاء، واننا نكون رأس حربة بوج كل واحد بده يدمر بلدنا، بتطلع بأهلي وعيلتي، بدي عيط عليهم ليه دمرتوا البلد وزعلتوا هالزعماء اللطيفين هول اللي قلبهم عليكم بكل التفاصيل. ولكن لنعطي كل واحد حقه الوزراء عنا شغالين حتى بتصريف الاعمال وزير الاشغال بيدعي لفحص اساسات الاهراءات، وزير الاقتصاد بيدعي مكافجة الاحتمار، وزي الصحة بيدعى لفتح تحقيق بادوية السرطان اللي تبخرت من الوزراء، الوحيد اللي يبندعي هو وزير الكهربا يوم جبران باسيل يوم ندى البستاني بناشدوه يجيب الكهربا وسيزار ابي خليل بحمله من وقت للتاني مسؤولية العتمة.
على الهامش في انواع من المرشحين على رئاسة الجمهورية، الاصيلين وهني جبران باسيل، سمير جعجع وسليمان فرنجية، في النوع اللي بيعرب عن رغبته بالترشح متل ميشال معوض، وفي الاسماء الطيارة هول هيك متل التمبولا بتكب اسماء بالبوكال والصحافيين والمواقع الالكترونية والمحللين بيسحبوا كل فترة واحد وبيمشوا بيحكوا فيه متل قائد الجيش، وامل ابو زيد، وزياد بارود على سبيل المثال لا الحصر وهول صفتهم تمويهية الهائية انه ليبعبوا هوا ويعملوا الانتخابات الرئاسية شفافة وبمتناول الشعب، وفي هول اللي مؤمنين بإنه قال هيدي لعبة ديموقراطية وفي مجال للترشح والانتخاب متل اللي اعلن ترشحه عالرئاسة من يومين زياد الحايك وقبله ترايسي داني شمعون..
قبل ما اختم بدي ارجع لدعوة الست رندلى جبور، انا بضم صوتي لصوتها وبدعي مرضى السرطان اللي ما عم يلاقوا الدوا يوقفوا ايد بايد مع اهالي وضحايا تفجير بيروت، من بعدهم كل مريض ما عم يلاقي دوا او ما معه حق دوا، وبعدين كل واحد ما عنده كهربا ببيته بسبب سياسة التيار الوطني الحر بادارة قطاع الكهربا بالسنوات الـ١٧ الاخيرة، بدعي كل ام ما عم تلاقي حليب لطفلها الرضيع، بدعي كل واحد ما لقي لقمة خبز لاولاده، بدعي كل واحد ما عم ينام لانه عم يفكر شو بده يعمل بقسط المدرسة اللي على الابواب، كل واحد خسر شغله، كل واحد انبهت امواله، بدعي كل متضرر من هيدي السلطة اللي على راسها هيك رئيس ينزل يودعه هو وضاهر من القصر.
ان شاء الله موت اذا عم كذب بس انا عندي قناعة انه مين ما اجا على سوءه بما فيهم الفراغ احسن من العهد الحالي.. بس هيدا الشي ما بيعني اني متأملة خير لان المشكلة مش باسم من هون او هونيك المشكلة مشكلة نظام سياسي مفخور صار بده نسف... خليني ساكتة
